ఎస్సీ, ఎస్టీ సబ్‌ప్లాన్‌ నిధుల ప‌రిస్థితేంటి..?
నిధుల వినియోగాన్ని వేగవంతం చేయాలి
ఖర్చులో వెనుకబడిన శాఖలపై ప్రత్యేక సమీక్ష చేప‌ట్టాలి
ఆదాయ వనరుల సమీకరణకు కార్యాచరణ ప్రణాళిక
రుణాల పునర్వ్యవస్థీకరణపై దృష్టి సారించాలి
అభివృద్ధి, సంక్షేమ పథకాలకు నిధుల సద్వినియోగం
ఆర్థిక నిర్వహణలో నిపుణుల సలహాలు తీసుకోవాలి
డిప్యూటీ సీఎం భట్టి విక్రమార్క
కాకతీయ, తెలంగాణ బ్యూరో : ఎస్సీ, ఎస్టీ సబ్‌ప్లాన్‌ నిధుల వినియోగాన్ని వేగవంతం చేయాలని డిప్యూటీ సీఎం, ఆర్థికశాఖ మంత్రి భట్టి విక్రమార్క అధికారులను ఆదేశించారు. బడ్జెట్‌లో కేటాయించిన నిధులను నిర్దేశిత లక్ష్యాలకు అనుగుణంగా ఖర్చు చేయాలని, నిధుల వినియోగంలో వెనుకబడిన శాఖలపై ప్రత్యేక దృష్టి సారించాలని సూచించారు. రాష్ట్ర ఆర్థిక పరిస్థితిని మరింత బలోపేతం చేసేందుకు ఆదాయ వనరుల సమీకరణ, ఆర్థిక సంస్కరణలు, రుణాల పునర్వ్యవస్థీకరణపై సమగ్ర కార్యాచరణ ప్రణాళిక రూపొందించాలని స్పష్టం చేశారు. సోమవారం డాక్టర్‌ బీఆర్‌ అంబేడ్కర్‌ తెలంగాణ రాష్ట్ర సచివాలయంలో ఆర్థికశాఖ ఉన్నతాధికారులతో నిర్వహించిన సమీక్ష సమావేశంలో భట్టి విక్రమార్క ఈ సూచనలు చేశారు. ఎస్సీ, ఎస్టీ ప్రగతి ఉప ప్రణాళిక అమలు, శాఖలవారీగా బడ్జెట్‌ కేటాయింపులు, ఇప్పటివరకు చేసిన ఖర్చు, రాష్ట్ర ఆర్థిక నిర్వహణకు సంబంధించిన అంశాలను సమీక్షించారు.
నిధుల ఖర్చులో వెనుకబడిన శాఖలపై దృష్టి
సాధారణ బడ్జెట్‌ కింద కేటాయించిన నిధులను వినియోగిస్తున్న తరహాలోనే ఎస్సీ, ఎస్టీ ప్రత్యేక బడ్జెట్‌ కింద కేటాయించిన నిధులను కూడా చట్టబద్ధ నిబంధనలు, బడ్జెట్‌ కేటాయింపులకు అనుగుణంగా పూర్తిస్థాయిలో వినియోగించాలని భట్టి విక్రమార్క సూచించారు. నిధుల ఖర్చులో ఉన్న లోపాలను గుర్తించి, వాటిని సరిదిద్దేందుకు తక్షణ చర్యలు తీసుకోవాలని ఆదేశించారు. బడ్జెట్‌ కేటాయింపులకు, వాస్తవ ఖర్చులకు మధ్య ఉన్న వ్యత్యాసాన్ని గుర్తించి, నిధుల వినియోగాన్ని వేగవంతం చేయాలని తెలిపారు. ఖర్చులో వెనుకబడిన శాఖలతో ఆర్థికశాఖ అధికారులు ప్రత్యేక సమీక్షలు నిర్వహించాలని సూచించారు. నిధుల వినియోగంలో గణనీయమైన వ్యత్యాసాలు ఉన్న శాఖల కార్యదర్శులతో త్వరలో సమావేశాలు నిర్వహించాలని డిప్యూటీ సీఎం ఆదేశించారు. ప్రాధాన్య శాఖలతో ప్రారంభించి వ్యవసాయం, వైద్యారోగ్యం, ఇంధనం, పురపాలక పరిపాలన, పంచాయతీరాజ్‌, సాంఘిక సంక్షేమం, పరిశ్రమలు, గిరిజన సంక్షేమ శాఖలపై సమీక్ష చేపట్టాలని సూచించారు. అనంతరం ఇతర శాఖల పనితీరును కూడా పరిశీలించాలని తెలిపారు. ప్రతి శాఖకు కేటాయించిన నిధులు, ఇప్పటివరకు చేసిన వ్యయం, మిగిలిన నిధులను సమర్థంగా వినియోగించేందుకు తీసుకోవాల్సిన చర్యలతో సమగ్ర నివేదిక రూపొందించాలని అధికారులను ఆదేశించారు. ఈ నివేదిక ఆధారంగా నిధుల వినియోగంలో ఎదురవుతున్న సమస్యలను గుర్తించి పరిష్కరించాలని సూచించారు.
ఆదాయ వనరుల సమీకరణకు ప్రణాళిక
రాష్ట్ర ఆర్థిక పరిస్థితిని బలోపేతం చేసేందుకు అందుబాటులో ఉన్న వనరులను సమర్థంగా వినియోగించుకోవడంతోపాటు అదనపు ఆదాయ మార్గాలను గుర్తించాలని భట్టి విక్రమార్క సూచించారు. వాస్తవ ఆర్థిక పరిస్థితులను పరిగణనలోకి తీసుకుని బడ్జెట్‌ రూపకల్పన చేయాలని తెలిపారు. ఖర్చుల నియంత్రణ, నిధుల సమర్థ వినియోగం, అభివృద్ధి కార్యక్రమాలకు అవసరమైన ఆర్థిక వనరుల లభ్యతకు ప్రాధాన్యం ఇవ్వాలని స్పష్టం చేశారు. ఆర్థికశాఖ చేపడుతున్న సంస్కరణలు, ప్రభుత్వ ఆదాయాన్ని పెంచే చర్యలు, రుణాల పునర్వ్యవస్థీకరణ వ్యూహాలపై అధికారులతో విస్తృతంగా చర్చించారు. రాష్ట్ర దీర్ఘకాలిక ఆర్థిక ప్రయోజనాలకు అనుగుణంగా పటిష్ఠమైన ప్రణాళికలు రూపొందించాలని సూచించారు. భవిష్యత్తు అవసరాలను దృష్టిలో ఉంచుకుని తీసుకునే ఆర్థిక నిర్ణయాలు రాష్ట్రంలో స్థిరమైన ఆర్థిక వృద్ధికి దోహదపడాలని పేర్కొన్నారు.
నిపుణుల సలహాలతో ఆర్థిక నిర్వహణ
ఆర్థిక నిర్వహణలో అనుభవజ్ఞులైన సలహాదారులు, ఆర్థిక నిపుణుల సేవలను వినియోగించుకోవాలని భట్టి విక్రమార్క సూచించారు. భవిష్యత్తు అవసరాలకు అనుగుణంగా ప్రణాళికలు రూపొందించేందుకు నిపుణుల సలహాలు, సూచనలను పరిగణనలోకి తీసుకోవాలని తెలిపారు. బడ్జెట్‌ కేటాయింపులు, నిధుల ఖర్చు, అభివృద్ధి కార్యక్రమాల అమలు మధ్య సమన్వయం ఉండేలా నిరంతర పర్యవేక్షణ చేపట్టాలని అధికారులకు సూచించారు. సంక్షేమ నిధులు అర్హులైన లబ్ధిదారులకు చేరడంతోపాటు రాష్ట్ర ఆర్థిక స్థిరత్వం దెబ్బతినకుండా చూడటం సమర్థవంతమైన ఆర్థిక నిర్వహణలో కీలకమని స్పష్టం చేశారు. రాష్ట్ర అభివృద్ధి లక్ష్యాలను సాధించే దిశగా ఆర్థికశాఖ అధికారులు సమన్వయంతో పనిచేయాలని ఆదేశించారు.
