ట్రైనీ ఐపీఎస్‌ ఉదయ్‌ కృష్ణారెడ్డికి బెయిల్‌
67 రోజుల తర్వాత జైలు నుంచి విడుదలకు మార్గం
మహిళా ట్రైనీ ఐపీఎస్‌ ఫిర్యాదుతో నమోదైన కేసు
షరతులతో కూడిన బెయిల్‌ మంజూరు చేసిన ఉప్పర్‌పల్లి కోర్టు
అత్తాపూర్‌ పోలీసులు పలు సెక్షన్ల కింద కేసు నమోదు
ఆరోపణలు అవాస్తవమన్న ఉదయ్‌ కృష్ణారెడ్డి
కాకతీయ,తెలంగాణ బ్యూరో : మహిళా ట్రైనీ ఐపీఎస్‌ అధికారిణిని లైంగికంగా వేధించారన్న కేసులో జ్యుడీషియల్‌ రిమాండ్‌లో ఉన్న ట్రైనీ ఐపీఎస్‌ ఉదయ్‌ కృష్ణారెడ్డికి షరతులతో కూడిన బెయిల్‌ లభించింది. దాదాపు 67 రోజుల పాటు జైలులో ఉన్న ఆయనకు రంగారెడ్డి జిల్లా ఉప్పర్‌పల్లి కోర్టు మంగళవారం బెయిల్‌ మంజూరు చేసింది. నేషనల్‌ పోలీస్‌ అకాడమీలో శిక్షణ పొందుతున్న తోటి మహిళా ట్రైనీ ఐపీఎస్‌ అధికారిణి ఇచ్చిన ఫిర్యాదు ఆధారంగా అత్తాపూర్‌ పోలీసులు కేసు నమోదు చేసి ఆయనను అరెస్టు చేశారు. హైదరాబాద్‌లోని సర్దార్‌ వల్లభ్‌భాయ్‌ పటేల్‌ నేషనల్‌ పోలీస్‌ అకాడమీలో శిక్షణ పొందుతున్న సమయంలో ఈ వ్యవహారం చోటుచేసుకున్నట్లు ఫిర్యాదులో పేర్కొన్నారు. ప్రకాశం జిల్లాకు చెందిన ట్రైనీ ఐపీఎస్‌ ఉదయ్‌ కృష్ణారెడ్డిపై మహిళా ట్రైనీ ఐపీఎస్‌ అధికారిణి అత్తాపూర్‌ పోలీసులకు ఫిర్యాదు చేశారు. కేసు నమోదు చేసిన పోలీసులు ఆయనను అరెస్టు చేసి ఉప్పర్‌పల్లి కోర్టులో హాజరుపర్చగా, న్యాయస్థానం జ్యుడీషియల్‌ రిమాండ్‌ విధించింది. దీంతో ఆయనను చంచల్‌గూడ జైలుకు తరలించారు.
గదిలోకి లాక్కెళ్లి బెదిరించారని ఫిర్యాదు
జూలై 8న ఉదయ్‌ కృష్ణారెడ్డి తనను బలవంతంగా ఆయన గదిలోకి లాక్కెళ్లి భయభ్రాంతులకు గురిచేసి ఫోన్‌ పాస్‌వర్డ్‌ తీసుకున్నారని మహిళా ట్రైనీ ఐపీఎస్‌ అధికారిణి ఫిర్యాదులో పేర్కొన్నట్లు సమాచారం. జూలై 9న మరోసారి తనను జుట్టు పట్టుకుని ఆయన గదిలోకి లాక్కెళ్లి మెడపై కత్తి పెట్టి బెదిరించారని ఆరోపించారు. తనతో అసభ్యకరంగా ప్రవర్తించడంతోపాటు వ్యక్తిగత వీడియోలను చిత్రీకరించారని, వాటిని తన భర్తకు పంపి బెదిరింపులకు పాల్పడ్డారని ఫిర్యాదులో పేర్కొన్నారు. ఈ ఫిర్యాదు ఆధారంగా అత్తాపూర్‌ పోలీసులు పలు సెక్షన్ల కింద కేసు నమోదు చేశారు. తనపై వచ్చిన ఆరోపణలపై ఉదయ్‌ కృష్ణారెడ్డి గతంలో సామాజిక మాధ్యమం ఇన్‌స్టాగ్రామ్‌ ద్వారా స్పందించారు. తనపై వస్తున్న ఫిర్యాదులు, వదంతులు నిరాధారమైనవని, అవాస్తవాలని పేర్కొంటూ న్యాయం గెలుస్తుందని విశ్వసిస్తున్నట్లు తెలిపారు. అనంతరం బంధువుల ఇంటికి వెళ్లిన ఆయన ఆత్మహత్యాయత్నానికి పాల్పడినట్లు సమాచారం. బంధువులు వెంటనే ఆయనను ఆసుపత్రిలో చేర్పించారు. చికిత్స అనంతరం పోలీసులు అదుపులోకి తీసుకుని కోర్టులో హాజరుపర్చారు.
సుదీర్ఘ రిమాండ్‌ అనంతరం బెయిల్‌
కోర్టు రిమాండ్‌ విధించడంతో ఉదయ్‌ కృష్ణారెడ్డి చంచల్‌గూడ జైలులో ఉన్నారు. సుమారు 67 రోజుల పాటు జైలులో ఉన్న ఆయనకు తాజాగా ఉప్పర్‌పల్లి కోర్టు షరతులతో కూడిన బెయిల్‌ మంజూరు చేసింది. కేసులో తదుపరి న్యాయ ప్రక్రియ కొనసాగనుంది. కాగా, మహిళా ట్రైనీ ఐపీఎస్‌ అధికారిణి చేసిన ఆరోపణలు, వాటిపై నమోదైన కేసు, ఉదయ్‌ కృష్ణారెడ్డి స్పందన తదితర అంశాలపై దర్యాప్తు కొనసాగుతున్నట్లు సమాచారం.
