వ‌రంగ‌ల్‌ను ముక్క‌లు చేశారు
జిల్లా విభజనతో పదేళ్లుగా ప్రజలకు తిప్పలు
అశాస్త్రీయ నిర్ణయాలతో చారిత్రక నగర అస్తిత్వానికి దెబ్బ
ఒకే నగరానికి రెండు జిల్లాల పాలనతో ప్రజలకు ఇబ్బందులు
డీసీసీ అధ్యక్షుడు ఇనగాల వెంకట్రామ్‌రెడ్డి ధ్వ‌జం
కాకతీయ, వరంగల్ బ్యూరో: ఉమ్మడి వరంగల్ జిల్లాను శాస్త్రీయ ప్రణాళిక లేకుండా విభజించి పదేళ్లు పూర్తయినా ప్రజల సమస్యలు పరిష్కారం కాలేదని హనుమకొండ జిల్లా కాంగ్రెస్‌ కమిటీ అధ్యక్షుడు ఇనగాల వెంకట్రామ్‌రెడ్డి విమర్శించారు. పరిపాలనా వికేంద్రీకరణ పేరుతో గత బీఆర్ఎస్‌ ప్రభుత్వం తీసుకున్న నిర్ణయాలు వరంగల్ చారిత్రక అస్తిత్వాన్ని దెబ్బతీశాయని మండిపడ్డారు. జిల్లా విభజనకు పదేళ్లు పూర్తయిన సందర్భంగా శనివారం ఎమ్మెల్యే నాయిని రాజేందర్‌రెడ్డి నేతృత్వంలో కాంగ్రెస్‌ పార్టీ, ప్రజా సంఘాలు నగరంలో భారీ నిరసన ర్యాలీ నిర్వహించి కేసీఆర్‌ దిష్టిబొమ్మను దహనం చేశాయి. వరంగల్, హనుమకొండ ప్రాంతాలకు ఒకే సంస్కృతి, చారిత్రక వారసత్వం ఉన్నప్పటికీ వేర్వేరు జిల్లాలుగా విభజించడం వల్ల ప్రజలు ఇబ్బందులు ఎదుర్కొంటున్నారని ఇనగాల అన్నారు. రేషన్‌ కార్డులు, రెవెన్యూ రికార్డులు, భూముల రిజిస్ట్రేషన్లు, కుల ధ్రువీకరణ పత్రాల కోసం ఏ జిల్లా కార్యాలయాన్ని సంప్రదించాలో తెలియక అయోమయానికి గురవుతున్నారని పేర్కొన్నారు. కొత్త జిల్లాలకు అవసరమైన మౌలిక వసతులు, కార్యాలయ భవనాలు సకాలంలో ఏర్పాటు చేయకపోవడంతో సమస్యలు పెరిగాయని విమర్శించారు.
జయశంకర్‌ సార్‌ పేరు విషయంలోనూ తప్పిదం
తెలంగాణ సిద్ధాంతకర్త ప్రొఫెసర్‌ కొత్తపల్లి జయశంకర్‌ జన్మస్థలం ఆత్మకూరు మండలం అక్కంపేట గ్రామమని, ఆయనకు వరంగల్ ప్రాంతంతో విడదీయలేని అనుబంధం ఉందని ఇనగాల గుర్తుచేశారు. అలాంటి మహనీయుడి పేరు భూపాలపల్లి జిల్లాకు పెట్టే విషయంలో గత ప్రభుత్వం అనాలోచితంగా వ్యవహరించిందని విమర్శించారు. మహనీయుల పేర్లను జిల్లాలకు పెట్టడాన్ని స్వాగతిస్తున్నామని, అయితే వారి జన్మస్థలం, జీవిత అనుబంధం ఉన్న ప్రాంతాల చారిత్రక ప్రాధాన్యాన్ని విస్మరించరాదని అన్నారు. ఉమ్మడి వరంగల్ జిల్లాను ఆరు జిల్లాలుగా విభజించడం, అనంతరం ఉద్యోగుల సర్దుబాటు, స్థానికతకు సంబంధించిన సమస్యలతో యువతకు నష్టం జరిగిందని ఇనగాల ఆరోపించారు. పారిశ్రామిక రంగంలో ఆశించిన స్థాయిలో పరిశ్రమలు రాకపోవడంతో నిరుద్యోగ సమస్య కొనసాగుతోందన్నారు. స్థానిక యువతకు ఉపాధి అవకాశాలు కల్పించడంలో గత ప్రభుత్వం తగిన శ్రద్ధ చూపలేదని విమర్శించారు.
సూపర్‌ స్పెషాలిటీ ఆసుపత్రి నిర్మాణంలో జాప్యం
వరంగల్ సెంట్రల్‌ జైలును తొలగించి 24 అంతస్తులు, 2,000 పడకలతో సూపర్‌ స్పెషాలిటీ ఆసుపత్రి నిర్మిస్తామని గత బీఆర్ఎస్‌ ప్రభుత్వం ప్రకటించినా పనులు పూర్తి చేయడంలో జాప్యం జరిగిందని ఇనగాల విమర్శించారు. కాంగ్రెస్‌ ప్రభుత్వం అధికారంలోకి వచ్చిన తర్వాత ముఖ్యమంత్రి రేవంత్‌రెడ్డి ప్రత్యేక శ్రద్ధతో నిర్మాణ పనులను వేగవంతం చేసేందుకు చర్యలు చేపట్టారని తెలిపారు. నిధులు, అధునాతన వైద్య పరికరాలు, సిబ్బందిని అందుబాటులోకి తీసుకురావడంపై ప్రభుత్వం దృష్టి సారించిందన్నారు. కేసీఆర్‌ ప్రభుత్వ హయాంలో చేపట్టిన అభివృద్ధి పనుల్లో మిగిలిన వాటిని పూర్తి చేయడంలో ప్రస్తుత ప్రభుత్వం నిర్లక్ష్యం చేస్తోందని ఇనగాల ఆరోపించారు. ప్రజలకు పాలనను చేరువ చేయడంతో పాటు పరిపాలనా సమస్యలను పరిష్కరించి వరంగల్ సమగ్ర అభివృద్ధికి చర్యలు తీసుకోవాలని డిమాండ్‌ చేశారు. నగర చారిత్రక ప్రాధాన్యాన్ని, ప్రజల ప్రయోజనాలను కాపాడేందుకు కాంగ్రెస్‌ పార్టీ ప్రజా సంఘాలతో కలిసి పోరాటం కొనసాగిస్తుందని స్పష్టం చేశారు. ఈ నిరసన కార్యక్రమంలో వరంగల్ పశ్చిమ ఎమ్మెల్యే నాయిని రాజేందర్‌రెడ్డి, డీసీసీ అధ్యక్షుడు ఇనగాల వెంకట్రామ్‌రెడ్డితో పాటు రాష్ట్ర, జిల్లా స్థాయి కాంగ్రెస్‌ నాయకులు, వివిధ సంస్థల చైర్మన్లు, కుడా చైర్మన్‌, పీసీసీ సభ్యులు, జిల్లా కమిటీ ప్రతినిధులు, డివిజన్‌, మండల అధ్యక్షులు, అనుబంధ సంఘాల నాయకులు, సీనియర్‌ కాంగ్రెస్‌ నాయకులు, ప్రజా సంఘాల ప్రతినిధులు పాల్గొన్నారు.
