ఉప సర్పంచుల ‘చెక్ పవర్’ రద్దు ప్రచారం అబద్ధం

ఉప సర్పంచుల ‘చెక్ పవర్’ రద్దు ప్రచారం అబద్ధం
అధికారాల రద్దు వార్తలు కేవలం ఊహాజనితమే
జీవోలతో ఆర్థిక హక్కులను మార్చడం సాధ్యం కాదు
ఉప సర్పంచులు ఎలాంటి ఆందోళన చెందాల్సిన పనిలేదు
పినపాక ఉపసర్పంచుల సంఘం మండల ఉపాధ్యక్షులు అచ్చా నవీన్

కాకతీయ, పినపాక : గ్రామ పంచాయతీల్లో ఉప సర్పంచుల ఆర్థిక అధికారాలను రద్దు చేయబోతున్నారంటూ సాగుతున్న ప్రచారం కేవలం ఊహాజనితమేనని, ఇందులో ఎలాంటి నిజం లేదని పినపాక ఉపసర్పంచుల సంఘం మండల ఉపాధ్యక్షులు అచ్చా నవీన్ స్పష్టం చేశారు. స్థానిక స్వపరిపాలనలో కీలకమైన ఉప సర్పంచ్ పదవి ప్రాధాన్యతను తగ్గించే ఉద్దేశం ప్రభుత్వానికి లేదన్నారు. సామాజిక మాధ్యమాల్లో, కొన్ని రాజకీయ వర్గాల్లో వస్తున్న వార్తలు కేవలం సృష్టించబడినవి మాత్రమేనని తెలిపారు. గ్రామాల్లో సర్పంచ్, ఉప సర్పంచుల మధ్య వచ్చే చిన్నపాటి సమన్వయ లోపాలను సాకుగా చూపి, కొంతమంది అధికారులు గతంలోనూ ఇలాంటి ప్రతిపాదనలను తెరపైకి తెచ్చారని నవీన్ గుర్తుచేశారు. అయితే ఉప సర్పంచుల అధికారాల తొలగింపు చట్ట విరుద్ధమని, అలాంటి ఆలోచనేదీ ప్రభుత్వం చేయడం లేదని అప్పట్లోనే పంచాయతీ రాజ్ కార్యాలయం అధికారికంగా స్పష్టం చేసిందన్నారు. ఇప్పుడు మళ్లీ అదే పాత ఊహాగానాలను కొందరు అధికారులు తమ సొంత విశ్లేషణలతో వార్తలుగా మలిచి గందరగోళం సృష్టిస్తున్నారని విమర్శించారు.

హక్కుల కాలరాత సాధ్యం కాదు
ఒక చట్టబద్ధమైన వ్యవస్థ ద్వారా కల్పించిన ఆర్థిక అధికారాలను అంత తేలికగా ప్రభుత్వ ఉత్తర్వులతో మార్చడం సాధ్యం కాదని అచ్చా నవీన్ పేర్కొన్నారు. 2018 పంచాయతీరాజ్ చట్టం ద్వారా లభించిన ఈ హక్కును మార్చాలంటే చట్ట సవరణలు జరగాలని, ప్రస్తుతం అలాంటి ఫైలు ఏదీ ఉన్నత స్థాయిలో పరిశీలనలో లేదని స్పష్టం చేశారు. ప్రజాప్రతినిధుల హక్కులను లాక్కొని అధికారులకు కట్టబెట్టే ప్రసక్తే లేదన్నారు. నిధులు, వేతనాల చెల్లింపుల్లో జాప్యాన్ని నివారించడానికి ప్రత్యామ్నాయ మార్గాలను అన్వేషిస్తున్నారే తప్ప, ఉప సర్పంచులను ఉత్సవ విగ్రహాలుగా మార్చే ఆలోచన ప్రభుత్వానికి లేదని, కాబట్టి గ్రామీణ ప్రజా ప్రతినిధులు ఆందోళన చెందాల్సిన అవసరం లేదని ఆయన తెలిపారు.