రాహుల్ గాంధీ అరెస్టు కేంద్ర నిరంకుశత్వానికి నిదర్శనం
డీసీసీ అధ్యక్షుడు అయూబ్
వరంగల్ లో జనసంద్రంగా ప్రజాస్వామ్య పరిరక్షణ పాదయాత్ర
కాకతీయ, వరంగల్ ప్రతినిధి : కాంగ్రెస్ అగ్రనేత, లోక్ సభ ప్రతిపక్ష నేత రాహుల్ గాంధీ అరెస్టు కేంద్ర ప్రభుత్వ నిరంకుశ వైఖరికి పరాకాష్ట అని వరంగల్ జిల్లా కాంగ్రెస్ కమిటీ అధ్యక్షుడు మహమ్మద్ అయూబ్ మండిపడ్డారు. ఏఐసీసీ, టీపీసీసీ ఆదేశాల మేరకు బుధవారం వరంగల్ లో ఇండియా కూటమి భాగస్వామ్యంతో నిర్వహించిన ప్రజాస్వామ్య పరిరక్షణ అఖిలపక్ష పాదయాత్రలో ఆయన మాట్లాడారు. పోచమ్మ మైదాన్ నుండి కాశీబుగ్గ అంబేద్కర్ సెంటర్ వరకు సాగిన ఈ పాదయాత్ర జనసంద్రంగా మారింది.
ఓటు చోరీపై విచారణ జరపాలి
ఈ సందర్భంగా అయూబ్ మాట్లాడుతూ, ప్రజాస్వామ్యంలో ఓటు హక్కు అత్యంత పవిత్రమైనదని అన్నారు. ఓటు చోరీ, ఎన్నికల అక్రమాలపై సమగ్ర విచారణ జరిపి వాస్తవాలను ప్రజల ముందుంచాలని, సీఈసీ జ్ఞానేష్ కుమార్ వెంటనే రాజీనామా చేయాలని డిమాండ్ చేశారు.
ప్రజాస్వామ్యాన్ని పరిరక్షించేందుకు, ఓటు హక్కును కాపాడే వరకు తమ పోరాటం కొనసాగుతుందని స్పష్టం చేశారు. ఈ పాదయాత్రలో పరకాల ఎమ్మెల్యే రేవూరి ప్రకాష్ రెడ్డి, వర్ధన్నపేట ఎమ్మెల్యే కె.ఆర్. నాగరాజు, పాలకుర్తి ఎమ్మెల్యే యశస్విని రెడ్డి, టీపీసీసీ ఉపాధ్యక్షురాలు ఝాన్సీ రెడ్డి, కుడా చైర్మన్ గుండు సుధారాణి, వామపక్ష నేతలు తక్కళ్లపల్లి శ్రీనివాసరావు, సత్యనారాయణ, నవీద్ తదితరులు పాల్గొన్నారు.
