అధికారికంగా ఒకచోట.. ఆచరణలో మరో చోట
– గ్రామీణ వైద్యానికి తూట్లు పొడుస్తున్న వైనం
– సన్నూరు ఆసుపత్రి రాయపర్తికి తరలింపు
– సౌకర్యాల లేమా? అధికారుల సౌలభ్యమా?
– రోగుల కష్టాలకు బాధ్యులెవరు?
– ఉన్నతాధికారులు స్పందించి చర్యలు తీసుకోవాలని సన్నూరు ప్రజల డిమాండ్
కాకతీయ,రాయపర్తి : గ్రామీణ ప్రాంత ప్రజలకు ఉచితంగా ఆయుర్వేద సాంప్రదాయ వైద్యాన్ని అందుబాటులోకి తీసుకురావాలనే ప్రభుత్వ ఆశయం అధికారుల అలసత్వంతో నీరుగారుతోంది.జాతీయ ఆయుష్ మిషన్(నామ్)కింద సన్నూరు గ్రామానికి మంజూరైన ప్రభుత్వ ఆయుష్మాన్ ఆరోగ్య మందిర్ అక్కడి నిరుపేదల ఆరోగ్య అవసరాలు తీర్చాలి.కానీ…నిబంధనలకు విరుద్ధంగా రాయపర్తి మండల కేంద్రంలో వైద్య సేవలు కొనసాగుతుండటంపై సన్నూరు గ్రామస్తులు తీవ్ర అసంతృప్తి,ఆగ్రహం వ్యక్తం చేస్తున్నారు.రికార్డుల ప్రకారం ఒకచోట మంజూరైన ఆసుపత్రి,ఆచరణలో మాత్రం మరోచోట నడిపిస్తున్నారని ఆరోపిస్తున్నారు.ఆసుపత్రి భవనం గోడపై గ్రామం:సన్నూరు,మండలం:రాయపర్తి అని స్పష్టంగా రాసి ఉన్నప్పటికీ,సేవలు మాత్రం మండల కేంద్రానికి పరిమితం కావడం అధికారుల బాధ్యతారాహిత్యానికి అద్దం పడుతోంది.ఈ క్రమంలో సన్నూరు గ్రామస్తులు,ముఖ్యంగా నిరుపేద రోగులు తీవ్ర ఇబ్బందులు ఎదుర్కోవాల్సి వస్తుందని ఆవేదన వ్యక్తం చేస్తున్నారు.
* ప్రజా ప్రయోజనాలు పక్కదారి?
సాధారణంగా గ్రామీణ ప్రాంత ప్రజలకు,ముఖ్యంగా నిరుపేదలకు ప్రాథమిక స్థాయిలోనే ప్రత్యామ్నాయ వైద్య సేవలు అందించడానికి ప్రభుత్వం నిర్దిష్ట గ్రామాలను ఎంపిక చేసి హెల్త్ సెంటర్లను మంజూరు చేస్తుంది.ఈ నేపథ్యంలోనే సన్నూరు గ్రామానికి ఈ ఆయుర్వేద వైద్యశాల కేటాయించబడింది.ఇదిలా ఉండగా… సన్నూరు ప్రజలకు అందించాల్సిన వైద్య ఫలాలను ఎవరి వెసులుబాటు కోసం,ఏ కారణాలతో మండల కేంద్రానికి తరలించారనే దానిపై సర్వత్రా విమర్శలు వస్తున్నాయి.అధికారులు తమ రోజూవారీ రాకపోకల సౌలభ్యం కోసమే ఆస్పత్రిని ఏకంగా రాయపర్తికి తరలించారనే ఆరోపణలు బలంగా వినిపిస్తున్నాయి.
* మందుల కోసం మండలానికి పరుగు..
సన్నూరు గ్రామానికి చెందిన వృద్ధులు,కూలీలకు తిప్పలు తప్పడం లేదు.చిన్నపాటి కీళ్ల నొప్పులు,జ్వరం, దీర్ఘకాలిక సమస్యల కోసం ఆయుర్వేద మందులు పొందాలంటే మండల కేంద్రానికి పరిగెత్తాల్సి వస్తుందని కంటతడి పెడుతున్నారు.తీరా ఆస్పత్రికి వెళ్లేసరికి మేడం లీవ్ లో ఉన్నారు అంటూ… సిబ్బంది సమాధానం చెప్పడం నిత్యకృత్యంగా మారిందని రోగులు ఆరోపిస్తున్నారు.అనారోగ్యంతో బాధపడుతూ,కూలి పనులు మానేసి,ఆటో చార్జీలు భరించి ఆసుపత్రికి వెళ్లేసరికి వైద్యులు గైర్వాజరు కావడంతో ఖాళీ చేతులతో వెనదురగాల్సి వస్తుందని బాధితులు ఆవేదన వ్యక్తం చేస్తున్నారు.వైద్యులు ఎప్పుడు ఉంటారో,ఎప్పుడు లీవ్ లో ఉంటారో తెలియక అయోమయానికి గురవుతున్నామని,అధికారుల పర్యవేక్షణ లోపించడం వల్లే ఈ పరిస్థితి దాపురించిందని స్థానికులు మండిపడుతున్నారు.
* ఆయుష్ వైద్యాధికారి గజవెల్లి ఉషారాణిని వివరణ కోరగా..
సన్నూరు గ్రామంలో ఆసుపత్రి నిర్వహణకు సరిపడా సౌకర్యాలు ఉన్నా..సొంత భవనం లేకపోవడం వల్లే తాత్కాలికంగా రాయపర్తి కేంద్రానికి తరలించామన్నారు.గ్రామంలో భవనం లేదా స్థలం అందుబాటులోకి వచ్చిన వెంటనే ఆసుపత్రిని తిరిగి సన్నూరు గ్రామానికి తరలిస్తామని ఆమె తెలిపారు.
* ఉన్నతాధికారులు స్పందించాలి… సన్నూరుకే ఆసుపత్రిని పునరుద్ధరించాలి
అధికారుల నిర్లక్ష్యంతో నిరుపేదలకు అందాల్సిన వైద్య ఫలాలు పక్క దారి పడుతున్నాయని,ఇప్పటికైనా జిల్లా కలెక్టర్,ఆయుష్ శాఖ జిల్లా ఉన్నతాధికారులు స్పందించి దీనిపై సమగ్ర విచారణ జరిపించాలి.తక్షణమే సన్నూరు గ్రామంలో ఆయుష్మాన్ ఆరోగ్య మందిర్ ను పునరుద్ధరించాలని గ్రామస్తులు విజ్ఞప్తి చేస్తున్నారు.
