కరీంపేటలో దొంగల బీభత్సం..
రైతుల మోటార్లు మాయం!
ఒకే రాత్రి ముగ్గురు రైతులకు నష్టం..
రూ.30 వేల విలువైన పంపుసెట్లు చోరీ
కాకతీయ,శంకరపట్నం:శంకరపట్నం మండలంలోని కరీంపేట గ్రామంలో గుర్తుతెలియని దుండగులు వ్యవసాయ మోటార్లను లక్ష్యంగా చేసుకుని చోరీలకు పాల్పడటం కలకలం రేపుతోంది. శుక్రవారం రాత్రి వ్యవసాయ బావుల వద్ద ఏర్పాటు చేసిన ముగ్గురు రైతులకు చెందిన విద్యుత్ మోటార్లను ఎత్తుకెళ్లడంతో అన్నదాతలు ఆందోళనకు గురవుతున్నారు. పంటలను కాపాడుకునేందుకు రైతులు అష్టకష్టాలు పడుతున్న తరుణంలో మోటార్ల చోరీ వారిని మరింత కుంగదీస్తోంది.
ఒకే రాత్రి ముగ్గురు రైతులకు నష్టం
కరీంపేట గ్రామానికి చెందిన ములుగురి స్వామి, బొజ్జ అశోక్, వనపర్తి రాజేశంలకు చెందిన వ్యవసాయ విద్యుత్ మోటార్లను గుర్తుతెలియని వ్యక్తులు అపహరించారు. శనివారం ఉదయం పొలాల వద్దకు వెళ్లిన రైతులు మోటార్లు కనిపించకపోవడంతో అవాక్కయ్యారు. చుట్టుపక్కల వెతికినా ఆచూకీ లభించకపోవడంతో ఆందోళన వ్యక్తం చేశారు. చోరీకి గురైన మోటార్ల విలువ సుమారు రూ.30 వేల వరకు ఉంటుందని బాధిత రైతులు తెలిపారు.
పంటల చివరి దశలో సాగునీటి కష్టాలు
ప్రస్తుతం పంటలు కీలక దశలో ఉండటంతో సాగునీరు అందించడం రైతులకు అత్యవసరంగా మారింది. ఇలాంటి సమయంలో మోటార్లు చోరీకి గురికావడంతో పంటలకు నీరు ఎలా అందించాలంటూ బాధిత రైతులు ఆవేదన వ్యక్తం చేస్తున్నారు. ఇప్పటికే వ్యవసాయ ఖర్చులతో సతమతమవుతున్న తమకు మోటార్ల చోరీ అదనపు భారంగా మారిందని వాపోతున్నారు.
పోలీసులు స్పందించాలి
గ్రామీణ ప్రాంతాల్లో వ్యవసాయ మోటార్ల చోరీలకు అడ్డుకట్ట వేసేలా పోలీసులు చర్యలు చేపట్టాలని రైతులు కోరుతున్నారు. ఘటనపై సమగ్ర విచారణ జరిపి, చోరీకి పాల్పడిన వారిని గుర్తించి మోటార్లను తిరిగి ఇప్పించాలని విజ్ఞప్తి చేస్తున్నారు. వ్యవసాయ పరికరాల భద్రతపై ప్రత్యేక దృష్టి సారించి, ఇలాంటి ఘటనలు పునరావృతం కాకుండా చర్యలు తీసుకోవాలని బాధిత రైతులు కోరుతున్నారు.
