చెన్నారావుపేటలో బీఆర్‌ఎస్‌ ఫ్లెక్సీ చింపివేత
గుర్తుతెలియని వ్యక్తుల చర్యపై బీఆర్‌ఎస్‌ నాయకుల ఆగ్రహం
కాకతీయ, చెన్నారావుపేట: బతుకమ్మ, దసరా పండుగల సందర్భంగా ప్రజలకు శుభాకాంక్షలు తెలుపుతూ చెన్నారావుపేట–నెక్కొండ ప్రధాన రహదారి పక్కన బీఆర్‌ఎస్‌ నాయకులు, కార్యకర్తలు ఏర్పాటు చేసిన ఫ్లెక్సీని శనివారం రాత్రి గుర్తుతెలియని వ్యక్తులు చింపివేయడం కలకలం రేపింది. ఈ ఘటనపై బీఆర్‌ఎస్‌ నాయకులు తీవ్ర ఆగ్రహం వ్యక్తం చేశారు. విషయం తెలుసుకున్న గ్రామ మాజీ సర్పంచ్‌ కుండె మల్లయ్య, జడ్పీ కో-ఆప్షన్‌ మాజీ సభ్యుడు మహమ్మద్‌ రఫీ, గ్రామ పార్టీ అధ్యక్షుడు కందగట్ల సాంబయ్య, మండల ఉపాధ్యక్షుడు కుసుమ నరేందర్‌, మండల నాయకులు జున్నుతుల శ్రీధర్‌రెడ్డి, కేతిడి జయపాల్‌రెడ్డి, మాజీ ఎంపీటీసీ మాదాసి కుమారస్వామి తదితరులు ఘటనను ఖండించారు. బతుకమ్మ, దసరా పండుగలను కులమతాలు, రాజకీయాలకు అతీతంగా ప్రజలంతా ఐక్యంగా జరుపుకోవాలని వారు సూచించారు. రాజకీయాల్లో భిన్నాభిప్రాయాలు సహజమని, వాటిని వ్యక్తిగత విద్వేషాలకు వేదికగా మార్చుకోవడం సరికాదని హితవు పలికారు. పండుగ వేళ ఇతరుల మనోభావాలను దెబ్బతీసే చర్యలకు పాల్పడటం సమంజసం కాదన్నారు. గ్రామంలో ప్రశాంత వాతావరణాన్ని దెబ్బతీసే ఇలాంటి ఘటనలను ప్రతి ఒక్కరూ ఖండించాలని కోరారు. ఫ్లెక్సీని చింపిన వారిని గుర్తించి, ఘటనపై సమగ్ర విచారణ జరిపి బాధ్యులపై చట్టప్రకారం చర్యలు తీసుకోవాలని సంబంధిత అధికారులను డిమాండ్‌ చేశారు.
