చిరు వ్యాపారులపై దాడులు ఆపాలి
ట్రైసిటీలో ప్రత్యేక సంతలు, వెండింగ్‌ జోన్లు ఏర్పాటు చేయాలి
కూల్చివేతలతో నష్టపోయిన వారికి పరిహారం చెల్లించాలి
చిరు వ్యాపారుల జీవనోపాధిని కాపాడాలి
బీఆర్టీయూ జిల్లా అధ్యక్షుడు నాయిని రవి
చిరు వ్యాపార సంఘం జిల్లా అధ్యక్షుడు ఎండీ ఇస్మాయిల్‌
కాకతీయ, హనుమకొండ : చిరు వ్యాపారుల జీవనోపాధిని దెబ్బతీసే చర్యలను నిలిపివేసి, వారికి శాశ్వత పరిష్కారం చూపాలని బీఆర్టీయూ హనుమకొండ జిల్లా అధ్యక్షుడు నాయిని రవి, చిరు వ్యాపార సంఘం జిల్లా అధ్యక్షుడు ఎండీ ఇస్మాయిల్‌ డిమాండ్‌ చేశారు. హనుమకొండ, వరంగల్, కాజీపేట ట్రైసిటీలో చిరు వ్యాపారుల కోసం ప్రత్యేక సంతలు, వెండింగ్‌ జోన్లు ఏర్పాటు చేయాలని కోరారు. గురువారం బీఆర్ఎస్‌ జిల్లా కార్యాలయంలో మీడియాతో వారు మాట్లాడుతూ పండ్ల వ్యాపారుల దుకాణాల కూల్చివేతలతో అనేక కుటుంబాలు ఆర్థికంగా నష్టపోతున్నాయని ఆవేదన వ్యక్తం చేశారు. చిరు వ్యాపారులకు ప్రత్యామ్నాయ స్థలాలు కేటాయించి, వారి జీవనోపాధికి ఇబ్బందులు కలగకుండా ప్రభుత్వం చర్యలు తీసుకోవాలని సూచించారు. కూల్చివేతలతో నష్టపోయిన వ్యాపారులకు పరిహారం చెల్లించాలని డిమాండ్‌ చేశారు.
పెద్ద వ్యాపారులపై చర్యలు ఏవీ?
బీఆర్ఎస్‌ నాయకుడు ఎస్కే మహమూద్‌ మాట్లాడుతూ రోడ్లను ఆక్రమించిన పెద్ద వ్యాపారులపై చర్యలు తీసుకోకుండా చిరు వ్యాపారులనే లక్ష్యంగా చేసుకోవడం ఏమిటని ప్రశ్నించారు. మూడేళ్లుగా చిరు వ్యాపారులపై పలుమార్లు చర్యలు జరుగుతున్నా ఎమ్మెల్యే నాయిని రాజేందర్‌ రెడ్డి స్పందించడం లేదని విమర్శించారు. అధికారులే అన్ని చేస్తే ప్రజాప్రతినిధిగా ఎమ్మెల్యే బాధ్యత ఏమిటని ప్రశ్నించారు. నగరంలో మౌలిక సదుపాయాల సమస్యలను పరిష్కరించడంతో పాటు చిరు వ్యాపారుల జీవనోపాధిని కాపాడాలని నాయకులు డిమాండ్‌ చేశారు. ఈ కార్యక్రమంలో మాజీ కార్పొరేటర్‌ సోదా కిరణ్‌, చిరు వ్యాపార సంఘాల నాయకులు, బీఆర్ఎస్‌ నాయకులు పాల్గొన్నారు.
