గ్రామాల అభివృద్ధే లక్ష్యం.. కిష్టంపేటకు మరిన్ని నిధులు తెస్తా!

గ్రామాల అభివృద్ధే లక్ష్యం.. కిష్టంపేటకు మరిన్ని నిధులు తెస్తా!

రూ.20 లక్షలతో నూతన గ్రామ పంచాయతీ భవనానికి భూమిపూజ

ప్రభుత్వ విప్, వేములవాడ ఎమ్మెల్యే ఆది శ్రీనివాస్

కాకతీయ,చందుర్తి: గ్రామాల అభివృద్ధే లక్ష్యంగా, రాజకీయాలకు అతీతంగా ప్రజలకు సంక్షేమ ఫలాలు అందించేందుకు కృషి చేస్తున్నామని రాష్ట్ర ప్రభుత్వ విప్, వేములవాడ ఎమ్మెల్యే ఆది శ్రీనివాస్ అన్నారు. శుక్రవారం చందుర్తి మండలం కిష్టంపేట గ్రామంలో రూ.20 లక్షలతో నిర్మించనున్న నూతన గ్రామ పంచాయతీ భవనానికి ఆయన భూమిపూజ చేశారు.

ఈ సందర్భంగా ఆది శ్రీనివాస్ మాట్లాడుతూ.. కిష్టంపేటతో పాటు మండలంలోని ఇతర గ్రామాలకు అవసరమైన మౌలిక సదుపాయాలు, లింక్ రోడ్ల నిర్మాణానికి మరిన్ని నిధులు తీసుకొచ్చేందుకు కృషి చేస్తానని హామీ ఇచ్చారు. గ్రామాభివృద్ధిలో ప్రజాప్రతినిధులు, గ్రామ పెద్దలు, యువత సమష్టిగా భాగస్వాములు కావాలని పిలుపునిచ్చారు.

రైతుల సంక్షేమానికి పెద్దపీట

రైతులకు సాగునీరు, విద్యుత్, పంటల కొనుగోలు వంటి అంశాల్లో ప్రభుత్వం అండగా ఉంటుందని తెలిపారు. కిష్టంపేటలో సుమారు 90 శాతం మంది రైతులకు రుణమాఫీ ద్వారా ప్రయోజనం చేకూరిందని పేర్కొన్నారు. చెరువుల్లో నీటి నిల్వ సామర్థ్యాన్ని పెంచడం ద్వారా భూగర్భ జలాలు పెరిగి రైతులకు మేలు జరుగుతుందని అన్నారు.

పేదలకు ఇందిరమ్మ ఇళ్లు

నిరుపేదలకు ఇళ్ల కల్పనకు ప్రభుత్వం ప్రాధాన్యత ఇస్తోందని ఆది శ్రీనివాస్ తెలిపారు. గతంలో 3,500 ఇందిరమ్మ ఇళ్లను మంజూరు చేయగా, ప్రస్తుతం మరో 2,000 ఇళ్ల మంజూరు ప్రక్రియ కొనసాగుతోందని వివరించారు. అర్హులైన పేదలకు ఇళ్లను అందించేందుకు ప్రభుత్వం కృషి చేస్తోందన్నారు.

1995లో జిల్లా పరిషత్‌కు ఎన్నికైనప్పటి నుంచి ఈ ప్రాంత అభివృద్ధికి కృషి చేస్తున్నానని గుర్తుచేశారు. అభివృద్ధి అనేది నిరంతర ప్రక్రియ అని, గ్రామాల అవసరాలకు అనుగుణంగా డ్రైనేజీ, సీసీ రోడ్లు, తాగునీరు, విద్య, రహదారుల వంటి పనులను దశలవారీగా చేపట్టాల్సి ఉంటుందని తెలిపారు.

రాజకీయాలు ఎన్నికలకే పరిమితం కావాలని, గ్రామాభివృద్ధి విషయంలో పార్టీలు, కులాలు, మతాలకు అతీతంగా అందరూ కలిసి పనిచేయాలని ఆది శ్రీనివాస్ సూచించారు. గ్రామీణ ప్రాంతాల అభివృద్ధి, రైతుల సంక్షేమం, పేదలకు ఇళ్ల కల్పనే లక్ష్యంగా ప్రజాప్రభుత్వం ముందుకు సాగుతోందని పేర్కొన్నారు.