ప్రతి కుటుంబం ఆర్థికంగా ఎదగడమే లక్ష్యం
పేదింటి ఆడబిడ్డలకు అండగా నిలుస్తున్నాం
పరకాల ఎమ్మెల్యే రేవూరి ప్రకాశ్‌రెడ్డి
కళ్యాణలక్ష్మి, షాదీ ముబారక్‌ చెక్కుల పంపిణీ
కాకతీయ, పరకాల: పార్టీలకు అతీతంగా అర్హులైన పేదింటి ఆడబిడ్డలకు కళ్యాణలక్ష్మి, షాదీ ముబారక్‌ పథకాల ద్వారా అండగా నిలుస్తున్నామని పరకాల ఎమ్మెల్యే రేవూరి ప్రకాశ్‌రెడ్డి అన్నారు. శుక్రవారం పరకాల పట్టణంలోని ఎమ్మెల్యే క్యాంపు కార్యాలయంలో నడికూడ, ఆత్మకూరు, దామెర, గీసుగొండ మండలాలతో పాటు 15, 16 డివిజన్ల లబ్ధిదారులకు చెక్కులు పంపిణీ చేశారు. ప్రతి కుటుంబం ఆర్థికంగా ఎదగడమే కాంగ్రెస్‌ ప్రజా ప్రభుత్వ లక్ష్యమని ఎమ్మెల్యే పేర్కొన్నారు. గత బీఆర్‌ఎస్‌ ప్రభుత్వం సంపన్న రాష్ట్రాన్ని అప్పుల కుప్పగా మార్చిందని విమర్శించారు. ప్రస్తుత ప్రభుత్వం పేద ప్రజల సంక్షేమానికి ప్రాధాన్యమిస్తూ పలు పథకాలు అమలు చేస్తోందన్నారు. ఇందిరా మహిళా డెయిరీ, యంగ్‌ ఇండియా ఇంటిగ్రేటెడ్‌ స్కూల్‌, నూతన రేషన్‌ కార్డులు, ఇందిరమ్మ చీరలు, 200 యూనిట్ల ఉచిత విద్యుత్, రైతు రుణమాఫీ, ఇందిరమ్మ ఆత్మీయ భరోసా, రైతు బీమా, సన్న వడ్లకు రూ.500 బోనస్‌, సన్న బియ్యం పంపిణీ, మహాలక్ష్మి, గ్యాస్‌ సబ్సిడీ, వడ్డీలేని రుణాలు, శ్రీనిధి రుణాలు, ఇందిరమ్మ ఇళ్ల వంటి పథకాలను అమలు చేస్తున్నట్లు తెలిపారు.
