జీడబ్ల్యూఎంసీలో ఘనంగా బతుకమ్మ సంబరాలు అంబరాన్నంటిన వేడుకలు
పూల సోయగాలతో ముస్తాబైన ప్రాంగణం ఆటపాటలతో హోరెత్తించిన మహిళలు
బతుకమ్మ తెలంగాణ ఆత్మగౌరవానికి ప్రతీక – కుడా చైర్ పర్సన్ సుధారాణి, కలెక్టర్ చాహత్ బాజ్ పాయ్, కమిషనర్ వెంకన్న
కాకతీయ, వరంగల్ ప్రతినిధి : గ్రేటర్ వరంగల్ మహానగర పాలక సంస్థ (జీడబ్ల్యూఎంసీ) ప్రధాన కార్యాలయ ప్రాంగణం శుక్రవారం సాయంత్రం బతుకమ్మ సంబరాలతో కోలాహలంగా మారింది. జీడబ్ల్యూఎంసీ ఆధ్వర్యంలో నిర్వహించిన బతుకమ్మ వేడుకలు పూల సోయగాలతో, సాంస్కృతిక వైభవంతో అంబరాన్నంటాయి.
ఈ వేడుకలకు కుడా చైర్ పర్సన్ గుండు సుధారాణి, హన్మకొండ జిల్లా కలెక్టర్, జీడబ్ల్యూఎంసీ ప్రత్యేక అధికారి చాహత్ బాజ్ పాయ్, జీడబ్ల్యూఎంసీ కమిషనర్ టి. వెంకన్న దంపతులు ముఖ్య అతిథులుగా హాజరయ్యారు.
తంగేడు, గునుగు, బంతి, చామంతి తదితర రంగురంగుల పూలతో అందంగా పేర్చిన బతుకమ్మలు ప్రత్యేక ఆకర్షణగా నిలిచాయి. జీడబ్ల్యూఎంసీ మహిళా ఉద్యోగులు, సిబ్బంది, నగర మహిళలు సంప్రదాయ బతుకమ్మ పాటలు పాడుతూ, చప్పట్లతో లయబద్ధంగా నృత్యాలు చేస్తూ ఉత్సాహంగా సంబరాలు జరుపుకున్నారు. పూల సోయగాలు, జానపద గీతాలతో జీడబ్ల్యూఎంసీ ప్రాంగణం పండుగ శోభను సంతరించుకుంది.
అనంతరం కుడా చైర్ పర్సన్ గుండు సుధారాణి, బల్దియా స్పెషల్ ఆపీసర్, జిల్లా కలెక్టర్ చాహత్ బాజ్ పాయ్ మాట్లాడుతూ.. బతుకమ్మ తెలంగాణ ప్రజల ఆత్మగౌరవానికి, సాంస్కృతిక వైభవానికి ప్రతీక అని పేర్కొన్నారు. ప్రకృతిలో లభించే పూలను పూజిస్తూ, ప్రకృతితో మానవ జీవితానికి ఉన్న అనుబంధాన్ని చాటిచెప్పే విశిష్టమైన పండుగ బతుకమ్మ అని తెలిపారు.బతుకమ్మ కేవలం పూల పండుగ మాత్రమే కాదని, మహిళల ఆత్మగౌరవం, ఐక్యత, కుటుంబ అనుబంధాలు, సామాజిక సమైక్యతకు ప్రతిబింబమని అన్నారు. తరతరాలుగా కొనసాగుతున్న ఈ సంప్రదాయాన్ని భావితరాలకు అందించడం ప్రతి ఒక్కరి బాధ్యతని పేర్కొన్నారు.కమిషనర్ వెంకన్న మాట్లాడుతూ.. గ్రేటర్ వరంగల్ నగర పరిధిలో ప్రజలు బతుకమ్మ పండుగను సంతోషంగా జరుపుకునేలా అవసరమైన ఏర్పాట్లకు ప్రాధాన్యమిస్తున్నట్లు తెలిపారు. నగర పరిశుభ్రత, రవాణా, ప్రజలకు అవసరమైన సౌకర్యాల కల్పనకు ముందస్తు ప్రణాళికతో చర్యలు చేపడుతున్నామన్నారు. బతుకమ్మ పండుగ ప్రజలందరి జీవితాల్లో సుఖసంతోషాలు నింపాలని ఆకాంక్షిస్తూ ప్రజలకు పండుగ శుభాకాంక్షలు తెలిపారు.
కార్యక్రమంలో జీడబ్ల్యూఎంసీ మహిళా ఉద్యోగులు, సిబ్బంది, ఇతర మహిళలు పెద్ద సంఖ్యలో పాల్గొన్నారు.
