కొండాపూర్‌లో నీటి కోసం రాస్తారోకో
నీళ్ల బిందెలతో హుస్నాబాద్‌–కరీంనగర్ రహదారి దిగ్బంధం
ఫోర్‌లైన్‌ పనులతో పైపులు ధ్వంసం.. 10 రోజులుగా నీటి కష్టాలు
పంచాయతీ కార్యదర్శి అమృత వర్షిణి హామీతో ఆందోళన విరమణ
కాకతీయ, చిగురుమామిడి : కొండాపూర్‌ గ్రామంలో 10 రోజులుగా తాగునీటి సరఫరా లేకపోవడంతో ఆగ్రహించిన గ్రామస్తులు మంగళవారం కొండాపూర్‌ స్టేజీ వద్ద హుస్నాబాద్‌–కరీంనగర్ ప్రధాన రహదారిపై రాస్తారోకో నిర్వహించారు. ఫోర్‌లైన్‌ రోడ్డు విస్తరణ పనుల్లో భాగంగా జేసీబీలతో తవ్వకాలు చేపట్టడంతో నల్లా పైపులు ధ్వంసమయ్యాయని గ్రామస్తులు ఆరోపించారు. ఖాళీ బిందెలను రోడ్డుపై ఉంచి మహిళలు ఆందోళనకు దిగడంతో ఇరువైపులా వాహనాలు నిలిచిపోయాయి. బస్సులు గంటల తరబడి నిలిచిపోవడంతో ప్రయాణికులు ఇబ్బందులు పడ్డారు. సమాచారం అందుకున్న కొండాపూర్‌ గ్రామపంచాయతీ కార్యదర్శి అమృత వర్షిణి ఆందోళన స్థలానికి చేరుకుని గ్రామస్తులతో మాట్లాడారు. తాగునీటి సమస్యను తక్షణమే పరిష్కరించేందుకు ట్రాక్టర్ల ద్వారా నీటిని తెప్పించి ఇంటింటికీ సరఫరా చేయించారు. పైప్‌లైన్‌ మరమ్మతులు కూడా వెంటనే చేపట్టేలా చర్యలు తీసుకుంటామని, గ్రామంలో తాగునీటికి ఇబ్బంది లేకుండా చూస్తామని హామీ ఇచ్చారు. దీంతో గ్రామస్తులు రాస్తారోకోను విరమించారు. కార్యదర్శి సత్వర స్పందనపై గ్రామస్తులు హర్షం వ్యక్తం చేశారు.
