రైతులకు మద్దతుగా ఈనెల 23న కలెక్టరేట్ ముందు బిజెపి ధర్నా
రైతుల సమస్యల పరిష్కారానికి పోరాటం
ధర్నాలో రైతులు, పార్టీ శ్రేణులు పెద్ద సంఖ్యలో పాల్గొనాలి
గంగాడి కృష్ణారెడ్డి
కాకతీయ,శంకరపట్నం: రైతులు ఎదుర్కొంటున్న సమస్యలను పరిష్కరించాలని డిమాండ్ చేస్తూ ఈ నెల 23న కరీంనగర్ జిల్లా కేంద్రంలోని కలెక్టరేట్ ఎదుట రైతులతో కలిసి బీజేపీ ఆధ్వర్యంలో ధర్నా నిర్వహించనున్నట్లు పార్టీ మాజీ జిల్లా అధ్యక్షుడు గంగాడి కృష్ణారెడ్డి తెలిపారు. శనివారం శంకరపట్నం మండల కేంద్రంలోని మాధవసాయి గార్డెన్స్‌లో బీజేపీ మండల అధ్యక్షుడు ఎనుగుల అనిల్ అధ్యక్షతన నిర్వహించిన మండల కార్యవర్గ సమావేశానికి ఆయన ముఖ్య అతిథిగా హాజరయ్యారు. ఈ సందర్భంగా కృష్ణారెడ్డి మాట్లాడుతూ రాష్ట్ర ప్రభుత్వ నిర్లక్ష్యం కారణంగా రైతులు తీవ్ర ఇబ్బందులు ఎదుర్కొంటున్నారని ఆరోపించారు. విద్యుత్ కొరత, సాగునీటి సమస్యలతో పంటలు ఎండిపోయే పరిస్థితి నెలకొందని పేర్కొన్నారు. రైతులకు జరుగుతున్న నష్టంపై రాష్ట్ర ప్రభుత్వం బాధ్యత వహించి, సమస్యల పరిష్కారానికి తక్షణ చర్యలు చేపట్టాలని డిమాండ్ చేశారు.
రైతుల సమస్యలపై బీజేపీ నిరంతరం పోరాటం చేస్తుందని ఆయన స్పష్టం చేశారు. ఈ నెల 23న కరీంనగర్ కలెక్టరేట్ ఎదుట నిర్వహించే ధర్నాలో శంకరపట్నం మండలం నుంచి రైతులు, పార్టీ నాయకులు, కార్యకర్తలు అధిక సంఖ్యలో పాల్గొని కార్యక్రమాన్ని విజయవంతం చేయాలని పిలుపునిచ్చారు. గ్రామస్థాయిలో పార్టీని మరింత బలోపేతం చేసేందుకు నాయకులు, కార్యకర్తలు సమన్వయంతో పనిచేయాలని సూచించారు. ఈ సమావేశంలో బీజేపీ జిల్లా అధికార ప్రతినిధి అలివేలు సమ్మిరెడ్డి, రాష్ట్ర కౌన్సిల్ సభ్యుడు దండు కొమురయ్య, సర్పంచ్ వెన్నేం మల్లేష్, నాయకులు దొంగల రాములు, జంగ జైపాల్, రామిడి ఆదిరెడ్డి, రాసమల్ల శ్రీనివాస్, మందాడి జగ్గారెడ్డి, కనకం సాగర్, బిజిలి సారయ్య, చెర్ల శ్రీనివాస్‌తో పాటు వివిధ మోర్చాల మండల అధ్యక్షులు, శక్తి కేంద్రాల ఇన్‌చార్జీలు, బూత్ అధ్యక్షులు, పార్టీ కార్యకర్తలు పాల్గొన్నారు.
