ఆయిల్‌పామ్ సాగును విస్తృతం చేయాలి..
*రైతులు శాస్త్రవేత్తల సూచనలు పాటిస్తూ పంటను కాపాడుకోవాలి
*వరంగల్ జిల్లా ఆయిల్ పామ్ రైతుల అవగాహన సదస్సులో కలెక్టర్ సత్య శారద..
కాకతీయ, గీసుగొండ: రైతులు ఆయిల్‌పామ్ పంటను విస్తృతంగా సాగు చేసుకోవాలని, పంట సాగులో శాస్త్రవేత్తల సూచనలు తప్పనిసరిగా పాటించాలని జిల్లా కలెక్టర్ డాక్టర్ సత్యశారద సూచించారు.మండలంలోని పీడీఆర్ ఫంక్షన్ హాలులో వరంగల్ జిల్లా ఆయిల్ పామ్ ఫార్మర్స్ అసోసియేషన్ అధ్యక్షుడు నంద్యాల కృష్ణారెడ్డి అధ్యక్షతన నిర్వహించిన జిల్లా ఆయిల్ పామ్ రైతుల అవగాహన సదస్సుకు కలెక్టర్ హాజరై మాట్లాడారు. ప్రస్తుత వాతావరణ పరిస్థితులను దృష్టిలో ఉంచుకుని శాస్త్రవేత్తల సూచనలు పాటిస్తూ పంటను సంరక్షించు కోవాలని రైతులకు సూచించారు.కేంద్ర, రాష్ట్ర ప్రభుత్వాలు ఆయిల్‌పామ్ సాగుకు అధిక ప్రాధాన్యం ఇస్తూ రైతులను ప్రోత్సహిస్తున్నాయని తెలిపారు.సదస్సులో ఐఐఓపీఆర్ శాస్త్రవేత్త డీవైఎం.వి. ప్రసాదరావు మాట్లాడుతూ ఆయిల్ పామ్ చెట్లకు నీరు, ఎరువులు,పశువుల ఎరువును క్రమం తప్పకుండా అందించాలని సూచించారు.మొక్క నాటినప్పటి నుంచి జీవితకాలం వరకు సరైన పోషణ అందించాలని, పోషణలో అంతరాయం ఏర్పడితే దిగుబడిపై తీవ్ర ప్రభావం పడుతుందని వివరించారు.యూట్యూబ్ వీడియోలు,కంపెనీల ప్రచారాలను చూసి సొంతంగా బయో ఎరువులు,మందులు వినియోగించకుండా శాస్త్రవేత్తల సలహాలు తీసుకోవాలని సూచించారు.మరో శాస్త్రవేత్త డీవీ ఎం.ఎస్.ఆర్.రాజు మాట్లాడుతూ ఆయిల్‌పామ్ చెట్లకు కార్టన్‌ అవసరమని, భూమిలోని పోషకాలను సమతుల్యం చేసి చెట్టుకు అందించడంలో ఇది కీలకపాత్ర పోషిస్తుందని తెలిపారు.జిల్లా ఉద్యానశాఖ అధికారి ఆర్. శ్రీనివాస రావు,గీసుగొండ ఆయిల్ ఆయిల్ ఫామ్ రైతు సంఘం అధ్యక్షుడు కోట్ర రఘుపతి రెడ్డితో పాటు ఆయిల్ పామ్ రైతు సంఘం నాయకులు, వివిధ మండలాల ప్రతినిధులు, సుమారు 450 మంది రైతులు పాల్గొన్నారు.
