హైడ్రా చెరువుల చెంత బతుకమ్మ సందడి!
అభివృద్ధి చేసిన చెరువుల వద్ద మహిళల ఆటపాటలు
నీటితో నిండిన బేబీపాండ్‌లో బతుకమ్మల నిమజ్జనం
కాకతీయ, హైదరాబాద్: హైడ్రా అభివృద్ధి చేసిన చెరువులు బతుకమ్మ వేడుకలకు వేదికలుగా మారాయి. దేవి నవరాత్రి ఉత్సవాల్లో భాగంగా కూకట్‌పల్లి నల్లచెరువు, ఐడీఎల్‌ చెరువు, మాదాపూర్‌ సున్నం చెరువు, అంబర్‌పేట బతుకమ్మకుంట, ఉప్పల్‌ నల్లకుంట చెరువుల వద్ద మహిళలు పెద్ద సంఖ్యలో బతుకమ్మ ఆడుతూ సందడి చేశారు. కూకట్‌పల్లి నల్లచెరువులోని బేబీపాండ్‌ను నీటితో నింపడంతో మహిళలు బతుకమ్మలను అందులో నిమజ్జనం చేశారు. ఐడీఎల్‌ చెరువులో గణేశ్‌ నిమజ్జనాల కోసం ప్రత్యేకంగా తవ్విన చెరువు వైపు బతుకమ్మ ఆటలు ఉత్సాహంగా సాగాయి. అంబర్‌పేట బతుకమ్మకుంట, ఉప్పల్‌ నల్లకుంట చెరువుల వద్ద కూడా పండుగ సందడి కనిపించింది. కూకట్‌పల్లి నల్లచెరువు వద్ద హైడ్రా విపత్తు నిర్వహణ బృందం ఏర్పాట్లను పర్యవేక్షించడంతోపాటు మహిళలకు ఎలాంటి ఇబ్బందులు కలగకుండా బతుకమ్మలను చెరువులో నిమజ్జనం చేసేందుకు సహకరించింది. ఎల్‌నినో ప్రభావంతో వర్షాలు లేక చెరువుల్లో నీరు తగ్గిన పరిస్థితుల్లో హైడ్రా అభివృద్ధి చేసిన చెరువుల వద్ద ప్రత్యేక ఏర్పాట్లు చేయడం మహిళలకు ఊరటనిచ్చింది. గతంలో చెరువుల వద్ద బతుకమ్మ ఆడేందుకు అనువైన వాతావరణం ఉండేది కాదని, నిమజ్జనానికే పరిమితమయ్యేవారమని పలువురు మహిళలు పేర్కొన్నారు. ఇప్పుడు చెరువుల చెంత ఆటపాటలతో పండుగ జరుపుకోవడం ఆనందంగా ఉందని సంతోషం వ్యక్తం చేశారు.
