రైతులకు కరెంట్‌ ఇవ్వలేని కాంగ్రెస్ ప్రభుత్వం గద్దె దిగాలి
లో-వోల్టేజ్‌, కోతలతో పంటలు ఎండిపోతున్నాయి
సింగూర్‌ ప్రాజెక్టును ఖాళీ చేసి రైతులకు అన్యాయం చేశారు
ఆందోల్‌ మాజీ ఎమ్మెల్యే చంటి క్రాంతి కిరణ్ ధ్వ‌జం
అన్నాసాగర్‌ సబ్‌స్టేషన్‌ ఎదుట రైతులతో క‌ల‌సి ధర్నా
కాకతీయ, ఆందోల్‌ : వ్యవసాయానికి సరిపడా నాణ్యమైన విద్యుత్ అందించలేని అసమర్థ కాంగ్రెస్ ప్రభుత్వం వెంటనే గద్దె దిగాలని ఆందోల్‌ మాజీ ఎమ్మెల్యే చంటి క్రాంతి కిరణ్ డిమాండ్‌ చేశారు. లో-వోల్టేజ్‌, విద్యుత్ కోతలతో పంటలు ఎండిపోతున్నా ప్రభుత్వం పట్టించుకోవడం లేదని మండిపడ్డారు. ఆందోల్‌ మండలం అన్నాసాగర్‌ సబ్‌స్టేషన్‌ ఎదుట వివిధ గ్రామాల రైతులు చేపట్టిన ధర్నాలో ఆయన ముఖ్య అతిథిగా పాల్గొని మాట్లాడారు. విద్యుత్ డివిజనల్‌ ఇంజనీర్‌ (డీఈ) స్వయంగా వచ్చి సమస్యలు పరిష్కరించాలని డిమాండ్‌ చేస్తూ రైతులు రోడ్డుపై బైఠాయించి నిరసన తెలిపారు.
నీటిని సముద్రం పాలు చేసి.. విద్యుత్ కష్టాలు తెచ్చారు
ఎల్‌నినో ప్రభావం, వర్షాభావ పరిస్థితులపై ముందస్తు హెచ్చరికలు ఉన్నా ప్రభుత్వం పట్టించుకోకుండా కృష్ణా, గోదావరి జలాలను సముద్రం పాలు చేసిందని క్రాంతి కిరణ్ విమర్శించారు. గత బీఆర్‌ఎస్‌ ప్రభుత్వ హయాంలో 24 గంటల నాణ్యమైన విద్యుత్ సరఫరా జరిగేదని, ఇప్పుడు రైతులు కోతలతో ఇబ్బందులు పడుతున్నారని అన్నారు. యూనిట్‌కు రూ.4 చొప్పున విద్యుత్ కొనుగోలు చేసే అవకాశాలను వదులుకొని, బహిరంగ మార్కెట్‌లో రూ.15 చెల్లించి కొనుగోలు చేసేందుకు ప్రయత్నించడం ప్రభుత్వ అసమర్థతకు నిదర్శనమని వ్యాఖ్యానించారు. సాగునీరు, తాగునీరు, విద్యుత్ వ్యవస్థలను కాంగ్రెస్ ప్రభుత్వం సంక్షోభంలోకి నెట్టిందని ధ్వజమెత్తారు.
సింగూర్‌ ప్రాజెక్టులో నీరు నిండుగా ఉన్న సమయంలో గేట్ల మరమ్మతుల పేరుతో నీటిని దిగువకు విడుదల చేసి ప్రాజెక్టును ఖాళీ చేయించారని మంత్రి దామోదర రాజనర్సింహపై క్రాంతి కిరణ్ విమర్శలు చేశారు. దీంతో ఆందోల్‌ నియోజకవర్గంలో రైతులు సాగునీరు, తాగునీటి కోసం ఇబ్బందులు పడుతున్నారని అన్నారు. ఎండిపోతున్న పంటలను మంత్రి పరిశీలించి, నష్టపోయిన రైతులకు భరోసా కల్పించాలని డిమాండ్‌ చేశారు. రైతులు మాట్లాడుతూ లో-వోల్టేజ్‌తో మోటార్లు పనిచేయడం లేదని, పెట్టుబడులు పెట్టి సాగు చేసిన పంటలు కళ్ల ముందే ఎండిపోతున్నాయని ఆవేదన వ్యక్తం చేశారు. పంటలు దెబ్బతింటే భూ యజమానులకు కౌలు ఎలా చెల్లించాలని కౌలు రైతులు ప్రశ్నించారు. డీఈ వచ్చి సమస్యలకు పరిష్కారం చూపేవరకు కదిలేది లేదని స్పష్టం చేశారు. ఆందోల్‌ మండల పార్టీ అధ్యక్షుడు లక్ష్మీకాంత్‌ రెడ్డి అధ్యక్షతన జరిగిన ధర్నాలో సీనియర్‌ నాయకులు జైపాల్‌ రెడ్డి, మాసంపల్లి నారాయణ, లింగాగౌడ్‌, వివిధ గ్రామాల సర్పంచులు, మాజీ సర్పంచులు, రైతు నాయకులు, రైతులు పాల్గొన్నారు.
