కాళేశ్వరం విచారణపై నేడు హైకోర్టు కీలక తీర్పు!
జస్టిస్ పీసీ ఘోష్ కమిషన్ నివేదికపై ఉత్కంఠ
కేసీఆర్, హరీశ్‌రావు పిటిషన్లపై నేడు నిర్ణయం
రాజకీయ వర్గాల్లో ఆసక్తి రేపుతున్న జ‌డ్జిమెంట్‌
ప్రత్యామ్నాయంగా సుప్రీంకోర్టు వైపు పిటిషనర్లు?
కాకతీయ, హైదరాబాద్ : బీఆర్ ఎస్ ప్రభుత్వ హ‌యాంలో ప్ర‌తిష్ఠాత్మ‌కంగా చేపట్టిన కాళేశ్వరం ప్రాజెక్టు నిర్మాణంలో అక్రమాలు, బ్యారేజీ నిర్మాణాల్లో వైఫల్యాలు ఉన్నాయంటూ జస్టిస్ పీసీ ఘోష్ కమిషన్ ఇచ్చిన నివేదికను సవాలు చేస్తూ దాఖలైన పిటిషన్లపై తెలంగాణ హైకోర్టు బుధవారం కీలక తీర్పును వెలువరించనుంది. ప్రధాన న్యాయమూర్తి జస్టిస్ అలోక్ అరాధే నేతృత్వంలోని ధర్మాసనం ఈ పిటిషన్లపై తన నిర్ణయాన్ని ప్రకటించనుంది. మాజీ ముఖ్యమంత్రి కేసీఆర్, మాజీ మంత్రి హరీశ్‌రావుతో పాటు సీనియర్ అధికారులు స్మితా సబర్వాల్, ఎస్.కె. జోషి ఈ నివేదికను రద్దు చేయాలని కోరుతూ కోర్టును ఆశ్రయించిన విషయం తెలిసిందే.
నివేదిక ఏకపక్షమని పిటిషనర్ల వాద‌న
మేడిగడ్డ, అన్నారం, సుందిళ్ల బ్యారేజీల వైఫల్య‌మంటూ కమిషన్ రూపొందించిన నివేదిక ఏకపక్షంగా ఉందని పిటిషనర్లు వాదిస్తున్నారు. కమిషన్ తమ వాదనలను సరిగ్గా వినలేదని, రాజకీయ కక్షసాధింపులో భాగంగానే ఈ నివేదికను సిద్ధం చేశారని బీఆర్ ఎస్ ముఖ్య నేతలు ఆరోపించారు. ప్రభుత్వం నియమించిన ఈ కమిషన్ ఇప్పటికే దాదాపు 600 పేజీల నివేదికను సమర్పించగా, అందులో ప్రాజెక్టు వైఫల్యాలకు నాటి ప్రభుత్వ పెద్దలను బాధ్యులుగా పేర్కొంది. ఈ నివేదిక ఆధారంగా ప్రభుత్వం తదుపరి చర్యలకు సిద్ధమవుతున్న తరుణంలో హైకోర్టు తీర్పు అత్యంత ప్రాధాన్యత సంతరించుకుంది.
తీర్పుపై సర్వత్రా ఉత్కంఠ
ఏప్రిల్ 8నే తీర్పు రావాల్సి ఉన్నప్పటికీ, కొన్ని అనివార్య కారణాల వల్ల కోర్టు దానిని బుధ‌రానికి వాయిదా వేసింది. ఒకవేళ హైకోర్టు తీర్పు పిటిషనర్లకు వ్యతిరేకంగా వస్తే, తక్షణమే సుప్రీంకోర్టును ఆశ్రయించేందుకు కేసీఆర్ మరియు ఇతర నేతలు సిద్ధమవుతున్నట్లు తెలుస్తోంది. ఈ తీర్పు రాష్ట్ర రాజకీయాల్లో ఎలాంటి మార్పులకు దారితీస్తుందోనని అటు అధికార కాంగ్రెస్, ఇటు ప్రతిపక్ష బీఆర్ఎస్ శ్రేణులు ఆసక్తిగా ఎదురుచూస్తున్నాయి.
తీర్పు ప్రభావం ఎలా ఉండబోతోంది?
ఈరోజు వెలువడనున్న హైకోర్టు తీర్పు తెలంగాణ రాజకీయాల్లో పెను సంచలనంగా మారే అవకాశం ఉంది. ఒకవేళ కోర్టు కమిషన్ నివేదికను సమర్థిస్తే, విచారణ ఎదుర్కొంటున్న బీఆర్ఎస్ అగ్రనేతలకు చట్టపరంగా పెద్ద చిక్కులు ఎదురవుతాయి. ఇది రానున్న ఎన్నికల వేళ ప్రతిపక్షానికి నైతికంగా గట్టి దెబ్బ కానుంది. మరోవైపు, కోర్టు నివేదికలో లోపాలను ఎత్తిచూపితే మాత్రం.. కాంగ్రెస్ ప్రభుత్వం చేపట్టిన విచారణ ప్రక్రియపై ప్రతిపక్షాలు మరింత దాడి చేసే అవకాశం ఉంటుంది. ఏదేమైనా ఈ తీర్పు కాళేశ్వరం ప్రాజెక్టు భవిష్యత్తును మరియు రాష్ట్రంలోని అగ్రనేతల రాజకీయ భవితవ్యాన్ని శాసించే కీలక మలుపు కానుంది.
