భూ సేకరణ ప్రక్రియను త్వరగా పూర్తి చేయాలి
హ‌న్మ‌కొండ కలెక్టర్ చాహత్ బాజ్ పాయి
కాకతీయ, హ‌న్మ‌కొండ : భద్రకాళి చెరువు వరద నీటి అవుట్‌ఫాల్‌ రెగ్యులేటర్ పనులను వేగవంతం చేయాలని హనుమకొండ జిల్లా కలెక్టర్ చాహత్ బాజ్ పాయి అధికారులను ఆదేశించారు. మంగళవారం హనుమకొండలోని కాపువాడలో భద్రకాళి చెరువు కట్ట వద్ద చేపట్టిన నాలా విస్తరణ పనులను, భూసేకరణ ప్రక్రియను ఆమె క్షేత్రస్థాయిలో పరిశీలించారు. ఈ సందర్భంగా ఇప్పటివరకు పూర్తయిన పనుల పురోగతిని, ఇంకా సేకరించాల్సిన భూమి వివరాలను అధికారులను అడిగి తెలుసుకున్నారు. నాలా విస్తరణ పనులను త్వరితగతిన పూర్తి చేయడంతో పాటు, పెండింగ్‌లో ఉన్న భూసేకరణ ప్రక్రియను సైతం వేగవంతం చేయాలని కలెక్టర్ సూచించారు. పనుల్లో జాప్యం జరగకుండా సంబంధిత శాఖల అధికారులు సమన్వయంతో పనిచేయాలని, అభివృద్ధి పనులను నిర్దేశిత సమయంలో పూర్తి చేసేందుకు అవసరమైన చర్యలు తీసుకోవాలని ఆదేశించారు. ఈ పరిశీలనలో హనుమకొండ ఆర్డీవో వెంకటేశ్, మున్సిపల్ ఎస్‌ఈ రాజ్‌కుమార్, ఇరిగేషన్ ఎస్‌ఈ రాంప్రసాద్, ఈఈలు రవికుమార్, కిరణ్‌కుమార్, సీపీ రవీంద్ర రెడేకర్, డీఈ మధుసూదన్ రెడ్డి, తహసీల్దార్ రవీందర్ రెడ్డి, ఇతర అధికారులు పాల్గొన్నారు.
