ట్రాన్స్‌జెండర్లకు ఉపాధి అవకాశాలు కల్పించాలి
వివక్షను తొలగించి గౌరవంగా జీవించేలా సహకరించాలి
జిల్లా న్యాయ సేవాధికార సంస్థ కార్యదర్శి కందుకూరి పూజ
కాకతీయ, హనుమకొండ : సమాజంలో ట్రాన్స్‌జెండర్‌ వ్యక్తులపై వివక్షను తొలగించి, వారికి గౌరవప్రదమైన జీవనం అందించేందుకు ఉపాధి, ఉద్యోగ అవకాశాలు కల్పించాలని జిల్లా న్యాయ సేవాధికార సంస్థ కార్యదర్శి, సీనియర్‌ సివిల్‌ జడ్జి కందుకూరి పూజ అన్నారు. మంగళవారం సుబేదారిలోని అసంత భవన్‌లో ఎఫ్‌ఎంఎం సాంఘిక సేవా సంస్థ, మోడరన్‌ అవేర్‌నెస్‌ సొసైటీ, వరంగల్ పోలీస్‌ కమిషనరేట్‌ యాంటీ హ్యూమన్‌ ట్రాఫికింగ్‌ యూనిట్‌ ప్రైడ్‌ ప్లేస్‌ సంయుక్తంగా నిర్వహించిన అవగాహన కార్యక్రమానికి ఆమె ముఖ్య అతిథిగా హాజరయ్యారు. ట్రాన్స్‌జెండర్లపై వివక్ష కొనసాగడం బాధాకరమన్నారు. అర్హులైన వారికి ప్రభుత్వ శాఖలు, ఇతర సంస్థల్లో ఉద్యోగ అవకాశాలు కల్పించేందుకు అధికారులు, సమాజం సహకరించాలని కోరారు. నైపుణ్య శిక్షణ పొందుతూ స్వయం ఉపాధి మార్గాలను ఎంచుకోవాలని సూచించారు. హక్కులకు భంగం కలిగినా, వేధింపులకు గురైనా జిల్లా న్యాయ సేవాధికార సంస్థను ఆశ్రయిస్తే న్యాయ సహాయం అందిస్తామని తెలిపారు.
మానవ అక్రమ రవాణాపై అప్రమత్తంగా ఉండాలి
యాంటీ హ్యూమన్‌ ట్రాఫికింగ్‌ యూనిట్‌ ఇన్‌స్పెక్టర్‌, ట్రాన్స్‌జెండర్‌ ప్రొటెక్షన్‌ సెల్‌ ఇన్‌చార్జి ఓ. రమేష్‌ మాట్లాడుతూ ట్రాన్స్‌జెండర్ల హక్కుల పరిరక్షణకు ప్రైడ్‌ ప్లేస్‌ పనిచేస్తోందన్నారు. ప్రేమ, ఉపాధి పేరుతో అక్రమ రవాణాకు పాల్పడితే పోలీసులను సంప్రదించాలని సూచించారు. జిల్లా సంక్షేమ అధికారి కే. విశ్వజ మాట్లాడుతూ స్వయం ఉపాధికి ప్రభుత్వం వివిధ సంక్షేమ పథకాలు అమలు చేస్తోందన్నారు. కార్యక్రమంలో ఎఫ్‌ఎంఎం సాంఘిక సేవా సంస్థ డైరెక్టర్‌ సిస్టర్‌ సహాయ, ప్రాజెక్టు కోఆర్డినేటర్‌ ఎర్ర శ్రీకాంత్‌, ట్రాన్స్‌జెండర్‌ కమ్యూనిటీ నాయకురాలు లైలా, ఎస్సైలు శ్రావణి, సుధాకర్‌, ఏఎస్సై భాగ్యలక్ష్మి, కానిస్టేబుల్‌ రామారావు, ఇక్బాల్‌ పాషా, అజయ్‌కుమార్‌, కె. రవి తదితరులు పాల్గొన్నారు. ఉమ్మడి వరంగల్ జిల్లాకు చెందిన ట్రాన్స్‌జెండర్‌, గే, శివశక్తి కమ్యూనిటీలకు చెందిన సుమారు 160 మంది హాజరయ్యారు.
