సైబర్ నేరాల నియంత్రణలో వరంగల్ పోలీసుల ప్రత్యేక చర్యలు..

సైబర్ నేరాల నియంత్రణలో వరంగల్ పోలీసుల ప్రత్యేక చర్యలు..

9 నెలల్లో 3,952 ఫిర్యాదులు.. 174 మంది నిందితుల అరెస్ట్..

బాధితులకు రూ.5.23 కోట్ల నగదు పునరుద్ధరణ..

సెప్టెంబర్‌లోనే రూ.49.56 లక్షలు బాధితులకు తిరిగి అందజేత..

కాకతీయ, వరంగల్ బ్యూరో : సైబర్ నేరాల నియంత్రణ, బాధితులకు సత్వర సహాయం అందించడం, మోసపోయిన నగదును రికవరీ చేయడం, నేరస్థులను గుర్తించి అరెస్టు చేయడంతో పాటు ప్రజల్లో సైబర్ భద్రతపై అవగాహన కల్పించేందుకు వరంగల్ పోలీస్ కమిషనరేట్ ప్రత్యేక చర్యలు చేపడుతోంది. ఇందులో భాగంగా సైబర్ నేరాలకు సంబంధించిన నెలవారీ పనితీరు నివేదికలను ఇకపై ప్రతి నెలా మీడియా ద్వారా వెల్లడించనున్నట్లు పోలీస్ కమిషనర్ తెలిపారు. ఈ ఏడాది జనవరి 1 నుంచి సెప్టెంబర్ 30 వరకు నేషనల్ సైబర్ క్రైమ్ రిపోర్టింగ్ పోర్టల్‌ (ఎన్ సీ ఆర్ పి ) ద్వారా వరంగల్ కమిషనరేట్ పరిధిలో మొత్తం 3,952 ఫిర్యాదులు అందాయి. వీటిలో 1,155 ఫిర్యాదులను పరిష్కరించారు. సైబర్ నేరాలకు సంబంధించి 105 కేసులను ఛేదించి 174 మంది నిందితులను అరెస్టు చేశారు. మిగిలిన ఫిర్యాదులపై దర్యాప్తు, తదుపరి చర్యలు కొనసాగుతున్నాయి. సైబర్ మోసాల కారణంగా బాధితులు సుమారు రూ.20.66 కోట్లు నష్టపోగా, రూ.5.23 కోట్ల నగదును బాధితులకు తిరిగి అందించడంలో పోలీసులు చర్యలు చేపట్టారు.

సమన్వయంతో ఫిర్యాదుల పరిష్కారం..

సమన్వయ వ్యవస్థ ద్వారా పోలీస్ స్టేషన్లకు పంపిన 983 అభ్యర్థనల్లో 866ను పూర్తి చేశారు. బ్యాంకింగ్ సంబంధిత సమస్యల పరిష్కారం కోసం జీఆర్‌ఎం పోర్టల్ ద్వారా ప్రజలు 104 ఫిర్యాదులు నమోదు చేయగా, వాటిలో 83 ఫిర్యాదులను పరిష్కరించారు. అదేవిధంగా ఎంఆర్‌ఎం ద్వారా బ్యాంకింగ్ సంబంధిత సమస్యలపై 789 అభ్యర్థనలు అందగా, 615 అభ్యర్థనలను పరిష్కరించారు. ఈ ప్రక్రియ ద్వారా బాధితులకు రూ.21.44 లక్షలు తిరిగి అందించారు. సైబర్ నేరస్థులను గుర్తించేందుకు చేపట్టిన అక్యూజ్డ్ ప్రొఫైలింగ్‌లో 116 అభ్యర్థనలను స్వీకరించి 100 శాతం పూర్తి చేశారు.

286 అవగాహన కార్యక్రమాలు.. సెప్టెంబర్‌లో 34 మంది అరెస్ట్..

ప్రజల్లో సైబర్ నేరాలపై అప్రమత్తత పెంచేందుకు జూన్, జూలై, ఆగస్టు నెలల్లో వరంగల్ కమిషనరేట్ పరిధిలో 286 సైబర్ అవగాహన కార్యక్రమాలు నిర్వహించారు. ప్రజలకు ఆన్‌లైన్ మోసాల తీరుతెన్నులు, బ్యాంకింగ్ మోసాలు, అనుమానాస్పద లింకులు, ఫోన్ కాల్స్ పట్ల తీసుకోవాల్సిన జాగ్రత్తలపై అవగాహన కల్పించారు. సెప్టెంబర్ 2026లో మాత్రమే ఎన్ సీ ఆర్ పి ద్వారా 483 సైబర్ ఫిర్యాదులు అందగా, వాటిలో 95 ఫిర్యాదులను పరిష్కరించి 10 ఎఫ్‌ఐఆర్‌లు నమోదు చేశారు. ఎం ఆర్ ఎం ద్వారా 285 అభ్యర్థనలు అందాయి. వీటిలో బాధితుల నగదుకు సంబంధించి రూ.50.87 లక్షలను పునరుద్ధరించదగిన మొత్తంగా గుర్తించగా, రూ.49.56 లక్షలను బాధితులకు తిరిగి అందించారు. అదే సమయంలో సైబర్ నేరాలకు పాల్పడిన 34 మంది నిందితులను వరంగల్ పోలీసులు అరెస్టు చేశారు.

1930కు వెంటనే ఫోన్ చేయాలి..

సైబర్ మోసానికి గురైన వెంటనే ఆలస్యం చేయకుండా 1930కు ఫోన్ చేసి, నేషనల్ సైబర్ క్రైమ్ రిపోర్టింగ్ పోర్టల్ ద్వారా ఫిర్యాదు చేయాలని వరంగల్ పోలీస్ కమిషనర్ ప్రజలకు సూచించారు. మోసం జరిగిన వెంటనే ఫిర్యాదు చేస్తే నగదును నిలుపుదల చేసి, బాధితులకు తిరిగి అందించే అవకాశం పెరుగుతుందని తెలిపారు. అప్రమత్తంగా ఉండండి, సైబర్ నేరాల నుంచి సురక్షితంగా ఉండండి అని పోలీసులు ప్రజలకు సూచించారు.