పర్యాటకమే ప్రాణం.. ఓరుగల్లు కీర్తే లక్ష్యం!
చరిత్రను పరిచయం చేస్తూ.. వారసత్వ సంపదకు వెలుగులు
పాతికేళ్లుగా పర్యాటక రంగ అభివృద్ధికి అంకితభావంతో కృషి
ఆర్థిక ఇబ్బందులు ఎదురైనా ఆగని ప్రయాణం
రామప్ప నుంచి వేయిస్తంభాల గుడి వరకు ప్రత్యేక ప్రచారం
భారత్‌ పర్వ్‌ వేదికగా ప్రధాని మోదీకి తెలంగాణ వైభవం పరిచయం
డాక్టర్‌ కుసుమ సూర్యకిరణ్‌ సేవలకు జాతీయ స్థాయి గుర్తింపు
కాకతీయ, హన్మకొండ : ఒక ఉద్యోగం.. ఒక బాధ్యత.. ఒక లక్ష్యం.. ఇవి చాలామందికి వృత్తిలో భాగం మాత్రమే. కానీ కొందరికి మాత్రం అదే జీవిత ధ్యేయంగా మారుతుంది. తెలంగాణ చరిత్రను నలుదిశలా పరిచయం చేయడం, కాకతీయుల కళావైభవాన్ని ప్రపంచానికి చాటడం, ఓరుగల్లు పర్యాటక ప్రాధాన్యాన్ని పెంచడం.. ఈ లక్ష్యాలతో పాతికేళ్లుగా సాగుతున్న ఓ ప్రయాణం ఇప్పుడు జాతీయ స్థాయిలో గుర్తింపు పొందింది. ఆయనే పర్యాటక శాఖ అసిస్టెంట్‌ టూరిజం ప్రమోషన్‌ ఆఫీసర్‌ డాక్టర్‌ కుసుమ సూర్యకిరణ్‌. పర్యాటకాన్ని కేవలం ఉద్యోగంగా కాకుండా చరిత్ర, సంస్కృతిని భావితరాలకు అందించే బాధ్యతగా భావిస్తూ ఆయన చేస్తున్న కృషి అభినందనీయం. తెలంగాణ నేలపై అడుగడుగునా చరిత్ర ఆనవాళ్లు కనిపిస్తాయి. కాకతీయుల పాలన, వారి శిల్పకళా నైపుణ్యం, అద్భుత నిర్మాణాలు, సంప్రదాయ కళారూపాలు ఈ ప్రాంతానికి ప్రత్యేక గుర్తింపును తీసుకొచ్చాయి. ఈ సంపదను పర్యాటకులకు పరిచయం చేయడమే సూర్యకిరణ్‌ తన బాధ్యతగా భావించారు. ముఖ్యంగా ఓరుగల్లు చారిత్రక వైభవం దేశవిదేశాల పర్యాటకులకు చేరాలన్న తపనతో నిరంతరం పనిచేస్తున్నారు. పర్యాటక ప్రాంతాల విశిష్టతను వివరించడం, వాటి ప్రాధాన్యాన్ని ప్రచారంలోకి తీసుకురావడం ఆయన ప్రస్థానంలో కీలక భాగాలుగా మారాయి.
ఆటుపోట్లను అధిగమించిన అంకితభావం
పాతికేళ్ల ప్రయాణం పూలబాట కాదు. పరిమిత జీతం, ఆర్థిక ఇబ్బందులు, వృత్తిపరమైన సవాళ్లు ఎదురైనా సూర్యకిరణ్‌ తన లక్ష్యాన్ని విడిచిపెట్టలేదు. ఉద్యోగ బాధ్యతలకు మించి పర్యాటక రంగ అభివృద్ధికి తన వంతు కృషి చేస్తూ వచ్చారు. ఓరుగల్లు చారిత్రక కట్టడాలు, శిల్ప సంపద, ప్రకృతి అందాలకు మరింత గుర్తింపు రావాలంటే నిరంతర ప్రచారం అవసరమని నమ్మారు. అందుకే ఎదురైన ఇబ్బందులను అధిగమిస్తూ తన ప్రయాణాన్ని కొనసాగించారు. ఇటీవల గుజరాత్‌లో నిర్వహించిన భారత్‌ పర్వ్‌–2026 సూర్యకిరణ్‌ ప్రస్థానంలో మరో కీలక ఘట్టంగా నిలిచింది. సర్దార్‌ వల్లభాయ్‌ పటేల్‌ 150వ జయంతి సందర్భంగా కేంద్ర పర్యాటక మంత్రిత్వ శాఖ నిర్వహించిన ఈ కార్యక్రమంలో ప్రధానమంత్రి నరేంద్ర మోదీకి తెలంగాణ సాంస్కృతిక, చారిత్రక వైభవాన్ని వివరించే అవకాశం ఆయనకు లభించింది. పోచంపల్లి చేనేత, చేర్యాల చిత్రకళ, రామప్ప దేవాలయ ప్రత్యేకతలు, కాకతీయుల శిల్పకళా నైపుణ్యాన్ని ప్రధానికి పరిచయం చేశారు. అయోధ్య రామమందిర నిర్మాణంలో తెలంగాణ కళలు, సంప్రదాయాలకు సంబంధించిన అంశాలను కూడా ప్రస్తావించారు.
ఓరుగల్లు పర్యాటకానికి మరింత వెలుగు
భారత్‌ పర్వ్‌ వేదికపై తెలంగాణ పేరిణి నృత్య ప్రదర్శన ప్రత్యేక ఆకర్షణగా నిలిచింది. ప్రదర్శనను ప్రధాని మోదీ ఆసక్తిగా తిలకించి ప్రశంసించడం తెలంగాణ కళాకారులకు గర్వకారణంగా మారింది. కళాకారులు, పర్యాటక శాఖ అధికారులతో కలిసి ప్రధాని ఫొటోలు దిగడం కార్యక్రమానికి మరింత ప్రత్యేకతను తీసుకొచ్చింది. దేశంలోని 29 రాష్ట్రాల కళలు, ఆహార సంస్కృతులు, పర్యాటక విశేషాలు కొలువుదీరిన వేదికపై తెలంగాణ కళారూపాలకు లభించిన ఆదరణ రాష్ట్ర సాంస్కృతిక వైభవానికి గుర్తింపుగా నిలిచింది. రామప్ప దేవాలయం, వేయిస్తంభాల గుడి, వరంగల్ కోట.. ఇవి కేవలం కట్టడాలు కావు. కాకతీయుల కళా నైపుణ్యానికి, తెలంగాణ చారిత్రక వైభవానికి నిలువెత్తు సాక్ష్యాలు. వీటితోపాటు ఉమ్మడి వరంగల్ జిల్లాలోని ఇతర పర్యాటక ప్రాంతాల విశిష్టతను ప్రపంచానికి పరిచయం చేయాలన్నదే సూర్యకిరణ్‌ ఆకాంక్ష. పర్యాటక రంగం అభివృద్ధి చెందితే స్థానిక వారసత్వానికి గుర్తింపు రావడంతోపాటు ఈ ప్రాంతానికి కొత్త అవకాశాలు వస్తాయన్న ఆశయంతో ఆయన తన సేవలను కొనసాగిస్తున్నారు.
నిబద్ధతకు దక్కిన గౌరవం
భారత్‌ పర్వ్‌ వేదికగా ప్రధానికి తెలంగాణ వైభవాన్ని వివరించే అవకాశం సూర్యకిరణ్‌కు వ్యక్తిగత గుర్తింపే కాదు.. పాతికేళ్లుగా ఆయన సాగిస్తున్న కృషికి లభించిన గౌరవం కూడా. ఆర్థిక ఇబ్బందులు, వృత్తిపరమైన సవాళ్లు లక్ష్యానికి అడ్డంకులు కావని ఆయన ప్రస్థానం చాటుతోంది. ఓరుగల్లు కీర్తిని దేశవిదేశాలకు పరిచయం చేయాలన్న సంకల్పంతో ముందుకు సాగుతున్న ఈ పర్యాటక సేవకుడి అంకితభావం అభినందనీయం. ఉద్యోగాన్ని బాధ్యతగా, బాధ్యతను జీవిత ధ్యేయంగా మలుచుకున్న సూర్యకిరణ్‌ ప్రయాణం పర్యాటక రంగంలో పనిచేస్తున్నవారికి, యువతకు స్ఫూర్తిదాయకం.
