ఎమ్మెల్యే నాయినికి కాంగ్రెస్‌ నేతల కృతజ్ఞతలు
కాజీపేటకు తెలంగాణ పబ్లిక్ స్కూల్‌ మంజూరుపై హ‌ర్షం
రూ.10 కోట్ల అంచనా వ్యయంతో పాఠశాల అభివృద్ధి
పేద, మధ్యతరగతి విద్యార్థులకు మెరుగైన విద్యావకాశాలు
కాకతీయ, కాజీపేట : కాజీపేటలో తెలంగాణ పబ్లిక్ స్కూల్‌ మంజూరుకు ప్రత్యేక చొరవ చూపిన వరంగల్ పశ్చిమ ఎమ్మెల్యే నాయిని రాజేందర్‌రెడ్డికి కాజీపేట కాంగ్రెస్‌ నాయకులు కృతజ్ఞతలు తెలిపారు. బుధవారం ఎమ్మెల్యేను కలిసి శాలువాతో సత్కరించారు. కాజీపేటలోని ప్రభుత్వ బాలుర ఉన్నత పాఠశాలను సుమారు రూ.10 కోట్ల అంచనా వ్యయంతో తెలంగాణ పబ్లిక్ స్కూల్‌గా అభివృద్ధి చేసేందుకు నిర్ణయం తీసుకోవడం సంతోషకరమని కాంగ్రెస్‌ నాయకులు అన్నారు. ఈ పాఠశాల ఏర్పాటుతో పేద, మధ్యతరగతి కుటుంబాల విద్యార్థులకు నాణ్యమైన విద్య అందుబాటులోకి వస్తుందని, ప్రాంతంలో విద్యారంగ అభివృద్ధికి దోహదపడుతుందని ఆశాభావం వ్యక్తం చేశారు. ముఖ్యమంత్రి ఎ. రేవంత్‌రెడ్డి నాయకత్వంలో రాష్ట్ర ప్రభుత్వం విద్యారంగ అభివృద్ధికి ప్రాధాన్యమిస్తూ ప్రజలకు ఉపయోగపడే నిర్ణయాలు తీసుకుంటోందని పేర్కొన్నారు. కాజీపేట అభివృద్ధితోపాటు ప్రజల అవసరాలను గుర్తించి పాఠశాల మంజూరుకు కృషి చేసిన ఎమ్మెల్యేకు కాజీపేట ప్రజలు, కాంగ్రెస్‌ పార్టీ తరఫున ప్రత్యేక కృతజ్ఞతలు తెలిపారు. భవిష్యత్తులోనూ ప్రాంత అభివృద్ధికి సహకరించాలని కోరారు. కార్యక్రమంలో హనుమకొండ బ్లాక్‌ కాంగ్రెస్‌ అధ్యక్షుడు మహమ్మద్‌ అంకుష్‌, జిల్లా కాంగ్రెస్‌ కార్యదర్శి పసునూరి మనోహర్‌, మాజీ కార్పొరేటర్‌ అబుబకర్‌, విజయశ్రీ రజాలి, సుంచు అశోక్‌, ఎన్‌ఎస్‌యూఐ మాజీ జాతీయ కోఆర్డినేటర్‌ రహమతుల్లా మహమ్మద్‌, 62వ డివిజన్‌ అధ్యక్షుడు పాలడుగుల ఆంజనేయులు, బుర్ర బాబురావు తదితరులు పాల్గొన్నారు.
