ఓటర్ల జాబితా సవరణ ప్రక్రియ వేగవంతం చేయాలి..
కాకతీయ, హనుమకొండ : ఓటర్ల జాబితా సవరణ, కొత్త ఓటర్ల నమోదు ప్రక్రియను పారదర్శకంగా, నిబంధనల ప్రకారం పూర్తి చేయాలని హనుమకొండ అదనపు కలెక్టర్ (రెవెన్యూ) ఎన్. రవి అధికారులను ఆదేశించారు. గురువారం సాయంత్రం హనుమకొండ కలెక్టరేట్‌లో గుర్తింపు పొందిన రాజకీయ పార్టీల ప్రతినిధులతో నిర్వహించిన ప్రత్యేక సమావేశానికి ఆయన అధ్యక్షత వహించారు. ఈ సందర్భంగా ఓటర్ల జాబితా సవరణ, క్లెయిమ్‌లు, అభ్యంతరాలు, కొత్త ఓటర్ల నమోదు ప్రక్రియకు సంబంధించిన వివరాలను వెల్లడించారు. క్లెయిమ్‌లు, అభ్యంతరాల దాఖలుకు గడువు అక్టోబర్ 7తో ముగిసిందని తెలిపారు. ప్రస్తుతం ఫారం-6, 7, 8లకు సంబంధించి మొత్తం 14,856 దరఖాస్తులు పరిశీలనలో ఉన్నాయని పేర్కొన్నారు. స్పెషల్ ఇంటెన్సివ్ రివిజన్ (ఎస్‌ఐఆర్) ప్రకారం 104-పరకాల, 105-వరంగల్ పశ్చిమ శాసనసభ నియోజకవర్గాల పరిధిలో మొత్తం 4,07,317 మంది ఓటర్లు ఉన్నట్లు వివరించారు. వీరిలో అవసరమైన ఆధార పత్రాలు సమర్పించి విచారణకు హాజరు కావాల్సిందిగా 1,32,062 మంది ఓటర్లకు నోటీసులు జారీ చేసినట్లు తెలిపారు. మొత్తం ఓటర్లలో 3,83,165 మంది వివరాలను తుది ప్రచురణకు సిద్ధంగా ఉంచామని, విచారణలో 689 మందిని అనర్హులుగా గుర్తించినట్లు వెల్లడించారు. మిగిలిన 23,463 దరఖాస్తులు ప్రస్తుతం పరిశీలనలో ఉన్నాయని, వీటన్నింటినీ నవంబర్ 5, 2026లోపు పరిష్కరిస్తామని అదనపు కలెక్టర్ స్పష్టం చేశారు. ఓటర్ల జాబితా సవరణ ప్రక్రియలో రాజకీయ పార్టీల ప్రతినిధులు తమ సూచనలు, అభ్యంతరాలను సంబంధిత అధికారుల దృష్టికి తీసుకురావాలని సూచించారు.
పట్టభద్రుల ఓటర్ల నమోదుకు విస్తృత ప్రచారం..
వరంగల్-ఖమ్మం-నల్గొండ పట్టభద్రుల నియోజకవర్గానికి సంబంధించి కొత్త ఓటర్ల జాబితా తయారీలో భాగంగా ఇప్పటివరకు 11,731 ఫారం-18 దరఖాస్తులు అందినట్లు ఎన్. రవి తెలిపారు. వీటిపై ప్రస్తుతం క్షేత్రస్థాయి పరిశీలన కొనసాగుతోందన్నారు. 2024లో ఈ నియోజకవర్గ పరిధిలో 43,729 మంది పట్టభద్రులు ఓటర్లుగా నమోదైనట్లు గుర్తుచేశారు. ఈసారి కూడా అర్హత కలిగిన ప్రతి పట్టభద్రుడు ఓటరుగా నమోదు అయ్యేలా రాజకీయ పార్టీలు తమ శ్రేణుల ద్వారా విస్తృతంగా అవగాహన కల్పించాలని కోరారు. అర్హులైన పట్టభద్రులు తప్పనిసరిగా ఓటరుగా నమోదు చేసుకునేలా సహకరించాలని సూచించారు. సమావేశంలో బీజేపీకి చెందిన రావు అమరేందర్ రెడ్డి, సీపీఐ(ఎం)కు చెందిన జి. ప్రభాకర్ రెడ్డి, బీఆర్‌ఎస్‌కు చెందిన బి. ప్రవీణ్ కుమార్, టీడీపీకి చెందిన కె. శ్యామ్ సుందర్, ఎంఐఎంకు చెందిన సయ్యద్ ఫైజుల్లా పాల్గొన్నారు.
