కాజీపేటలో కాంగ్రెస్ నేత‌ల సంబరాలు
తెలంగాణ పబ్లిక్ స్కూల్ మంజూరుపై హ‌ర్షం
రూ.10 కోట్ల అంచనా వ్యయంతో పాఠశాల మంజూరు
బాణాసంచా కాల్చి, స్వీట్లు పంపిణీ చేసిన నాయకులు
వరంగల్ పశ్చిమ ఎమ్మెల్యే నాయిని రాజేందర్‌రెడ్డికి కృతజ్ఞతలు
కాకతీయ, కాజీపేట : కాజీపేటకు తెలంగాణ పబ్లిక్ స్కూల్ మంజూరు కావడం సంతోషకరమని, ఈ నిర్ణయంతో ప్రాంత విద్యార్థులకు నాణ్యమైన విద్యావకాశాలు అందుబాటులోకి వస్తాయని కాంగ్రెస్ నాయకులు అన్నారు. రూ.10 కోట్ల అంచనా వ్యయంతో పాఠశాల మంజూరైన సందర్భంగా మంగళవారం కాజీపేట చౌరస్తాలో బాణాసంచా కాల్చి, స్వీట్లు పంపిణీ చేస్తూ సంబరాలు నిర్వహించారు. వరంగల్ పశ్చిమ ఎమ్మెల్యే నాయిని రాజేందర్‌రెడ్డి ప్రత్యేక చొరవతోనే పాఠశాల మంజూరైందని పేర్కొంటూ ఆయనకు, ముఖ్యమంత్రి ఎ. రేవంత్‌రెడ్డికి కృతజ్ఞతలు తెలిపారు. ప్రభుత్వ బాలుర ఉన్నత పాఠశాలను తెలంగాణ పబ్లిక్ స్కూల్‌గా ఎంపిక చేయడం ద్వారా ప్రాథమిక విద్య నుంచి ఇంటర్మీడియట్‌ వరకు ఒకే ప్రాంగణంలో చదువుకునే అవకాశం కలుగుతుందని ఆశాభావం వ్యక్తం చేశారు. పేద, మధ్యతరగతి విద్యార్థులకు మెరుగైన విద్య, మౌలిక సదుపాయాలు అందుబాటులోకి వస్తాయని పేర్కొన్నారు. హనుమకొండ జిల్లా కాంగ్రెస్ కార్యదర్శి పసునూరి మనోహర్‌, హనుమకొండ బ్లాక్‌ కాంగ్రెస్ అధ్యక్షుడు మహమ్మద్‌ అంకుష్‌ ఆధ్వర్యంలో జరిగిన కార్యక్రమంలో తాజా మాజీ కార్పొరేటర్‌ విజయశ్రీ రజాలి, మాజీ కార్పొరేటర్‌ సుంచు అశోక్‌, ఎన్‌ఎస్‌యూఐ మాజీ జాతీయ కోఆర్డినేటర్‌ రహమతుల్లా మహమ్మద్‌, పాలడుగుల ఆంజనేయులు, బుర్ర బాబురావు, షబ్బీర్‌ టబు, రంగు సుధీర్‌, నాగపురి రామ్‌కి గౌడ్‌, పోగుల సతీష్‌, కిరణ్‌, కాదాసీ సులోచన, మేడం రాజేందర్‌, బాదావత్‌ రాము, కొమురవెల్లి శ్రీనివాస్‌, గుమ్ముల రవి తదితరులు పాల్గొన్నారు.
