విదేశీ మద్యం ధరలు పెంపు
ఫుల్‌ బాటిల్‌పై రూ.30 నుంచి రూ.100 వరకు పెంపు
సగటున 6 శాతం మేర ధరల సవరణ
352 విదేశీ మద్యం బ్రాండ్ల ధరలకు మార్పులు
అక్టోబర్‌ 12 నుంచే కొత్త ధరలు అమల్లోకి
సవరించిన ధరలతోనే విక్రయాలు జరపాలని ప్రభుత్వం ఆదేశాలు
కాకతీయ,తెలంగాణ బ్యూరో : తెలంగాణలో విదేశీ మద్యం ధరలు పెరిగాయి. బ్రాండ్‌ను బట్టి ఫుల్‌ బాటిల్‌పై రూ.30 నుంచి రూ.100 వరకు ధరలు పెంచుతూ ప్రభుత్వం నిర్ణయం తీసుకుంది. సగటున 6 శాతం మేర ధరలను సవరించింది. ఇప్పటికే విక్రయిస్తున్న 352 విదేశీ మద్యం బ్రాండ్ల ధరలను సమీక్షించిన ప్రభుత్వం, టెండర్‌ కమిటీ సమర్పించిన నివేదిక, సిఫారసుల ఆధారంగా ఈ నిర్ణయం తీసుకుంది. అక్టోబర్‌ 12 నుంచే కొత్త ధరలు అమల్లోకి వచ్చినట్లు అధికారిక సర్క్యులర్‌ జారీ అయింది. దీంతో విదేశీ మద్యం కొనుగోలుదారులపై అదనపు భారం పడనుంది. రాష్ట్రంలో విక్రయిస్తున్న అన్ని విదేశీ మద్యం బ్రాండ్లకు ఒకే విధంగా ధరలు పెంచకుండా, బ్రాండ్‌ను బట్టి సవరణలు చేపట్టారు. ఫుల్‌ బాటిల్‌పై కనిష్ఠంగా రూ.30, గరిష్ఠంగా రూ.100 వరకు పెంపు ఉన్నట్లు తాజా ధరల వివరాలు సూచిస్తున్నాయి. సగటున 6 శాతం మేర ధరలు పెరగడంతో వినియోగదారులు ఇకపై ఆయా బ్రాండ్లను కొనుగోలు చేసేందుకు అదనంగా చెల్లించాల్సి ఉంటుంది.
ప్రీమియం బ్రాండ్లపై అదనపు భారం
ప్రధానంగా స్కాచ్‌, సింగిల్‌ మాల్ట్‌ విస్కీలు, ప్రీమియం వోడ్కా, జిన్‌, వైన్‌ వంటి దిగుమతి బ్రాండ్ల ధరల్లో పెంపు చోటుచేసుకుంది. మద్యం ధరల పెంపుపై కొంతకాలంగా చర్చలు జరుగుతుండగా, ప్రభుత్వం తాజాగా ధరల సవరణకు ఆమోదం తెలిపింది. టెండర్‌ కమిటీ నివేదికను పరిశీలించిన అనంతరం ఈ నిర్ణయం తీసుకున్నట్లు సమాచారం. అయితే, ఒక్కో బ్రాండ్‌కు సంబంధించిన పాత ధర, కొత్త ధరల పూర్తి వివరాలు అందుబాటులో ఉన్న ధరల జాబితా ఆధారంగా పరిశీలించాల్సి ఉంటుంది.
కొత్త ధరల ప్రకారమే విక్రయాలు
అక్టోబర్‌ 12 నుంచి డిపోల ద్వారా సరఫరా చేసే ప్రతి స్టాక్‌పై సవరించిన గరిష్ఠ చిల్లర ధరల స్టిక్కర్లు తప్పనిసరిగా వేయాలని తెలంగాణ రాష్ట్ర పానీయాల సంస్థ డిపో మేనేజర్లను ఆదేశించింది. వైన్స్‌, బార్ల యజమానులు కూడా కొత్త ధరల జాబితా ప్రకారమే విక్రయాలు జరపాలని స్పష్టం చేసింది. వినియోగదారులు మద్యం కొనుగోలు చేసే ముందు బాటిల్‌పై ముద్రించిన తాజా గరిష్ఠ చిల్లర ధరను పరిశీలించాలని అధికారులు సూచిస్తున్నారు. పాత ధరలతో విక్రయాలు జరగకుండా సవరించిన ధరల అమలుపై సంబంధిత యంత్రాంగం దృష్టి సారించింది.
