రైస్‌మిల్లుకు అనుమతులు రద్దు చేయాలి
ఇళ్లకు ఆనుకుని మిల్లు నిర్మించొద్దంటూ గ్రామస్తుల ధర్నా
కాలుష్యం, ట్రాఫిక్‌ సమస్యలు తలెత్తుతాయని ఆందోళన
కాకతీయ, ఇనుగుర్తి : చిన్ననాగారం గ్రామంలో ఎర్రబెల్లిగూడెం రోడ్డుకు ఇళ్లకు ఆనుకుని నూతనంగా నిర్మిస్తున్న రైస్‌మిల్లుకు అనుమతులు ఇవ్వొద్దని, ఇప్పటికే ఏ శాఖ నుంచి అనుమతులు మంజూరై ఉంటే వాటిని రద్దు చేయాలని కోరుతూ గ్రామస్తులు మంగళవారం కేసముద్రం–నెల్లికుదురు ప్రధాన రహదారిపై ధర్నా నిర్వహించారు. సమాచారం అందుకున్న ఎస్సై నరేష్‌ అక్కడికి చేరుకుని గ్రామస్తులతో మాట్లాడటంతో వారు గ్రామపంచాయతీకి వెళ్లి నిరసన తెలిపారు. ఈ సందర్భంగా గ్రామస్తులు మాట్లాడుతూ రైస్‌మిల్లు నిర్మిస్తే శబ్ద, వాయు కాలుష్యంతోపాటు ధాన్యం రవాణా సమయంలో దుమ్ము, ధూళి సమస్యలు ఏర్పడతాయని ఆందోళన వ్యక్తం చేశారు. ధాన్యం కొనుగోలు సమయంలో పెద్ద సంఖ్యలో లారీలు రావడంతో సింగిల్‌ రోడ్డుపై ట్రాఫిక్‌ సమస్యలు తలెత్తుతాయని తెలిపారు. లారీలను నిలిపేందుకు కూడా స్థలం లేదన్నారు. ఇతర ప్రాంతాల నుంచి వచ్చే కార్మికుల వల్ల గ్రామంలో భద్రతాపరమైన సమస్యలు తలెత్తే అవకాశం ఉందని ఆందోళన వ్యక్తం చేశారు. గ్రామ ప్రజల క్షేమాన్ని దృష్టిలో ఉంచుకుని రైస్‌మిల్లుకు అనుమతులు ఇవ్వొద్దని గ్రామపంచాయతీ పాలకవర్గాన్ని, ఇప్పటికే అనుమతులు ఉంటే రద్దు చేయాలని అధికారులను కోరారు. కార్యక్రమంలో గుడాల లక్ష్మారెడ్డి, ఆలకుంట్ల సోమయ్య, బైరు రమేష్‌, బొబ్బల దేవరాజు, గుగులోతు నీలమ్మ, గుగులోతు జానీ, గుగులోతు లక్ష్మీ, గుగులోతు వెంకన్న, గుగులోతు ఫుల్‌సింగ్‌, గుడాల మహిపాల్‌రెడ్డి, వడపల్లి కొండయ్య, కొయ్యడి రమేష్‌ తదితరులు పాల్గొన్నారు.
