ఎన్‌హెచ్ ఆక్ర‌మ‌ణ
రోడ్డు స్థ‌లం ఆక్రమిస్తూ.. బంక్‌లోకి దారి నిర్మాణం
రహదారి పక్కన ఏర్పాటు చేసిన ఐరన్ రాడ్ల తొలగింపు
నిబంధనలకు విరుద్ధంగా సిమెంట్ వాల్ నిర్మాణం
ప్రమాదాల ముప్పు ఉందని వాహనదారుల ఆందోళన
అధికారుల నిర్లక్ష్యంపై తీవ్ర విమర్శలు
అక్రమ నిర్మాణాలను వెంటనే తొలగించాలని ప్రజల డిమాండ్
కాకతీయ, ఏటూరునాగారం : ములుగు జిల్లా ఏటూరునాగారం జంక్షన్ నుంచి ముళ్లకట్ట వైపు వెళ్లే జాతీయ రహదారి సంఖ్య 163పై పెట్రోల్ బంక్ నిర్వాహకుడు అక్రమ నిర్మాణాలు చేపడుతున్నట్లు ఆరోపణలు వెల్లువెత్తుతున్నాయి. జాతీయ రహదారికి సంబంధించిన స్థలాన్ని ఆక్రమిస్తూ నిబంధనలకు విరుద్ధంగా నిర్మాణాలు కొనసాగుతున్నప్పటికీ సంబంధిత అధికారులు పట్టించుకోవడం లేదని స్థానికులు, వాహనదారులు ఆవేదన వ్యక్తం చేస్తున్నారు. జాతీయ రహదారికి ఇరువైపులా ఏర్పాటు చేసిన ఐరన్ రాడ్లను తొలగించి, రహదారి పరిధిలోని స్థలాన్ని ఆక్రమిస్తూ పెట్రోల్ బంక్ నిర్వాహకుడు సిమెంట్ వాల్ నిర్మిస్తున్నట్లు సమాచారం. రహదారి భద్రత కోసం ఏర్పాటు చేసిన పరిరక్షణ ఏర్పాట్లను తొలగించడం తీవ్ర ఆందోళనకు గురిచేస్తోంది. రహదారి విస్తరణ, భద్రతా ప్రమాణాలకు విరుద్ధంగా చేపడుతున్న ఈ నిర్మాణాలు ప్రమాదాలకు కారణమయ్యే అవకాశముందని వాహనదారులు హెచ్చరిస్తున్నారు.స్థానికుల ఆరోపణల ప్రకారం, ఈ నిర్మాణాలు పూర్తిగా అక్రమంగా కొనసాగుతున్నప్పటికీ సంబంధిత శాఖ అధికారులు ఎలాంటి చర్యలు తీసుకోకపోవడం అనుమానాలకు తావిస్తోంది. ఈ వ్యవహారంలో కొంతమంది అధికారుల నిర్లక్ష్యం లేదా సహకారం ఉందన్న అనుమానాలు వ్యక్తమవుతున్నాయి.
ప్రమాదాలకు కారణమవుతున్న నిర్మాణాలు
ప్రత్యేకంగా రాత్రి వేళల్లో రహదారిపై నిర్మించిన సిమెంట్ వాల్ స్పష్టంగా కనిపించకపోవడం వల్ల వాహనదారులు ప్రమాదాలకు గురయ్యే అవకాశం ఉందని స్థానికులు ఆందోళన వ్యక్తం చేస్తున్నారు. వేగంగా ప్రయాణించే వాహనాలకు ఈ నిర్మాణాలు అడ్డంకిగా మారి ప్రమాదాలకు దారితీయవచ్చని హెచ్చరిస్తున్నారు. ఇప్పటికే ఈ ప్రాంతంలో ప్రమాదకర పరిస్థితులు నెలకొన్నాయని, తక్షణ చర్యలు తీసుకోకపోతే పెద్ద ప్రమాదాలు సంభవించే అవకాశం ఉందని చెబుతున్నారు. జాతీయ రహదారి భద్రతను దృష్టిలో ఉంచుకుని అక్రమంగా నిర్మించిన గోడలు, ఇతర నిర్మాణాలను వెంటనే తొలగించాలని స్థానికులు డిమాండ్ చేస్తున్నారు. సంబంధిత శాఖ అధికారులు క్షేత్రస్థాయిలో పరిశీలించి, నిబంధనలకు విరుద్ధంగా నిర్మాణాలు చేపట్టిన వారిపై కఠిన చర్యలు తీసుకోవాలని కోరుతున్నారు. ప్రజల ప్రాణ భద్రతను కాపాడేందుకు అధికారులు వెంటనే స్పందించి సమస్యకు పరిష్కారం చూపాలని వాహనదారులు విజ్ఞప్తి చేస్తున్నారు.
