ఎమ్మెల్సీ అభ్యర్థి విజయమే లక్ష్యం
ఓటర్ల నమోదు ప్రక్రియను వేగవంతం చేయాలి
బూత్ స్థాయి నుంచి సమన్వయంతో పనిచేయాలి
పార్టీ శ్రేణులకు హ‌న్మ‌కొండ డీసీసీ అధ్యక్షుడు ఇనగాల పిలుపు
మడికొండలో ఉమ్మడి వరంగల్ జిల్లా కాంగ్రెస్ సమన్వయ సమావేశం
కాకతీయ, వరంగల్ బ్యూరో : వరంగల్-ఖమ్మం-నల్గొండ పట్టభద్రుల ఎమ్మెల్సీ ఎన్నికల్లో కాంగ్రెస్ పార్టీ అభ్యర్థి రాంరెడ్డి సర్వోత్తమ్ రెడ్డిని భారీ మెజారిటీతో గెలిపించడమే లక్ష్యంగా పార్టీ శ్రేణులు సమన్వయంతో పనిచేయాలని హనుమకొండ డీసీసీ అధ్యక్షుడు ఇనగాల వెంకట్రామ్ రెడ్డి పిలుపునిచ్చారు. గురువారం హనుమకొండ జిల్లా మడికొండలోని సత్యసాయి కన్వెన్షన్‌లో నిర్వహించిన ఉమ్మడి వరంగల్ జిల్లా కాంగ్రెస్ పార్టీ సమన్వయ సమావేశంలో ఆయన పాల్గొని మాట్లాడారు. గత పట్టభద్రుల ఎమ్మెల్సీ ఉప ఎన్నికల్లో కాంగ్రెస్ పార్టీ బలపరిచిన అభ్యర్థికి పట్టభద్రులు భారీ మెజారిటీ అందించారని గుర్తుచేశారు. అదే విజయ పరంపరను రాబోయే ఎన్నికల్లోనూ కొనసాగించాలని అన్నారు. ముఖ్యమంత్రి రేవంత్ రెడ్డి నేతృత్వంలోని ప్రజా ప్రభుత్వం చేపడుతున్న ఉద్యోగ నియామకాలు, సంక్షేమ పథకాలు, విద్యా, ఉపాధి రంగాల్లో సాధిస్తున్న ప్రగతిని పట్టభద్రులకు వివరించాలని సూచించారు. అర్హులైన ప్రతి పట్టభద్రుడిని గుర్తించి ఓటరుగా నమోదు చేయించడంతోపాటు, పోలింగ్ బూత్ స్థాయి నుంచి సమన్వయ కమిటీలను ఏర్పాటు చేసి ప్రచారాన్ని పకడ్బందీగా నిర్వహించాలని కోరారు. ఉమ్మడి వరంగల్ జిల్లా కాంగ్రెస్ పార్టీకి కంచుకోట అని, ఈ ఎన్నికల్లోనూ పార్టీ అభ్యర్థిని భారీ మెజారిటీతో గెలిపిస్తామని ధీమా వ్యక్తం చేశారు.
ఓటర్ల నమోదుపై ప్రత్యేక దృష్టి పెట్టాలి..
సమావేశంలో పాల్గొన్న ఎంపీలు మాట్లాడుతూ.. కాంగ్రెస్ ప్రభుత్వం అమలు చేస్తున్న ప్రజా సంక్షేమ కార్యక్రమాలు, నిరుద్యోగులకు కల్పిస్తున్న ఉద్యోగ అవకాశాలను పట్టభద్రులకు వివరించాలని సూచించారు. నవంబర్ 6వ తేదీలోగా అర్హులైన ప్రతి పట్టభద్రుడిని గుర్తించి ఫారం-18 ద్వారా ఓటరుగా నమోదు చేయించే ప్రక్రియను వేగవంతం చేయాలని పిలుపునిచ్చారు. అన్ని అసెంబ్లీ నియోజకవర్గాల్లో పార్టీ శ్రేణులు సమన్వయంతో పనిచేస్తూ ఓటర్ల నమోదు ప్రక్రియను పర్యవేక్షించాలని అన్నారు.
బూత్ స్థాయి నుంచి సమన్వయంతో పనిచేయాలి..
ఉమ్మడి వరంగల్ జిల్లాకు చెందిన కాంగ్రెస్ ఎమ్మెల్యేలు మాట్లాడుతూ ప్రతి నియోజకవర్గం, మండలం, గ్రామంలో పార్టీ నాయకులు, కార్యకర్తలు సమన్వయంతో పనిచేయాలని సూచించారు. పోలింగ్ బూత్ స్థాయి నుంచి ప్రచార కార్యక్రమాలను నిర్వహించి, కాంగ్రెస్ అభ్యర్థి రాంరెడ్డి సర్వోత్తమ్ రెడ్డిని భారీ మెజారిటీతో గెలిపించాలని పిలుపునిచ్చారు. పట్టభద్రుల సమస్యలను శాసనమండలిలో వినిపించే నాయకుడిగా ఆయనను గెలిపించేందుకు ప్రతి కార్యకర్త కృషి చేయాలని అన్నారు. ఈ సమావేశంలో మంత్రులు పొంగులేటి శ్రీనివాస్ రెడ్డి, ధనసరి అనసూయ (సీతక్క), రాజ్యసభ సభ్యుడు వేం నరేందర్ రెడ్డి, ఎంపీలు బలరాం నాయక్, చామల కిరణ్ కుమార్ రెడ్డి, ఎమ్మెల్సీలు బస్వరాజు సారయ్య, శంకర్ నాయక్, ఎమ్మెల్యేలు నాయిని రాజేందర్ రెడ్డి, దొంతి మాధవరెడ్డి, రేవూరి ప్రకాశ్ రెడ్డి, గండ్ర సత్యనారాయణ రావు, కె.ఆర్. నాగరాజు, హనుమాండ్ల యశస్విని రెడ్డి, జాటోత్ రాంచంద్రు నాయక్, డాక్టర్ భూక్య మురళి నాయక్ తదితర ప్రజాప్రతినిధులు, కాంగ్రెస్ పార్టీ నాయకులు, జిల్లా కమిటీ సభ్యులు, అనుబంధ సంఘాల ప్రతినిధులు పాల్గొన్నారు.
