చాకలి ఐలమ్మ పోరాట స్ఫూర్తి నేటి తరానికి ఆదర్శం
బీసీల రాజ్యాధికారం కోసం ఐక్యంగా పోరాడాలి
సామాజిక న్యాయం, సమానత్వం, ఆత్మగౌరవం సాధించాలి
కుడా మాజీ చైర్మన్, ఓబీసీ చైర్మన్ సుందర్రాజ్ యాదవ్ పిలుపు
కాకతీయ, హనుమకొండ/శాయంపేట: తెలంగాణ వీరనారి చాకలి ఐలమ్మ 131వ జయంతి వేడుకలను హనుమకొండ, శాయంపేటలో ఘనంగా నిర్వహించారు. హనుమకొండ రాంనగర్లోని బీసీ భవన్లో ఓబీసీ ఆధ్వర్యంలో ఐలమ్మ చిత్రపటానికి కుడా మాజీ చైర్మన్, ఓబీసీ చైర్మన్ సుందర్రాజ్ యాదవ్, ఓబీసీ ప్రధాన కార్యదర్శి గడ్డం భాస్కర్ పూలమాలలు వేసి నివాళులర్పించారు. అనంతరం శాయంపేటలో రజక సంఘం ఆధ్వర్యంలో నిర్వహించిన వేడుకల్లో పాల్గొని ఐలమ్మ విగ్రహానికి నివాళులర్పించారు. సుందర్రాజ్ యాదవ్ మాట్లాడుతూ అణచివేత, దోపిడీకి వ్యతిరేకంగా ఐలమ్మ చూపిన ధైర్యం, ఆత్మగౌరవం, పోరాట స్ఫూర్తి చిరస్మరణీయమన్నారు. మహిళలు, పేదలు, అణగారిన వర్గాల హక్కుల కోసం ఆమె చేసిన పోరాటం నేటి తరానికి స్ఫూర్తిదాయకమన్నారు. బీసీలపై పార్టీలకు ప్రేమ ఉంటే ఎన్నికల్లో బీసీలకు టికెట్లు కేటాయించాలని డిమాండ్ చేశారు. ఐలమ్మ ఆశయాలను స్ఫూర్తిగా తీసుకుని బీసీ రాజ్యాధికారం కోసం ప్రతి ఒక్కరూ కృషి చేయాలని పిలుపునిచ్చారు. కార్యక్రమంలో మాజీ ఎమ్మెల్యే వన్నాల శ్రీరాములు, తెలుగు అకాడమీ చైర్మన్ ప్రొఫెసర్ కూరపాటి వెంకట్నారాయణ, గౌడ సంఘం రాష్ట్ర అధ్యక్షుడు బొనగాని యాదగిరి గౌడ్, రావుల సుదర్శన్, వేణు మాధవ్ గౌడ్, సహదేవ్, చక్రపాణి తదితరులు పాల్గొన్నారు.
