మోగిన పంచాయతీ నగారా

మోగిన పంచాయతీ నగారా

గెజిట్ నోటిఫికేషన్ రిలీజ్

31 జిల్లాల్లో మూడు విడతల్లో ఎన్నిక‌లు

డిసెంబర్ 11, 14, 17 తేదీల్లో పోలింగ్‌.. కౌంటింగ్‌

రాష్ట్రంలో మొత్తం 12,728 సర్పంచ్‌..
1,12,242 వార్డు స్థానాలు

ఎల్లుండి నుంచి తొలి విడత నామినేషన్లు

ఈనెల 25 నుంచే అమ‌ల్లోకి కోడ్‌

తెలంగాణ‌లో కోటి 66 లక్షలకుపైగా ఓటర్లు

వివ‌రాలు వెల్ల‌డించిన స్టేట్ ఎలక్షన్ కమిషన్ చీఫ్ రాణి కుమిదిని

ప‌ల్లెల్లో పండుగ వాతావర‌ణం

కాక‌తీయ‌, తెలంగాణ బ్యూరో: ప‌ల్లె పోరుకు రంగం సిద్ధ‌మైంది. ఎప్పుడెప్పుడా అని ఎదురుచూస్తున్న పంచాయతీ ఎన్నికలకు ముహూర్తం ఖ‌రారైంది. లోక‌ల్ బాడీ ఎల‌క్ష‌న్స్‌కు ఎట్ట‌కేల‌కు న‌గ‌రా మోగింది. ఎల‌క్ష‌న్ క‌మిష‌న్ మంగ‌ళ‌వారం గెజిట్ నోటిఫికేషన్ రిలీజ్ చేసింది. ఈమేర‌కు స్టేట్ ఎలక్షన్ కమిషన్ చీఫ్ రాణి కుమిదిని వివ‌రాలు వెల్ల‌డించారు. మొత్తం మూడు విడతల్లో గ్రామ పంచాయతీ ఎన్నికలు జ‌ర‌గ‌నున్నాయి. తెలంగాణ‌లోని 12,728 సర్పంచ్‌ స్థానాలు, 1,12,242 వార్డుల‌కు డిసెంబర్ 11, 14, 17 తేదీల్లో పోలింగ్ నిర్వ‌హించ‌నున్నారు. ఉదయం 7 నుంచి మధ్యాహ్నం 1 వరకు పోలింగ్.. అదే రోజు మధ్యాహ్నం 2 నుంచి ఓట్ల లెక్కింపు చేప‌ట్ట‌నున్నారు. ఎల్లుండి (గురువారం) నుంచి తొలి విడత నామినేషన్లు స్వీకరించ‌నున్నారు. నిన్న‌టి నుంచి రాష్ట్రంలో ఎన్నికల కోడ్ అమ‌ల్లోకి వ‌చ్చింద‌ని రాణి కుమిదిని తెలిపారు. కాగా.. రిజ‌ర్వేష‌న్లు ఖ‌రార‌వ‌డంతోపాటు ఎన్నిక‌ల నోటిఫికేష‌న్ విడుద‌ల‌వ‌డంతో తెలంగాణ పల్లెల్లో పండుగ వాతావర‌ణం క‌నిపిస్తోంది. పార్టీ గుర్తుల‌పై జ‌ర‌గ‌క‌పోయినా ప్ర‌ధాన పార్టీల‌న్నీ ఎన్నిక‌ల‌ను ప్ర‌తిష్టాత్మ‌కంగా భావిస్తున్నాయి.

ముఖ్య తేదీలు ఇవే..

మూడు విడతల్లో గ్రామ పంచాయతీ ఎన్నికలు జ‌ర‌గ‌నున్నాయి. డిసెంబర్ 11, 14, 17 తేదీల్లో 12,728 సర్పంచ్‌, 1,12,242 వార్డు స్థానాలకు పోలింగ్ నిర్వ‌హించ‌నున్నారు. ఉదయం 7 నుంచి మధ్యాహ్నం 1 వరకు పోలింగ్.. పోలింగ్‌ రోజే మధ్యాహ్నం 2 నుంచి ఓట్ల లెక్కింపు చేప‌ట్టి ఫ‌లితాలు ప్ర‌క‌టించ‌నున్నారు.
రేప‌టి నుంచి తొలి విడత నామినేషన్లు స్వీకరించ‌నున్నారు. రెండో విడత ఎన్నికలకు ఈనెల 30 నుంచి నామినేషన్ల స్వీకరణ ఉంటుంది. మూడో విడత ఎన్నికలకు డిసెంబర్ 3 నుంచి నామినేషన్లు స్వీకరించ‌నున్నారు. తొలి విడతలో 4,236 సర్పంచ్‌ స్థానాలకు 37,440 వార్డులకు పోలింగ్ జ‌ర‌గనుంది. రెండో విడతలో 4,333 సర్పంచ్‌ స్థానాలకు 38,350 వార్డులకు, మూడో విడతలో 4,333 సర్పంచ్‌ స్థానాలకు 38,350 వార్డులకు పోలింగ్ చేప‌ట్ట‌నున్నారు. ఇప్పటికే ప్రభుత్వం ఎన్నికల నిర్వహణకు అనుమతినివ్వగా పంచాయతీరాజ్‌శాఖ, ఎన్నికల సంఘం ఇందుకు సంబంధించి ఏర్పాట్లు పూర్తిచేశాయి.

ప్రభుత్వ తీరుపై మండిపాటు..

స్థానిక సంస్థలకు ఎన్నికలు నిర్వహించకపోవడంతో ఏడాదిన్నర కాలంగా గ్రామ పంచాయతీలు కూనరిల్లుతున్నాయి. ప్రత్యేక అధికారుల పాలనలో మసక బారుతున్నాయి. పాలకవర్గాలు లేకపోవడంతో ప్రజల అవసరాలు తీర్చే వారు కరువయ్యారు. ఈ పరిస్థితిలో సెప్టెంబర్ 30 లోపే ఎన్నికలు నిర్వహించాలని హైకోర్టు ఆదేశాలు ఇవ్వడంతో రేవంత్‌ ప్రభుత్వం ఈమేరకు ఏర్పాట్లు చేసింది. స్థానిక సంస్థల్లో బీసీలకు 42శాతం రిజర్వేషన్‌ కల్పించే అంశంలో కాంగ్రెస్‌ సర్కారు పూటకో రాజకీయానికి పాల్పడింది. రాష్ట్రంలో బీఆర్‌ఎస్‌ సహా అన్ని పార్టీలు మద్దతు తెలిపిన బీసీ రిజర్వేషన్‌ అంశాన్ని చట్టబద్ధంగా మార్చడానికి రేవంత్‌ ప్రభుత్వం విఫలమైంది. దీంతో ఈ అంశం కాస్తా హైకోర్టు మెట్లు ఎక్కడంతో న్యాయపరమైన చిక్కులు ఎదురయ్యాయి. ఫలితంగా కాంగ్రెస్‌ ప్రభుత్వ చిత్తశుద్ధిపై అనుమానాలు వ్య‌క్తం అయ్యాయి. హైకోర్టులో బలమైన వాదనలు వినిపించలేక చేతులు ఎత్తేయడంతో ఎన్నికలు మధ్యంతరంగా ఆగాల్సిన పరిస్థితి ఏర్పడింది. ఈ క్ర‌మంలోనే మ‌రోమారు తాజాగా పంచాయ‌తీ ఎన్నిక‌లకు నోటిఫికేష‌న్ విడుద‌లైంది.

గ‌తంలో హైకోర్టు బ్రేక్‌

రాష్ట్రంలో స్థానిక సంస్థల ఎన్నికలకు ప్రభుత్వం అన్ని ఏర్పాట్లు చేసింది. పాత రిజర్వేషన్ల ప్రకారం ఎన్నికలకు వెళ్లేందుకు ఇప్పటికే గతంలో జరిగిన క్యాబినెట్ సమావేశంలో సర్కార్ నిర్ణయం తీసుకుంది. బీసీలకు లోకల్ బాడీ ఎన్నికల్లో 42 శాతం రిజర్వేషన్లకు చట్టబద్ధత కల్పించడం సాధ్యం కాకపోవడంతో పార్టీపరంగా బీసీలకు 42 శాతం సీట్లు ఇవ్వాలని కాంగ్రెస్ నిర్ణయించుకుంది. ఇక లోకల్ బాడీ ఎన్నికల్లో బీసీలకు 42 శాతం రిజర్వేషన్లపై గతంలో కాంగ్రెస్ ప్రభుత్వం జీఓ ఇచ్చింది. కానీ హైకోర్టు కొట్టివేయడంతో లోకల్ బాడీ ఎన్నికలకు బ్రేక్ పడింది. నామినేషన్ల ప్రక్రియ స్టార్ట్ అయినప్పటికీ కోర్టు తీర్పుతో రాష్ట్ర ఎన్నికల సంఘం రద్దు చేస్తూ నిర్ణయం తీసుకుంది. తర్వాత ప్రభుత్వం 15వ ఆర్ధిక సంఘం నిధులు దాదాపు రూ. 3 వేల కోట్లు వృధా కాకుండా పోవాలంటే లోకల్ బాడీ ఎన్నికలు జరపాల్సిన పరిస్థితి నెల‌కొంది. జూబ్లీహిల్స్ ఉప ఎన్నికల్లో గెలుపుతో ఊపు మీదున్న కాంగ్రెస్.. సర్పంచ్ ఎన్నికల్లోనూ అదే జోరును కొనసాగిస్తుందా ? రిజర్వేషన్ల అంశంపై విపక్షాల నుంచి విమర్శలు, అభ్యంతరాలను ఫలితాల ద్వారా అధిగమిస్తుందా ? అన్నది ఆసక్తికరంగా మారింది.