ప్రశ్నపత్రాల బాహ్య మూల్యాంకన నిర్ణయాన్ని వెనక్కి తీసుకోవాలి
కాకతీయ, నెల్లికుదురు: ప్రశ్నపత్రాల బాహ్య మూల్యాంకన నిర్ణయాన్ని ప్రభుత్వం వెనక్కి తీసుకోవాలని టీపీటీఎఫ్ జిల్లా కార్యదర్శి సంగ శ్రీనివాస్ డిమాండ్ చేశారు. టీపీటీఎఫ్ మండల శాఖ ఆధ్వర్యంలో యాకయ్య అధ్యక్షతన నిర్వహించిన సమావేశంలో ఆయన మాట్లాడారు. సమ్మేటివ్ పరీక్ష పత్రాలను మండల కేంద్రాల్లో మూల్యాంకనం చేయడం వల్ల విద్యార్థులు మార్కులు, గ్రేడ్ల కోసం పరుగెత్తే పరిస్థితి ఏర్పడుతుందన్నారు. ఈ విధానం ఉపాధ్యాయులను కించపరిచేలా ఉందని, ప్రభుత్వంపై అదనపు ఆర్థిక భారం పడుతుందని పేర్కొన్నారు. సబ్జెక్టు టీచర్ అందుబాటులో లేకుండానే విద్యార్థులు పరీక్షలు రాయాల్సిన పరిస్థితి ఏర్పడుతుందని అన్నారు. విద్య అంటే మూల్యాంకనం మాత్రమే అన్నట్లుగా విద్యాశాఖ వ్యవహరించడం సరికాదని, విద్యా లక్ష్యాలకు విరుద్ధమైన విధానాలను ప్రభుత్వం విరమించుకోవాలని డిమాండ్ చేశారు. కార్యక్రమంలో వెంకటేశ్వర్లు, పద్మావతి, రాజు, నవీన్ పాల్గొన్నారు.
