మోడల్ స్కూల్‌లో ఘనంగా ‘మా బడి బతుకమ్మ’ సంబరాలు
తెలంగాణ సంస్కృతి, సంప్రదాయాలను చాటిచెప్పిన విద్యార్థులు
కాకతీయ,శంకరపట్నం: సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని శంకరపట్నం మండల కేంద్రంలోని తెలంగాణ మోడల్ స్కూల్‌లో శుక్రవారం ‘మా బడి బతుకమ్మ’ వేడుకలను ఘనంగా నిర్వహించారు. విద్యార్థులు రంగురంగుల పూలతో బతుకమ్మలను రూపొందించి, సంప్రదాయ పాటలు, ఆటపాటలతో పాఠశాల ప్రాంగణాన్ని పండుగ వాతావరణంతో నింపారు. పాఠశాల ప్రిన్సిపాల్ కే. ప్రభాకర్ ముఖ్య అతిథిగా హాజరై దీపం వెలిగించి, కొబ్బరికాయ కొట్టి వేడుకలను ప్రారంభించారు. అనంతరం ఆరో తరగతి నుంచి ఇంటర్మీడియట్ వరకు విద్యార్థులు తరగతుల వారీగా రూపొందించిన బతుకమ్మలను పాఠశాల ప్రాంగణంలో అందంగా అలంకరించి ప్రదర్శించారు. వివిధ రకాల పూలతో తీర్చిదిద్దిన బతుకమ్మలు ప్రత్యేక ఆకర్షణగా నిలిచాయి. విద్యార్థులు బతుకమ్మ పాటలకు నృత్యాలు చేస్తూ ఉత్సాహంగా వేడుకల్లో పాల్గొన్నారు.
ఈ సందర్భంగా ప్రిన్సిపాల్ కే. ప్రభాకర్ మాట్లాడుతూ, విద్యార్థులకు తెలంగాణ సంస్కృతి, సంప్రదాయాలపై అవగాహన కల్పించడంతోపాటు వాటి విశిష్టతను భావితరాలకు అందించడంలో ఇలాంటి కార్యక్రమాలు ఎంతో దోహదపడతాయని అన్నారు. పాఠశాలలో సంప్రదాయబద్ధంగా బతుకమ్మ వేడుకలు నిర్వహించడం ఆనందంగా ఉందని పేర్కొన్నారు. ఈ కార్యక్రమంలో ఉపాధ్యాయులు రాజు, సతీష్, శివశంకర్, ఆర్. రజిత, నాగమణి, ఎస్. రజిత, వనజ, రాధ, సంధ్య, రజిని, డా. మహేందర్ కట్కూరి, రమణారెడ్డి, మధుకర్, సంపత్, శంకర్, నరేష్ తదితరులు పాల్గొన్నారు.
