కొమ్మాల జాతరకు వేళాయె… పనులేమో కాకపాయే!!
ఈనెల 23 నుంచి బ్రహ్మోత్సవాల ప్రారంభం
రూ.1.45 కోట్ల రోడ్డు పనులు అసంపూర్తి
పెండింగ్‌లోనే ఉత్సవ కమిటీ నియామకం
జాతర ముందు ఈఓ మార్పుపై ఎమ్మెల్యే ఆగ్రహం
భక్తుల సౌకర్యాలపై నెలకొన్న అనిశ్చితి
కాకతీయ, గీసుగొండ : ఉమ్మడి వరంగల్ జిల్లాలో ప్రసిద్ధి చెందిన కొమ్మాల శ్రీలక్ష్మీ నరసింహ స్వామి బ్రహ్మోత్సవాలు ఈనెల 23 నుంచి మార్చి 9 వరకు నిర్వహించేందుకు అధికారులు షెడ్యూల్ ప్రకటించారు. మార్చి 3 నుంచి 7 వరకు జరిగే ప్రధాన జాతరకు లక్షలాది మంది భక్తులు తరలివచ్చే అవకాశం ఉంది. అయితే జాతరకు సమయం దగ్గరపడుతున్నా అభివృద్ధి పనులు పూర్తి కాకపోవడం స్థానిక ప్రజలు, భక్తుల్లో ఆందోళనకు దారి తీస్తోంది.
జాతరకు వచ్చే భక్తుల సౌకర్యార్థం రూ.1.45 కోట్ల వ్యయంతో చేపట్టిన రహదారి అభివృద్ధి పనులు ఇంకా అసంపూర్తిగానే ఉన్నాయి. ప్రధాన రహదారులపై పనులు మధ్యలోనే నిలిచిపోవడంతో రాకపోకలకు అంతరాయం కలుగుతోంది. జాతర సమయానికి పనులు పూర్తికాకపోతే భక్తులు తీవ్ర ఇబ్బందులు ఎదుర్కొనే పరిస్థితి నెలకొంటుందని స్థానికులు ఆందోళన వ్యక్తం చేస్తున్నారు.
రోడ్డు పనులు, మౌలిక సదుపాయాలు పెండింగ్
దేవస్థానం పరిసరాల్లో పారిశుధ్యం, తాగునీరు, పార్కింగ్, విద్యుత్ వంటి మౌలిక సదుపాయాల ఏర్పాట్లు ఇంకా పూర్తి కాలేదని తెలుస్తోంది. లక్షలాది మంది భక్తులు తరలివచ్చే ఈ జాతరలో సరైన ఏర్పాట్లు లేకపోతే అవ్యవస్థ నెలకొనే అవకాశం ఉందని భక్తులు చెబుతున్నారు. జాతర సమయం దగ్గరపడుతున్న నేపథ్యంలో అధికారులు ప్రత్యేక దృష్టి సారించి పనులను వేగవంతం చేయాలని స్థానికులు కోరుతున్నారు.
ఉత్సవ కమిటీ ఆలస్యం.. ఎమ్మెల్యే ఆగ్రహం
జాతర నిర్వహణలో కీలకమైన ఉత్సవ కమిటీ ఇప్పటికీ నియమించకపోవడం విమర్శలకు దారి తీస్తోంది. కమిటీ లేకుండా ఏర్పాట్లు సమన్వయంతో ఎలా జరుగుతాయనే సందేహాలు వ్యక్తమవుతున్నాయి. ఇదిలా ఉండగా, జాతర ముందు దేవస్థానం కార్యనిర్వాహణాధికారిని మార్చడంపై ఎమ్మెల్యే రేవూరి ప్రకాష్ రెడ్డి ఆగ్రహం వ్యక్తం చేసినట్లు సమాచారం. ఇటీవల నిర్వహించిన సమీక్ష సమావేశంలో పనులపై అసంతృప్తి వ్యక్తం చేసిన ఆయన, వెంటనే పనులను పూర్తి చేసి భక్తులకు ఎలాంటి ఇబ్బందులు కలగకుండా చర్యలు తీసుకోవాలని అధికారులను ఆదేశించారు.
జాతర ప్రారంభానికి కేవలం కొన్ని రోజులు మాత్రమే మిగిలి ఉండటంతో ఇప్పటికైనా సంబంధిత శాఖలు స్పందించి పెండింగ్ పనులను పూర్తి చేయాలని భక్తులు కోరుతున్నారు. లేదంటే జాతర సమయంలో అవ్యవస్థ తలెత్తే ప్రమాదం ఉందనే ఆందోళన వ్యక్తమవుతోంది.
