విద్యుత్ కోతలపై భగ్గుమన్న బీఆర్ఎస్
వేములవాడ సబ్‌స్టేషన్‌ ఎదుట రైతులతో కలిసి మహా ధర్నా
24 గంటల ఉచిత విద్యుత్ పునరుద్ధరించాలి
రైతుల పంటలు ఎండిపోతుంటే ప్రభుత్వం ఏం చేస్తోంది? – చల్మెడ లక్ష్మీనరసింహారావు
కాకతీయ, వేములవాడ: రాష్ట్రంలో విద్యుత్ కోతలు, సాగునీటి సమస్యలతో రైతులు తీవ్ర ఇబ్బందులు ఎదుర్కొంటున్నారని ఆరోపిస్తూ బీఆర్ఎస్ పార్టీ ఆధ్వర్యంలో శనివారం రాజన్న సిరిసిల్ల జిల్లా వేములవాడలో మహా ధర్నా నిర్వహించారు. పట్టణంలోని చెక్కపల్లి రహదారిలో బీసీ హాస్టల్‌ సమీప సబ్‌స్టేషన్‌ ఎదుట జరిగిన ఈ ఆందోళనలో బీఆర్ఎస్ నియోజకవర్గ ఇన్‌ఛార్జి చల్మెడ లక్ష్మీనరసింహారావు పాల్గొని కాంగ్రెస్ ప్రభుత్వ తీరుపై తీవ్రస్థాయిలో విమర్శలు గుప్పించారు. రైతులు, పార్టీ నాయకులు, కార్యకర్తలు పెద్ద సంఖ్యలో పాల్గొని విద్యుత్ కోతలకు వ్యతిరేకంగా నినాదాలు చేశారు.
24 గంటల ఉచిత విద్యుత్ అందించడంలో కాంగ్రెస్ ప్రభుత్వం విఫలం!
ఈ సందర్భంగా చల్మెడ లక్ష్మీనరసింహారావు మాట్లాడుతూ.. కేసీఆర్‌ ప్రభుత్వ హయాంలో రైతులకు అందించిన 24 గంటల ఉచిత విద్యుత్‌ను కొనసాగించడంలో ప్రస్తుత కాంగ్రెస్ ప్రభుత్వం విఫలమైందని విమర్శించారు. విద్యుత్ కోతల కారణంగా వ్యవసాయ మోటార్లు సక్రమంగా పనిచేయక, పంటలకు సాగునీరు అందక రైతులు తీవ్ర నష్టాలను ఎదుర్కొంటున్నారని ఆవేదన వ్యక్తం చేశారు. ఎల్‌నినో ప్రభావం ఉంటుందనే హెచ్చరికలు ఉన్నప్పటికీ ప్రభుత్వం ముందస్తు చర్యలు తీసుకోలేదని ఆరోపించారు.
రాజకీయ కక్షతోనే సాగునీటి ప్రాజెక్టుల నిర్లక్ష్యం: చల్మెడ
రాష్ట్రంలో నీటి లభ్యత, విద్యుత్ ఉత్పత్తి అవకాశాలు ఉన్నప్పటికీ వాటిని సమర్థంగా వినియోగించుకోవడంలో ప్రభుత్వం నిర్లక్ష్యం వహిస్తోందని చల్మెడ ఆరోపించారు. కాళేశ్వరం ప్రాజెక్టు ద్వారా సాగునీటిని అందించే అవకాశాలున్నా ప్రభుత్వం తగిన చర్యలు తీసుకోవడం లేదని విమర్శించారు. థర్మల్‌ విద్యుత్ కేంద్రాల నిర్వహణలో లోపాలే ప్రస్తుత విద్యుత్ సమస్యలకు కారణమని ఆయన పేర్కొన్నారు.
కళ్ల ముందే ఎండిపోతున్న పంటలు.. స్పందించని ప్రజాప్రతినిధులు!
వేములవాడ నియోజకవర్గంలోని కోనరావుపేట, రుద్రంగి మండలాలతో పాటు పలు గ్రామాల్లో విద్యుత్, సాగునీటి సమస్యలతో రైతులు ఇబ్బందులు పడుతున్నారని చల్మెడ అన్నారు. కష్టపడి సాగు చేసిన పంటలు చేతికొచ్చే సమయంలో ఎండిపోతుండటం రైతులను ఆందోళనకు గురిచేస్తోందని పేర్కొన్నారు. రైతుల సమస్యలపై స్థానిక కాంగ్రెస్ ప్రజాప్రతినిధులు, ఎమ్మెల్యే ఆది శ్రీనివాస్ స్పందించాలని డిమాండ్ చేశారు. నియోజకవర్గంలో విద్యుత్ సరఫరా పరిస్థితిపై శ్వేతపత్రం విడుదల చేయాలని కోరారు.
రైతుల పంటలను కాపాడేందుకు తక్షణ చర్యలు తీసుకోవాలి
రాబోయే మూడు నుంచి నాలుగు వారాల పాటు వ్యవసాయానికి ప్రతిరోజూ కనీసం ఆరు నుంచి ఎనిమిది గంటల పాటు నాణ్యమైన విద్యుత్ నిరంతరాయంగా సరఫరా చేయాలని చల్మెడ డిమాండ్ చేశారు. నీటి ఎత్తిపోతల పథకాలను పునరుద్ధరించి చెరువులు, కుంటలను నింపాలని, గ్రామాల్లో తాగునీటి సమస్యలు తలెత్తకుండా ముందస్తు చర్యలు చేపట్టాలని కోరారు.
పోరాటాన్ని మరింత ఉధృతం చేస్తాం
రైతులకు ఇచ్చిన ఉచిత విద్యుత్ హామీని ప్రభుత్వం నిలబెట్టుకోవాలని చల్మెడ లక్ష్మీనరసింహారావు డిమాండ్ చేశారు. రైతుల సమస్యలను పరిష్కరించడంలో ప్రభుత్వం నిర్లక్ష్యం కొనసాగిస్తే బీఆర్ఎస్ పార్టీ రైతులకు అండగా నిలిచి ప్రజాస్వామ్యబద్ధంగా పోరాటాలను మరింత ఉధృతం చేస్తుందని హెచ్చరించారు.
