వన్యప్రాణుల సంరక్షణలో ప్రజల భాగస్వామ్యం కీలకం
20,050 హెక్టార్ల అటవీ భూమిని తిరిగి స్వాధీనం
ఏటూరునాగారం ఎఫ్‌ఆర్‌వో రెహమాన్‌ పిలుపు
కాకతీయ, ఏటూరునాగారం : అడవులు, వన్యప్రాణులను కాపాడుకోవడంలో ప్రజలు, ప్రజాప్రతినిధులు, అధికారులు, మీడియా, మేధావులు సమష్టిగా భాగస్వాములు కావాలని ఏటూరునాగారం ఎఫ్‌ఆర్‌వో రెహమాన్‌ పిలుపునిచ్చారు. భవిష్యత్‌ తరాలకు స్వచ్ఛమైన పర్యావరణాన్ని అందించేందుకు అడవులను సంరక్షించాల్సిన బాధ్యత అందరిపైనా ఉందన్నారు. ములుగు జిల్లాలో సుమారు 87 శాతం అటవీ ప్రాంతం ఉందని, అడవుల కారణంగానే ప్రకృతి సమతుల్యత, వర్షపాతం, సహజ సౌందర్యం కొనసాగుతున్నాయని తెలిపారు. అక్రమ ఆక్రమణలకు అడ్డుకట్ట వేసేందుకు చర్యలు చేపట్టి, సుమారు 20,050 హెక్టార్ల నష్టపోయిన అటవీ భూమిని తిరిగి అటవీశాఖ ఆధీనంలోకి తీసుకునే ప్రక్రియ కొనసాగుతోందన్నారు. మరో 650 హెక్టార్లలో అటవీకరణ చేపట్టనున్నట్లు తెలిపారు. వేటగాళ్లకు అవగాహన కల్పించి వారిని వన్యప్రాణుల రక్షకులుగా మార్చుతున్నామని, గతేడాదితో పోలిస్తే వేట పరికరాలు గణనీయంగా తగ్గాయన్నారు. ప్లాస్టిక్‌ నిర్మూలన, నీటి వనరుల సంరక్షణ, వన్యప్రాణుల రహదారి ప్రమాదాల నివారణకు చర్యలు తీసుకుంటున్నామని వివరించారు. ప్రజల సహకారంతో అడవులను ముక్కలు కాకుండా కాపాడుకుందామని రెహమాన్‌ కోరారు.
