టీవీకేకు మంత్రుల నుంచే 99 శాతం విరాళాలు!
విజయ్‌ పార్టీకి నలుగురు దాతల నుంచి రూ.13.3 కోట్లు
ఆధవ్‌ అర్జున రూ.8.2 కోట్లు.. రంజిత్‌ కుమార్‌ రూ.5 కోట్లు
అన్నాడీఎంకే, డీఎంకేలకు భారీగా నిధులిచ్చిన టైగర్‌ అసోసియేట్స్‌
చెన్నై : తమిళనాడు ముఖ్యమంత్రి విజయ్‌ సారథ్యంలోని తమిళగ వెట్రి కళగం (టీవీకే)కు 2025–26 ఆర్థిక సంవత్సరంలో నలుగురు దాతల నుంచి రూ.13.3 కోట్ల విరాళాలు అందాయి. వీటిలో సుమారు 99 శాతం నిధులను ఆ పార్టీకి చెందిన ఇద్దరు మంత్రులే సమకూర్చారు. ఎన్నికల సంఘానికి పార్టీ సమర్పించిన నివేదికలో ఈ వివరాలు వెల్లడయ్యాయి. తమిళనాడు క్రీడల శాఖ మంత్రి ఆధవ్‌ అర్జున రూ.8.2 కోట్ల విరాళం అందించారు. పార్టీకి వచ్చిన మొత్తం విరాళాల్లో ఆయన వాటానే సుమారు 60 శాతం. మరో మంత్రి ఆర్వీ రంజిత్‌ కుమార్‌ రూ.5 కోట్లు ఇచ్చారు. ఈ ఇద్దరి విరాళాల మొత్తం రూ.13.2 కోట్లు కాగా, మిగిలిన రూ.10 లక్షలను మరో ఇద్దరు దాతలు అందించారు. తూత్తుకుడి లయన్స్‌ టౌన్‌ చిరునామాతో నమోదైన స్నో షో, స్నో ఎక్స్‌పోర్ట్స్‌ అండ్‌ ఇంపోర్ట్స్‌ సంస్థలు డిమాండ్‌ డ్రాఫ్ట్‌ల ద్వారా చెరో రూ.5 లక్షలు విరాళంగా ఇచ్చాయి.
అన్నాడీఎంకేకు రూ.161 కోట్లు.. డీఎంకేకు రూ.91 కోట్లు
ఎన్నికల సంఘం గణాంకాల ప్రకారం, 2025–26లో అన్నాడీఎంకేకు రూ.161.35 కోట్ల విరాళాలు అందాయి. ఇందులో టైగర్‌ అసోసియేట్స్‌ ఒక్కటే రూ.135 కోట్లు ఇచ్చింది. ముఖ్యమంత్రి ఎం.కె. స్టాలిన్‌ సారథ్యంలోని డీఎంకేకు రూ.91.19 కోట్ల విరాళాలు వచ్చాయి. ఈ పార్టీకి కూడా టైగర్‌ అసోసియేట్స్‌ రూ.125 కోట్లు అందించినట్లు కథనంలో పేర్కొన్నారు. కోల్‌కతా కేంద్రంగా పనిచేసే టైగర్‌ అసోసియేట్స్‌కు లాటరీ వ్యాపారవేత్త శాంటియాగో మార్టిన్‌తో సంబంధాలున్నట్లు తమిళ మీడియాలో గతంలో కథనాలు వచ్చాయి. ఆ సంస్థ భాగస్వామి సుబ్బయ్యన్‌ నాగరాజన్‌కు మార్టిన్‌తో దీర్ఘకాలంగా వ్యాపార సంబంధాలు ఉన్నట్లు కూడా వార్తలు వెలువడ్డాయి. 2024 ఫిబ్రవరిలో సుప్రీంకోర్టు ఎన్నికల బాండ్ల పథకాన్ని రద్దు చేయడానికి ముందు మార్టిన్‌కు చెందిన ఫ్యూచర్‌ గేమింగ్‌ అండ్‌ హోటల్‌ సర్వీసెస్‌ భారీగా ఎన్నికల బాండ్లను కొనుగోలు చేసింది. ఆ బాండ్ల ద్వారా డీఎంకేకు పెద్ద మొత్తంలో విరాళాలు అందిన విషయం పథకం రద్దు తర్వాత వెలుగులోకి వచ్చింది.
మార్టిన్‌ కుటుంబానికి టీవీకేతోనూ బంధం
ఈ వ్యవహారంలో మరో ఆసక్తికర అంశం ఉంది. శాంటియాగో మార్టిన్‌ కుమార్తెను టీవీకే మంత్రి ఆధవ్‌ అర్జున వివాహం చేసుకున్నారు. దీంతో మార్టిన్‌ కుటుంబానికి టీవీకేతోనూ కుటుంబ సంబంధం ఉంది. అన్నాడీఎంకే, డీఎంకేలకు టైగర్‌ అసోసియేట్స్‌ ద్వారా భారీ విరాళాలు అందగా, టీవీకేకు మార్టిన్‌ కుటుంబంతో సంబంధమున్న మంత్రి నుంచి పెద్ద మొత్తంలో నిధులు రావడం రాజకీయ వర్గాల్లో ఆసక్తికర చర్చకు దారితీస్తోంది.
