రైతులకు నాణ్యమైన విద్యుత్ అందించాలి!
ఈనెల 23న కలెక్టరేట్ ముట్టడిని విజయవంతం చేయాలి
బీజేపీ చందుర్తి మండల అధ్యక్షుడు మొకిలే విజేందర్ పిలుపు
కాకతీయ, చందుర్తి: రైతులకు నిరంతరాయంగా నాణ్యమైన విద్యుత్ సరఫరా చేయాలని, సాగు సమస్యలను పరిష్కరించి పంటలను కాపాడాలని బీజేపీ చందుర్తి మండల అధ్యక్షుడు మొకిలే విజేందర్ ప్రభుత్వాన్ని డిమాండ్ చేశారు. రైతుల సమస్యలను ప్రభుత్వం దృష్టికి తీసుకెళ్లేందుకు ఈనెల 23న నిర్వహించనున్న కలెక్టరేట్ ముట్టడి కార్యక్రమాన్ని విజయవంతం చేయాలని పార్టీ శ్రేణులకు, రైతులకు పిలుపునిచ్చారు.
చందుర్తి మండలంలో బీజేపీ మండల అధ్యక్షుడు మొకిలే విజేందర్ ఆధ్వర్యంలో నిర్వహించిన మండల కార్యశాలకు ముఖ్య అతిథిగా రాజన్న సిరిసిల్ల జిల్లా బీజేపీ ఉపాధ్యక్షుడు చిలం రాజు హాజరయ్యారు.
ఈ సందర్భంగా మొకిలే విజేందర్ మాట్లాడుతూ.. రైతులకు సకాలంలో విద్యుత్ సరఫరా కాకపోవడం, సాగునీటి ఇబ్బందులతో పంటలు ఎండిపోయే పరిస్థితులు నెలకొంటున్నాయని ఆవేదన వ్యక్తం చేశారు. రైతుల పంటలను కాపాడాల్సిన బాధ్యత ప్రభుత్వంపై ఉందని, వ్యవసాయానికి నాణ్యమైన విద్యుత్‌ను నిరంతరాయంగా అందించాలని డిమాండ్ చేశారు. రైతుల హక్కుల కోసం బీజేపీ నిరంతరం పోరాడుతుందని స్పష్టం చేశారు.
నూతన పదవులు పొందిన నాయకులకు సన్మానం
ఇటీవల రాజన్న సిరిసిల్ల జిల్లా కిసాన్ మోర్చా కార్యదర్శిగా నియమితులైన పెరుక రంజిత్, కిసాన్ మోర్చా కార్యవర్గ సభ్యుడిగా నియమితులైన తీపిరెడ్డి మనోహర్ రెడ్డి, ఎస్సీ మోర్చా జిల్లా ఉపాధ్యక్షుడు పాటి సుధాకర్, ఓబీసీ మోర్చా జిల్లా కార్యదర్శి బందెల వెంకటేష్, మండల ప్రధాన కార్యదర్శిగా నియమితులైన ముడపల్లి ముఖేష్ గౌడ్‌లను మొకిలే విజేందర్ శాలువాలతో సత్కరించి శుభాకాంక్షలు తెలిపారు.
ఈ కార్యక్రమంలో జిల్లా కౌన్సిల్ సభ్యుడు పోచేటి రాకేష్, ప్రధాన కార్యదర్శులు మర్రి మల్లేశం, ముఖేష్ గౌడ్, గాడి కొప్పుల జీవన్, సీనియర్ నాయకులు పత్తిపాక శ్రీనివాస్, బూత్ అధ్యక్షులు తోట శంకర్, దివ్య సాగర్, బోరుగాయ తిరుపతి, అజిమెరా రవి నాయక్, జెలెండర్, మర్రి రాజు తదితర నాయకులు, కార్యకర్తలు పాల్గొన్నారు.
