భార్య, అత్త, కుమారుడిపై కోడవలితో దాడి
కేకలు విని పరుగెత్తుకొచ్చిన స్థానికులు
నిందితుడిని పట్టుకుని పోలీసులకు అప్పగింత
కాకతీయ , ఏటూరునాగారం : భార్య, అత్త, కుమారుడిపై ఓ వ్యక్తి కోడవలితో విచక్షణారహితంగా దాడికి పాల్పడిన ఘటన ములుగు జిల్లా ఏటూరునాగారం మండలం రొయ్యూరు గ్రామంలో కలకలం రేపింది. కుమ్మరి చంద్రప్రసాద్ తన తల్లి అంత్యక్రియలు నిర్వహించిన అనంతరం అత్తగారి ఊరైన రొయ్యూరుకువచ్చి భార్య, పిల్లలతో కలిసి భోజనం చేసి మంచంపై పడుకున్నాడు. 
ఈ క్రమంలో దుర్గం రామక్క ఇంటికి వచ్చి మాట్లాడుతుండగా, మంచంపై ఉన్న చంద్రప్రసాద్ ఒక్కసారిగా లేచి భార్య, అత్త, కుమారుడిపై కోడవలితో దాడికి దిగాడు. బాధితులు కేకలు వేయడంతో అప్రమత్తమైన స్థానికులు అక్కడికి చేరుకుని నిందితుడి కళ్లలో ఇసుక చల్లి, చేతులు, కాళ్లను తాళ్లతో కట్టేసి అదుపులోకి తీసుకున్నారు. సమాచారం అందుకున్న ఏటూరునాగారం ఎస్సై మహేష్ సిబ్బందితో ఘటనా స్థలానికి చేరుకుని చంద్రప్రసాద్‌ను అదుపులోకి తీసుకున్నారు. గాయపడిన వారిని ఏటూరునాగారం ప్రభుత్వ ఆసుపత్రికి తరలించారు. ఘటనపై విచారణ జరిపి నిందితుడిపై చట్టప్రకారం చర్యలు తీసుకుంటామని ఎస్సై తెలిపారు. ఘటనకు సంబంధించి పూర్తి వివరాలు తెలియాల్సి ఉన్నాయి.
