విద్యార్థులకు మెరుగైన విద్య, మౌలిక వసతులు కల్పించాలి
విద్యార్థుల సమస్యలను ప్రభుత్వం దృష్టికి తీసుకెళ్తా
బీజేపీ డిప్యూటీ ఫ్లోర్‌ లీడర్‌, ఎమ్మెల్సీ మల్క కొమరయ్య హామీ
కాకతీయ, మెదక్: విద్యార్థులకు నాణ్యమైన విద్యతోపాటు మెరుగైన మౌలిక వసతులు కల్పించేందుకు కృషి చేస్తానని తెలంగాణ శాసనమండలి బీజేపీ డిప్యూటీ ఫ్లోర్‌ లీడర్‌, ఎమ్మెల్సీ మల్క కొమరయ్య అన్నారు. మంగళవారం మెదక్ జిల్లా రామాయంపేటలోని కస్తూర్బా గాంధీ బాలికల గురుకుల పాఠశాల, మోడల్‌ స్కూల్‌, జిల్లా పరిషత్‌ పాఠశాలలను ఆయన సందర్శించారు. విద్యార్థులతో మమేకమై వారి విద్యాభ్యాసం, పాఠశాలల్లో అందుతున్న బోధన, ఎదుర్కొంటున్న సమస్యలను అడిగి తెలుసుకున్నారు. పాఠశాలల్లో తాగునీరు, పారిశుధ్యం, పరిసరాల పరిశుభ్రత, ఇతర మౌలిక వసతులను పరిశీలించారు. విద్యార్థులు ప్రశాంతమైన, పరిశుభ్రమైన వాతావరణంలో చదువుకునేలా అవసరమైన సౌకర్యాలు అందుబాటులో ఉండాలని సూచించారు. తన దృష్టికి వచ్చిన సమస్యలను ప్రభుత్వం, సంబంధిత శాఖల అధికారుల దృష్టికి తీసుకెళ్లి పరిష్కారానికి కృషి చేస్తానని తెలిపారు. ప్రభుత్వ పాఠశాలలు, కేజీబీవీలు, గురుకులాల్లో పనిచేస్తున్న బోధన, బోధనేతర సిబ్బంది సమస్యలను కూడా ప్రభుత్వం దృష్టికి తీసుకెళ్లి పరిష్కరించేందుకు తన వంతు కృషి చేస్తానని ఎమ్మెల్సీ మల్క కొమరయ్య పేర్కొన్నారు.
