భద్రకాళి శరన్నవరాత్రి ఉత్సవాలకు పటిష్ట భద్రత..
జాతీయ, వరంగల్ బ్యూరో : వరంగల్ నగరంలోని ప్రసిద్ధ శ్రీ భద్రకాళి దేవస్థానంలో ఈ నెల 11వ తేదీ నుంచి ప్రారంభం కానున్న దేవి శరన్నవరాత్రి ఉత్సవాలకు పటిష్ట భద్రతా ఏర్పాట్లు చేపట్టాలని వరంగల్ పోలీస్ కమిషనర్ ఎన్. శ్వేతా, ఐపీఎస్ అధికారులను ఆదేశించారు. ఉత్సవాల నేపథ్యంలో మంగళవారం ఆమె ఆలయాన్ని సందర్శించి క్షేత్రస్థాయిలో భద్రతా ఏర్పాట్లను పరిశీలించారు. రాష్ట్రంలోని వివిధ ప్రాంతాల నుంచి పెద్ద సంఖ్యలో భక్తులు తరలిరానున్న నేపథ్యంలో వారికి ఎలాంటి ఇబ్బందులు కలగకుండా తీసుకుంటున్న చర్యలను పోలీసు అధికారులను అడిగి తెలుసుకున్నారు. ఆలయ పరిసరాలు, భక్తుల క్యూలైన్లు, పార్కింగ్ ప్రదేశాలు, భద్రతా విభాగాలను సీపీ క్షుణ్ణంగా పరిశీలించారు. భక్తుల రద్దీని దృష్టిలో పెట్టుకుని శాంతిభద్రతలకు విఘాతం కలగకుండా ముందస్తు చర్యలు చేపట్టాలని సూచించారు. ఉత్సవాల సమయంలో ట్రాఫిక్ నియంత్రణ, వాహనాల పార్కింగ్, భక్తుల రాకపోకలు సజావుగా జరిగేలా సమన్వయంతో విధులు నిర్వహించాలని పోలీసు అధికారులకు సూచించారు. భక్తులకు భద్రతతో పాటు సౌకర్యవంతమైన దర్శనం కల్పించేందుకు అన్ని విభాగాలు సమన్వయంతో పనిచేయాలని ఆదేశించారు. ఈ పరిశీలనలో సెంట్రల్ జోన్ డీసీపీ ధార కవిత, అడిషనల్ డీసీపీ (అడ్మినిస్ట్రేషన్) రాయల ప్రభాకర్ రావు, హన్మకొండ ఏసీపీ నర్సింహారావు, ట్రాఫిక్ ఏసీపీ టి. సత్యనారాయణ, మట్టెవాడ, ఇంతేజర్‌గంజ్, మిల్స్‌కాలనీ ఇన్‌స్పెక్టర్లు, ఆలయ పాలక మండలి సభ్యులు, అర్చకులు పాల్గొన్నారు.
