ఇకపై ‘మీ ప్రమాణం’ యాప్‌లోనే హాజరు
వచ్చే వారం నుంచి తప్పనిసరి అమలు
జిల్లా కలెక్టర్‌ రాహుల్‌ శర్మ ఆదేశం
కాకతీయ, వరంగల్ : జిల్లాలోని అన్ని ప్రభుత్వ శాఖల అధికారులు, సిబ్బంది ఇకపై ‘మీ ప్రమాణం’ యాప్‌ ద్వారానే హాజరు నమోదు చేయాలని జిల్లా కలెక్టర్‌ రాహుల్‌ శర్మ ఆదేశించారు. ప్రభుత్వ సేవల్లో పారదర్శకత, సమయపాలన, జవాబుదారీతనం పెంచే లక్ష్యంతో ఈ విధానాన్ని వచ్చే వారం నుంచి తప్పనిసరిగా అమలు చేయనున్నట్లు తెలిపారు. సోమవారం ఐడీఓసీ సమావేశపు హాలులో ‘మీ ప్రమాణం’ హాజరు యాప్‌ వినియోగంపై జిల్లా అధికారులతో నిర్వహించిన సమీక్షలో కలెక్టర్‌ మాట్లాడారు. జిల్లా స్థాయి నుంచి క్షేత్రస్థాయి వరకు పనిచేస్తున్న ప్రతి అధికారి, ఉద్యోగి యాప్‌లో హాజరు నమోదు చేయాల్సి ఉంటుందని స్పష్టం చేశారు. ప్రభుత్వం ద్వారా వేతనాలు పొందుతున్న ప్రతి ఉద్యోగి తప్పనిసరిగా యాప్‌ను వినియోగించాలని సూచించారు. యాప్‌ వినియోగం, హాజరు నమోదు ప్రక్రియపై ఈడీఎం శ్రీకాంత్‌ అధికారులకు అవగాహన కల్పించారు. సాంకేతిక సమస్యలు, సందేహాలు ఉంటే ఈడీఎంను సంప్రదించాలని కలెక్టర్‌ సూచించారు. సమావేశంలో అదనపు కలెక్టర్‌ అశోక్‌కుమార్‌, డీఆర్వో వసంతకుమారి, ఆర్డీఓ హరికృష్ణ, శిక్షణ డిప్యూటీ కలెక్టర్‌ నవీన్‌రెడ్డి, ఈడీఎం శ్రీకాంత్‌, వివిధ శాఖల జిల్లా అధికారులు పాల్గొన్నారు.
