మేడారంలో రాష్ట్ర మంత్రుల బృందం పర్యటన
కాకతీయ, ములుగు ప్రతినిధి : చరిత్రకెక్కనున్న మేడారం మహా జాతర కోసం జరుగుతున్న అభివృద్ధి పనులను రాష్ట్ర మంత్రులు పొంగులేటి శ్రీనివాసరెడ్డి, కొండా సురేఖ, దనసరి సీతక్క, ఎంపీ బలరాం నాయక్ కలిసి పరిశీలించారు. గుడి ప్రాంగణం, పగిడిద్దరాజు,గోవిందరాజుల గద్దెలు, జంపన్న వాగు పరిసర ప్రాంతాల్లో జరుగుతున్న పనుల పురోగతిని అధికారులను అడిగి తెలుసుకున్నారు. ఈ సందర్భంగా అధికారులు పనుల వేగంపై దృష్టి పెట్టాలని, మహా జాతర ప్రారంభం వరకు అన్ని పనులు పూర్తి అయ్యేలా చర్యలు తీసుకోవాలని ఆదేశించారు. భక్తుల విశ్వాసం దెబ్బతినకుండా, ఆదివాసీల ఆస్తిత్వం–సంస్కృతిని కాపాడుతూ అభివృద్ధి జరుగుతుందని మంత్రులు పేర్కొన్నారు. జంపన్న వాగు అభివృద్ధి మరియు సుందరీకరణ ప్రతిపాదనలు సిద్ధంగా ఉన్నాయని చెప్పారు. అలాగే బస్టాండ్ వరకు రహదారి విస్తరణ పనులను పరిశీలిస్తూ, రహదారుల మరమ్మతులు అత్యవసరమని సూచించారు. నాణ్యత విషయంలో ఎట్టి పరిస్థితుల్లో రాజీ పడొద్దు, అని మంత్రులు అధికారులకు స్పష్టం చేశారు. మిగిలిన పనులను తక్షణం పూర్తి చేసి భక్తులకు ఎలాంటి అసౌకర్యం కలగకుండా ముందస్తు చర్యలు తీసుకోవాలని కూడా సూచించారు. పర్యటనలో భాగంగా మంత్రి పొంగులేటి శ్రీనివాసరెడ్డి, మంత్రి కొండా సురేఖ, ఎంపీ బలరాం నాయక్‌కు రాష్ట్ర మంత్రి సీతక్క పుష్పగుచ్ఛాలు అందజేస్తూ ఘన స్వాగతం పలికారు.ఈ కార్యక్రమంలో జిల్లా గ్రంథాలయ సంస్థ చైర్మన్ బానోత్ రవి చందర్, వ్యవసాయ మార్కెట్ కమిటీ చైర్మన్ రేగ కళ్యాణి, మేడారం ట్రస్ట్ బోర్డు చైర్మన్ అరేం లచ్చు పటేల్, జిల్లా,మండల నాయకులు ఎర్రబెల్లి మనోజ్ కుమార్, జాలపు అనంత రెడ్డి, సమ్మక్క–సారలమ్మ పూజారులు మరియు అధికారులు పాల్గొన్నారు.
