రీజినల్‌ ఐ హాస్పిటల్‌ను తరలిస్తే సహించేది లేదు
ఉత్తర తెలంగాణ పేదలకు ఆసుపత్రి అండగా ఉంది
కొత్త సూపర్‌ స్పెషాలిటీ పేరుతో అన్యాయం చేయొద్దు
130 పడకల ఆసుపత్రిని బలోపేతం చేయాలి
వైద్యులు, సిబ్బంది, ఆధునిక పరికరాలు పెంచాలి
పేదల కంటి చూపుతో చెలగాటం ఆడితే పోరాటం
మాజీ ఎంపీ బోయినపల్లి వినోద్‌కుమార్‌
కాకతీయ, తెలంగాణ బ్యూరో : వరంగల్ రీజినల్‌ ఐ హాస్పిటల్‌ను ఎట్టి పరిస్థితుల్లోనూ తొలగించవద్దని, తరలించవద్దని, నిర్వీర్యం చేయవద్దని మాజీ ఎంపీ బోయినపల్లి వినోద్‌కుమార్‌ డిమాండ్‌ చేశారు. దశాబ్దాలుగా ఉత్తర తెలంగాణలోని లక్షలాది మంది పేదలకు కంటి వైద్యం అందిస్తున్న ఆసుపత్రిని బలహీనపరిచే నిర్ణయం తీసుకుంటే తీవ్రంగా ప్రతిఘటిస్తామని హెచ్చరించారు. సుమారు 36–38 ఏళ్ల క్రితం వరంగల్‌లో ఏర్పాటైన రీజినల్‌ ఐ హాస్పిటల్‌ ఉత్తర తెలంగాణ ప్రజలకు ప్రధాన కంటి వైద్య కేంద్రంగా మారిందని వినోద్‌కుమార్‌ తెలిపారు. ఆదిలాబాద్‌, మంచిర్యాల, పెద్దపల్లి, కరీంనగర్‌, జగిత్యాల, రాజన్న సిరిసిల్ల, వరంగల్, హనుమకొండ, మహబూబాబాద్‌, ములుగు, భూపాలపల్లి, ఖమ్మం, సూర్యాపేట, నిజామాబాద్‌ తదితర జిల్లాల నుంచి ప్రతిరోజూ వేలాది మంది వస్తున్నారని అన్నారు.
కొత్త ఆసుపత్రి పేరుతో అన్యాయం వద్దు
వృద్ధాప్య కంటి సమస్యలు, కేటరాక్ట్‌ తదితర సమస్యలకు పేదలకు ఇక్కడ వైద్యం అందుతోందని, పెద్ద సంఖ్యలో ఓపీ సేవలతో పాటు కంటి ఆపరేషన్లు జరుగుతున్నాయని పేర్కొన్నారు. సుమారు 130 పడకల సామర్థ్యం ఉన్న ఈ ఆసుపత్రిని కొత్త సూపర్‌ స్పెషాలిటీ ఆసుపత్రిలో విలీనం చేస్తారనే ప్రచారంపై ప్రభుత్వం స్పష్టత ఇవ్వాలని కోరారు. సంబంధిత అధికారులతో మాట్లాడగా రీజినల్‌ ఐ హాస్పిటల్‌ కొనసాగుతుందని, తొలగించే నిర్ణయం లేదని స్పష్టం చేసినట్లు వినోద్‌కుమార్‌ తెలిపారు. అయితే ప్రస్తుతం ఒక మాట చెప్పి భవిష్యత్తులో మరో నిర్ణయం తీసుకోవద్దని, ఆసుపత్రిని యథాతథంగా కొనసాగిస్తామని ప్రభుత్వం స్పష్టమైన హామీ ఇవ్వాలని డిమాండ్‌ చేశారు.
రీజినల్‌ ఐ హాస్పిటల్‌కు అవసరమైన వైద్యులు, సిబ్బందిని నియమించాలని, ఆధునిక కంటి వైద్య పరికరాలు సమకూర్చాలని, పడకల సంఖ్య పెంచాలని కోరారు. కంటి ఆపరేషన్ల సామర్థ్యాన్ని పెంచి ఉత్తర తెలంగాణ జిల్లాల నుంచి వచ్చే పేదలకు మెరుగైన సేవలు అందించాలని సూచించారు. రీజినల్‌ ఐ హాస్పిటల్‌ కేవలం భవనం లేదా ఆసుపత్రి సమస్య కాదని, ఉత్తర తెలంగాణలోని లక్షలాది మంది పేదల కంటి చూపు సమస్య అని వినోద్‌కుమార్‌ అన్నారు. దశాబ్దాలుగా పేదలకు వైద్య సేవలు అందిస్తున్న ఆసుపత్రిని నిర్వీర్యం చేసే ప్రయత్నం జరిగితే బీఆర్ఎస్ ప్రజల తరఫున గట్టిగా పోరాడుతుందని స్పష్టం చేశారు.
