లిస్ట్ రెడీ ?
క‌మిష‌న‌రేట్‌లో ఇన్ష్‌స్పెక్టర్ల బదిలీలకు రంగం సిద్ధం?
అతి త్వ‌ర‌లోనే ఉత్త‌ర్వుల జారీకి స‌న్న‌ద్ధం..!
ఎవరికెక్కడ పోస్టింగ్ అన్న‌దానిపై ఉత్కంఠ
రెండేళ్ల తర్వాత భారీగా మార్పులు!
కీలక పోస్టింగ్‌లపై కొన‌సాగుతున్న సస్పెన్స్
బదిలీలు ఉండే అవ‌కాశంపై డిపార్ట్మెంట్‌లో జోరుగా చర్చ
కాకతీయ, వరంగల్ బ్యూరో: వరంగల్ పోలీస్ కమిషనరేట్ పరిధిలో పనిచేస్తున్న ఇన్స్పెక్టర్ల బదిలీలకు రంగం సిద్ధ‌మైన‌ట్లు తెలుస్తోంది. ట్రాన్స్‌ఫ‌ర్స్ లిస్ట్ రెడీ అయింద‌ని.. సీపీ ప్ర‌క‌ట‌నే త‌ర్వాయి.. అని పోలీస్ శాఖలో గుస‌గుస‌లు వినిపిస్తున్నాయి. గత రెండు సంవత్సరాలుగా ఒకే స్టేషన్లలో విధులు నిర్వహిస్తున్న అధికారులు ప‌లువురికి ఈసారి స్థాన‌చ‌ల‌నం క‌ల‌గ‌నుంద‌నే టాక్ వినిపిస్తోంది. రెండేళ్ల తర్వాత భారీగా మార్పులు చోటు చేసుకునే అవకాశం ఉండ‌టంతో అధికారుల్లో రోజురోజుకూ ఉత్కంఠ పెరుగుతోంది. ఎవరికెక్కడ పోస్టింగ్ ద‌క్కుతుందో అన్న ఆసక్తి నెలకొంది. కీలక పోస్టింగ్‌ల కోసం ఇంత‌కాలం గ‌ట్టిగా ప్ర‌య‌త్నించిన పలువురు ఆఫీస‌ర్ల ప్రయత్నాలు ఏ మేర‌కు ఫ‌లిస్తాయ‌నే సస్పెన్స్ కొన‌సాగుతోంది. ఇదే అంశం ప్రస్తుతం వరంగల్ పోలీస్ కమిషనరేట్ పరిధిలో హాట్ టాపిక్‌గా మారింది. ఇప్పటికే బదిలీలకు సంబంధించిన సిఫార్సుల లేఖలు ఉన్నతాధికారుల వద్దకు చేరుకున్నాయని, కొన్ని ఫైల్స్‌పై సంతకాలు కూడా పూర్తయ్యాయని సమాచారం. అయినప్పటికీ తుది ఆదేశాలు ఆలస్యం కావడం అనుమానాలకు తావిస్తోంది.
చివరి క్షణం మార్పులే అడ్డంకా ?
విశ్వసనీయ వర్గాల ప్రకారం.. ఇన్స్పెక్టర్ల బదిలీల జాబితా దాదాపు ఫైనల్ దశకు చేరుకున్న‌ట్లు సమాచారం. అయితే కొన్ని కీలక స్టేషన్ల పోస్టింగ్‌ల విషయంలో చివరి నిమిషంలో మార్పులు జరుగుతున్నాయని తెలుస్తోంది. ముఖ్యంగా నగరంలోని సెన్సిటివ్ పోలీస్ స్టేషన్లకు ఎవరిని నియమించాలి అనే అంశంపై ఉన్నతస్థాయిలో చర్చలు జరుగుతున్న‌ట్లు సమాచారం. ఈ బదిలీల ప్రభావం పోలీస్ శాఖ పనితీరుపై కూడా కనిపిస్తున్నట్లు సమాచారం. ఎవరికి ఎక్కడ పోస్టింగ్ వస్తుందో తెలియక అధికారులు కొంతమంది నిరీక్షణలో ఉండగా, మరికొందరు తమకు అనుకూలమైన ప్రాంతాల కోసం ప్రయత్నాలు చేస్తున్నట్లు ప్రచారం జరుగుతోంది.
రాజకీయ సిఫార్సులు కీలకం?
బదిలీల్లో రాజకీయ ప్రభావం ఉందనే చర్చ సాగుతోంది. జిల్లాస్థాయి ప్రముఖులు తమకు అనుకూలమైన అధికారులను తమ ప్రాంతాలకు తీసుకురావడానికి ప్రయత్నాలు చేస్తున్నట్లు తెలుస్తోంది. కొందరు నేతలు నేరుగా ఉన్నతాధికారులను సంప్రదిస్తున్నారనే వార్తలు వినిపిస్తున్నాయి. ప్రస్తుతం ట్రాన్స్ఫర్ల విషయంపై ప్రతి రోజు కొత్త ప్రచారాలు వస్తున్నాయి. పోలీస్ శాఖలో పరిచయాలు ఉన్న వారు, రాజకీయ నాయకులు, మధ్యవర్తులు, అందరూ తమకు తెలిసిన అధికారులను సంప్రదిస్తూ తాజా సమాచారం తెలుసుకునే ప్రయత్నం చేస్తున్నారు. దీంతో కమిషనరేట్ చుట్టూ ఒక రకమైన టెన్షన్ వాతావరణం నెలకొంది.
నేడా..? రేపా..?
ప్రస్తుతం పరిస్థితి చూస్తే ఎప్పుడైనా బదిలీల జాబితా విడుదల అయ్యే అవకాశముందని తెలుస్తోంది. నేడా? రేపా? అన్న ఉత్కంఠతో పోలీస్ వర్గాలు ఎదురుచూస్తున్నాయి. ఒకసారి ఉత్తర్వులు వెలువడితే కమిషనరేట్ పరిధిలో పెద్ద ఎత్తున మార్పులు చోటుచేసుకునే అవకాశం ఉంది. గత రెండేళ్లుగా ఒకే పరిధిలో పని చేస్తున్న అధికారులను మార్పు చేయాల్సిన అవసరం ఉందని చాలా మంది భావిస్తున్నారు. ఇది పారదర్శకత, పనితీరు మెరుగుదలకు దోహదపడుతుందని నిపుణులు సూచిస్తున్నారు. మొత్తంగా వరంగల్ కమిషనరేట్ పరిధిలో ఇన్స్పెక్టర్ల బదిలీలు కేవలం పరిపాలనా చర్య మాత్రమే కాకుండా, రాజకీయంగా కూడా ప్రాధాన్యం సంతరించుకున్న అంశంగా మారింది. అధికారిక ప్రకటన వెలువడే వరకు ఈ ఉత్కంఠ ఇలానే కొనసాగ‌నుంది.
