ఎల్‌నినో ఎఫెక్ట్‌.. విద్యుత్‌ వినియోగం డబుల్‌!
భూపాలపల్లి సర్కిల్‌లో పెరిగిన విద్యుత్‌ డిమాండ్‌
ట్రాన్స్‌ఫార్మర్లపై అధిక భారం.. నిరంతర సరఫరాకు ప్రత్యేక చర్యలు
టీజీఎన్‌పీడీసీఎల్‌ ఎస్‌ఈ ఎన్‌.సదానందం వెల్లడి
కాకతీయ, భూపాలపల్లి : ఎల్‌నినో వాతావరణ పరిస్థితులు, లోటు వర్షపాతం, సుదీర్ఘ ఎండలతో విద్యుత్‌ వినియోగం భారీగా పెరిగిందని టీజీఎన్‌పీడీసీఎల్‌ భూపాలపల్లి సర్కిల్‌ సూపరింటెండింగ్‌ ఇంజినీర్‌ ఎన్‌.సదానందం తెలిపారు. వ్యవసాయ మోటార్ల వినియోగంతో పాటు ఇళ్లలో ఏసీలు, కూలర్ల వాడకం పెరగడంతో విద్యుత్‌ పంపిణీ వ్యవస్థపై అదనపు భారం పడుతోందన్నారు. పెరిగిన డిమాండ్‌కు అనుగుణంగా నిరంతర విద్యుత్‌ సరఫరా అందించేందుకు ప్రత్యేక చర్యలు చేపట్టినట్లు అక్టోబర్‌ 13న విడుదల చేసిన ప్రకటనలో వెల్లడించారు. 2025తో పోలిస్తే 2026లో విద్యుత్‌ వినియోగం గణనీయంగా పెరిగిందని ఎస్‌ఈ వివరించారు. జూలై, ఆగస్టు నెలల్లో వినియోగం 33 శాతం పెరగగా, సెప్టెంబరులో 91 శాతం పెరుగుదల నమోదైనట్లు తెలిపారు. అక్టోబర్‌ 1 నుంచి 12 వరకు 26 శాతం పెరుగుదల ఉన్నట్లు పేర్కొన్నారు. సెప్టెంబరులో గరిష్ఠ విద్యుత్‌ డిమాండ్‌ 222.88 మెగావాట్లకు చేరిందన్నారు. అక్టోబర్‌లో రోజువారీ వినియోగం 2025లో 18.72 మిలియన్‌ యూనిట్లుగా ఉండగా, 2026లో 39.10 మిలియన్‌ యూనిట్లకు పెరిగినట్లు నివేదికలో పేర్కొన్నారు. భూగర్భ జలమట్టాలు తగ్గడంతో పంటలను కాపాడుకునేందుకు రైతులు మోటార్లను ఎక్కువసేపు నడుపుతున్నారని, అధిక ఉష్ణోగ్రతలతో గృహ, వాణిజ్య అవసరాలకు విద్యుత్‌ వినియోగం పెరిగిందని తెలిపారు. వ్యవసాయ ఫీడర్లకు మూడు ఫేజుల సరఫరా అందించే సమయంలో మోటార్లు ఒకేసారి ప్రారంభం కావడం వల్ల ట్రాన్స్‌ఫార్మర్లపై అదనపు ఒత్తిడి ఏర్పడుతోందన్నారు. అధిక ఉష్ణోగ్రతల కారణంగా ట్రాన్స్‌ఫార్మర్లలో సాంకేతిక వైఫల్యాలు సంభవించే అవకాశాలు పెరుగుతున్నాయని వివరించారు.
ట్రాన్స్‌ఫార్మర్ల మరమ్మతులకు ప్రత్యేక బృందాలు
విద్యుత్‌ సరఫరాలో అంతరాయాలను తగ్గించేందుకు డివిజన్‌, సర్కిల్‌, కార్పొరేట్‌ కార్యాలయాల్లో 24 గంటల కంట్రోల్‌ రూమ్‌లు ఏర్పాటు చేసినట్లు ఎస్‌ఈ తెలిపారు. ప్రత్యేక అధికారులు, నోడల్‌ అధికారులను నియమించి క్షేత్రస్థాయిలో పర్యవేక్షణ చేపట్టినట్లు పేర్కొన్నారు. ట్రాన్స్‌ఫార్మర్ల మరమ్మతులు, మార్పిడి, సరఫరా పునరుద్ధరణ పనులను వేగవంతం చేశామని, జిల్లా కేంద్రాల్లో మొబైల్‌ ట్రాన్స్‌ఫార్మర్లను సిద్ధంగా ఉంచామని తెలిపారు. ఫిర్యాదుల కోసం ట్రాన్స్‌ఫార్మర్లపై టోల్‌ఫ్రీ నంబర్‌ 1912ను ముద్రించినట్లు వివరించారు. డిసెంబర్‌ 2023 నుంచి సెప్టెంబర్‌ 2026 వరకు మూడు కొత్త 33/11 కేవీ సబ్‌స్టేషన్లు, 97.2 కిలోమీటర్ల 33 కేవీ లైన్లు, 457 కిలోమీటర్ల 11 కేవీ లైన్లు, 825 డిస్ట్రిబ్యూషన్‌ ట్రాన్స్‌ఫార్మర్లు, ఏడు పవర్‌ ట్రాన్స్‌ఫార్మర్లు ఏర్పాటు చేసినట్లు నివేదికలో పేర్కొన్నారు. మంజూరైన ఆరు కొత్త సబ్‌స్టేషన్లలో మూడు అందుబాటులోకి రాగా, మరో రెండు చార్జింగ్‌కు సిద్ధంగా ఉన్నాయని, ఒక సబ్‌స్టేషన్‌ పనులు పురోగతిలో ఉన్నాయని తెలిపారు. ఎనిమిది ఇంటర్‌లింకింగ్‌ లైన్లలో 80 కిలోమీటర్ల పనులు పూర్తయ్యాయని వివరించారు. విద్యుత్‌ నష్టాలను తగ్గించేందుకు సబ్‌స్టేషన్లు, ఫీడర్లపై కెపాసిటర్‌ బ్యాంకులు ఏర్పాటు చేసినట్లు పేర్కొన్నారు. వచ్చే వేసవిలో పెరగనున్న డిమాండ్‌ను దృష్టిలో ఉంచుకుని ఆరు సబ్‌స్టేషన్లు, ఏడు పవర్‌ ట్రాన్స్‌ఫార్మర్లు, ఆరు కొత్త 33 కేవీ ఫీడర్లు, 122 డిస్ట్రిబ్యూషన్‌ ట్రాన్స్‌ఫార్మర్లు, 600 కేవీఏ సామర్థ్యంతో 100 కెపాసిటర్‌ బ్యాంకుల ఏర్పాటు లక్ష్యంగా 2027 వేసవి కార్యాచరణ ప్రణాళిక అమలు చేస్తున్నట్లు ఎస్‌ఈ తెలిపారు.
