ఎస్ఐ, పీసీ ఉద్యోగాలకు ఉచిత రెసిడెన్షియల్‌ కోచింగ్‌
ఎస్సీ, ఎస్టీ, బీసీ, మైనారిటీ అభ్యర్థులకు అవకాశం
అక్టోబర్‌ 10 సాయంత్రం 5 గంటల వరకు దరఖాస్తుల స్వీకరణ
ఎస్సీ స్టడీ సర్కిల్‌ ఉమ్మడి వరంగల్ జిల్లా సంచాలకులు డాక్టర్‌ కె. జగన్‌మోహన్‌
కాకతీయ, హనుమకొండ: తెలంగాణ రాష్ట్ర పోలీస్‌ శాఖలో సబ్‌–ఇన్‌స్పెక్టర్‌, పోలీస్‌ కానిస్టేబుల్‌ ఉద్యోగ నియామకాలకు సంబంధించి ఉమ్మడి వరంగల్ జిల్లాలోని అర్హులైన ఎస్సీ, ఎస్టీ, బీసీ, మైనారిటీ నిరుద్యోగ అభ్యర్థులకు ప్రిలిమినరీ పరీక్ష వరకు ఉచిత రెసిడెన్షియల్‌ కోచింగ్‌ అందించనున్నట్లు ఎస్సీ స్టడీ సర్కిల్‌ అధికారులు తెలిపారు. హనుమకొండ వడ్డేపల్లి ఆర్టీసీ కాలనీలోని ఉమ్మడి వరంగల్ జిల్లా ఎస్సీ స్టడీ సర్కిల్‌లో నిర్వహించే శిక్షణకు డిగ్రీ పూర్తి చేసిన అభ్యర్థులు దరఖాస్తు చేసుకోవచ్చు. స్టడీ సర్కిల్‌ నిబంధనలు, రిజర్వేషన్‌ రోస్టర్‌, రిజర్వేషన్‌ నిష్పత్తి, డిగ్రీలో సాధించిన మార్కుల ఆధారంగా అభ్యర్థులను ఎంపిక చేయనున్నట్లు షెడ్యూల్డ్‌ కులాల అభివృద్ధి శాఖ హనుమకొండ జిల్లా అధికారి బి. నిర్మల, ఎస్సీ స్టడీ సర్కిల్‌ ఉమ్మడి వరంగల్ జిల్లా సంచాలకులు డాక్టర్‌ కె. జగన్‌మోహన్‌ తెలిపారు. దరఖాస్తుతోపాటు ఎస్ఐ, పీసీ పోస్టులకు దరఖాస్తు చేసుకున్న అప్లికేషన్‌ లేదా అక్నాలెడ్జ్‌మెంట్‌ ఫారం, ఎస్‌ఎస్‌సీ, ఇంటర్మీడియట్‌, డిగ్రీ సర్టిఫికెట్లు, టీసీ, కులం, ఆదాయం, నివాస, ఆధార్‌ తదితర ధ్రువీకరణ పత్రాలు సమర్పించాలి. అక్టోబర్‌ 6 నుంచి 10వ తేదీ సాయంత్రం 5 గంటల వరకు దరఖాస్తులు స్వీకరిస్తారు. దరఖాస్తులను స్టడీ సర్కిల్‌లో సమర్పించాలి. మరిన్ని వివరాలకు 9160606862 నంబర్‌లో సంప్రదించాలని అధికారులు సూచించారు.
