రాష్ట్రంలో విద్యుత్ సంక్షోంభం

రాష్ట్రంలో విద్యుత్ సంక్షోంభం
ప్రభుత్వ అనాలోచిత నిర్ణయాలే కారణం!
రైతుల పంటలు ఎండిపోతున్నా పట్టించుకోవడం లేదు
సింగరేణి బకాయిలు చెల్లించి బొగ్గు ఉత్పత్తి పెంచాలి
భూపాల‌ప‌ల్లి మాజీ ఎమ్మెల్యే గండ్ర వెంకట రమణారెడ్డి

కాకతీయ, భూపాలపల్లి : రాష్ట్రంలో నెలకొన్న విద్యుత్‌ సంక్షోభానికి ప్రభుత్వ ముందుచూపులేని నిర్ణయాలు, సరైన ప్రణాళిక లేకపోవడమే కారణమని మాజీ ఎమ్మెల్యే గండ్ర వెంకట రమణారెడ్డి విమర్శించారు. రైతులకు నాణ్యమైన విద్యుత్‌ అందించి, పంటలను కాపాడాలని ప్రభుత్వానికి చేతులు జోడించి విజ్ఞప్తి చేశారు. గురువారం భూపాలపల్లి జిల్లా కేంద్రంలోని బీఆర్‌ఎస్‌ పార్టీ కార్యాలయంలో నిర్వహించిన విలేకరుల సమావేశంలో ఆయన మాట్లాడారు. విద్యుత్‌ కొరతతో రైతులు తీవ్ర ఇబ్బందులు ఎదుర్కొంటున్నారని, మోటార్లు పనిచేయక సాగునీరు అందక పంట పొలాలు ఎండిపోతున్నాయని ఆవేదన వ్యక్తం చేశారు. గతంలో 70 లక్షల మెట్రిక్‌ టన్నుల ఉత్పత్తి సామర్థ్యం కలిగిన సింగరేణిలో బొగ్గు ఉత్పత్తి తగ్గడానికి ప్రభుత్వ విధానాలు, నిర్ణయాలు కారణమయ్యాయనే అంశాన్ని సమీక్షించాలని గండ్ర డిమాండ్‌ చేశారు. జెన్‌కో, ట్రాన్స్‌కో, విద్యుత్‌ ఉత్పత్తి సంస్థలు, సింగరేణి మధ్య సుమారు రూ.60 వేల కోట్ల బకాయిలు ఉన్నాయని, వీటి చెల్లింపుల్లో జాప్యం విద్యుత్‌ రంగంపై ప్రభావం చూపుతోందని ఆరోపించారు. ఓవర్‌బర్డెన్‌ టెండర్లలో రాజకీయ జోక్యం, అవినీతి ఆరోపణలపై సమగ్ర విచారణ జరిపి వాస్తవాలను ప్రజలకు వెల్లడించాలని కోరారు. చెల్పూర్‌ జెన్‌కో విద్యుత్‌ కేంద్రంలో సుమారు 1,100 మెగావాట్ల ఉత్పత్తి సామర్థ్యం ఉన్నప్పటికీ, ప్రస్తుతం 400 నుంచి 600 మెగావాట్ల మేరకే ఉత్పత్తి జరుగుతోందని పేర్కొన్నారు. థర్మల్‌ విద్యుత్‌ కేంద్రాలకు అవసరమైన బొగ్గును నిరంతరంగా సరఫరా చేయడంతోపాటు సింగరేణికి చెల్లించాల్సిన బకాయిలను వెంటనే చెల్లించాలని సూచించారు.

రైతుల పంటలను కాపాడాలి
గతంలో కేసీఆర్‌ ప్రభుత్వ హయాంలో రైతులకు 24 గంటల విద్యుత్‌ సరఫరా అందేదని గండ్ర గుర్తుచేశారు. ప్రస్తుతం విద్యుత్‌ అంతరాయాలతో ఫ్యూజులు కాలిపోవడం, ట్రాన్స్‌ఫార్మర్లు దెబ్బతినడం, మోటార్లు పనిచేయకపోవడం వంటి సమస్యలు ఎదురవుతున్నాయని అన్నారు. వరి పంటలకు కీలకమైన రాబోయే 15 రోజుల నుంచి నెల రోజుల వ్యవధిలో నిరంతర విద్యుత్‌ అందకపోతే రైతులు తీవ్రంగా నష్టపోయే ప్రమాదం ఉందని ఆందోళన వ్యక్తం చేశారు. విద్యుత్‌ డిమాండ్‌, ఉత్పత్తి, లోటుపై గత మూడునాలుగేళ్ల గణాంకాలతో సమగ్ర విశ్లేషణ చేసి, ముందస్తు కార్యాచరణ రూపొందించాలని కోరారు. థర్మల్‌, సౌర విద్యుత్‌ ఉత్పత్తిని అంచనా వేస్తూ, అవసరమైతే ఇతర రాష్ట్రాల నుంచి విద్యుత్‌ కొనుగోలు చేయాలని సూచించారు. అధికారులను సస్పెండ్‌ చేయడం, వారిపై ఆగ్రహం వ్యక్తం చేయడం వల్ల సమస్య పరిష్కారం కాదని స్పష్టం చేశారు. ఉమ్మడి వరంగల్‌ జిల్లాలో దేవాదుల ఎత్తిపోతల పథకానికి సరిపడా విద్యుత్‌ అందక మోటార్లు పనిచేయడం లేదని, సాగునీటితోపాటు తాగునీటి అవసరాలపైనా ప్రభావం పడే ప్రమాదం ఉందని గండ్ర తెలిపారు. దేవాదులకు పూర్తిస్థాయిలో విద్యుత్‌ సరఫరా చేయాలని డిమాండ్‌ చేశారు. రైతుల సమస్యలను పరిష్కరించకపోతే వారి పక్షాన ఉద్యమించి, రోడ్లపైకి వచ్చి ప్రభుత్వాన్ని నిలదీస్తామని హెచ్చరించారు.