దేశంలో నిశ్శబ్ద విప్లవం!
కాంగ్రెస్‌కు పెరుగుతున్న ప్రజామద్దతు
రాహుల్‌ నాయకత్వం వైపు ప్రజల చూపు
కష్టకాలంలో పార్టీకి అండగా నిలిచిన కార్యకర్తలకు గుర్తింపు ఇవ్వాలి: మంత్రి ఉత్తమ్‌
కాకతీయ, తెలంగాణ బ్యూరో : రాహుల్‌ గాంధీ నాయకత్వంలో దేశవ్యాప్తంగా నిశ్శబ్ద విప్లవం సాగుతోందని రాష్ట్ర నీటిపారుదల, పౌరసరఫరాల శాఖల మంత్రి కెప్టెన్‌ ఎన్‌. ఉత్తమ్‌కుమార్‌రెడ్డి అన్నారు. బీజేపీ, ప్రధాని నరేంద్ర మోదీకి ప్రత్యామ్నాయం వైపు ప్రజలు చూస్తున్నారని, కాంగ్రెస్‌కు పెరుగుతున్న మద్దతు దేశంలో రాజకీయ మార్పుపై ఉన్న ఆకాంక్షకు నిదర్శనమని పేర్కొన్నారు. సోమవారం చార్మినార్‌ వద్ద నిర్వహించిన రాజీవ్‌గాంధీ సద్భావన యాత్ర స్మారక దినోత్సవం, రాజీవ్‌ సద్భావన పురస్కార ప్రదానోత్సవానికి ఆయన అధ్యక్షత వహించారు.
క్లిష్ట పరిస్థితుల్లోనూ రాహుల్‌ గాంధీ కాంగ్రెస్‌కు సమర్థ నాయకత్వం అందించారని ఉత్తమ్‌ అన్నారు. దేశవ్యాప్తంగా పార్టీ కార్యక్రమాల్లో ప్రజల భాగస్వామ్యం పెరుగుతోందని, బీజేపీని ఓడించి లౌకికవాదం, ప్రజాస్వామ్యం, జాతీయ సమైక్యతను బలోపేతం చేసే పోరాటంలో కార్యకర్తలు రాహుల్‌కు అండగా నిలవాలని పిలుపునిచ్చారు.
కార్యకర్తల సేవలకు గుర్తింపు ఇవ్వాలి
గత బీఆర్ఎస్ పాలనలో అనేక ఇబ్బందులు ఎదురైనా పార్టీ కోసం పనిచేసిన క్షేత్రస్థాయి కార్యకర్తలకు కాంగ్రెస్‌ ప్రభుత్వం మరింత గుర్తింపు ఇవ్వాలని ఉత్తమ్‌ సూచించారు. వారి పట్టుదల, త్యాగాలు, నిరంతర కృషి తెలంగాణలో కాంగ్రెస్‌ తిరిగి అధికారంలోకి రావడంలో కీలక పాత్ర పోషించాయని పేర్కొన్నారు. పార్టీ ముఖ్య కార్యక్రమాల్లో మంత్రులు, ఎంపీలు, ఎమ్మెల్సీలు, ఎమ్మెల్యేలు విస్తృతంగా పాల్గొనాలని, ప్రభుత్వం, పార్టీ మధ్య సమన్వయం మరింత బలోపేతం కావాలని అన్నారు. రాజీవ్‌గాంధీ చేపట్టిన సద్భావన యాత్ర మతసామరస్యం, జాతీయ సమైక్యతకు ప్రతీకగా నిలిచిందని తెలంగాణ కాంగ్రెస్‌ వ్యవహారాల ఏఐసీసీ కార్యదర్శి సచిన్‌ ఎం. సావంత్‌ అన్నారు. సమాచార సాంకేతిక రంగం, పంచాయతీరాజ్‌, యువత సాధికారతలో రాజీవ్‌ కృషిని గుర్తుచేశారు. కంప్యూటరీకరణ ప్రాధాన్యాన్ని ముందుగానే గుర్తించారని, పంజాబ్‌, అసోం, మిజోరంలలో శాంతి పునరుద్ధరణకు కృషి చేశారని తెలిపారు. ఓటు హక్కు వయసును 21 నుంచి 18 ఏళ్లకు తగ్గించి యువతకు ప్రజాస్వామ్య ప్రక్రియలో భాగస్వామ్యం కల్పించారని పేర్కొన్నారు. కుల, మత విభజనలు దేశాన్ని బలహీనపరుస్తాయని సావంత్‌ ఆందోళన వ్యక్తం చేశారు. విద్వేషాన్ని ఎదుర్కొని ప్రేమ, సామరస్యం, జాతీయ ఐక్యతను కాపాడాలని పిలుపునిచ్చారు. రాజీవ్‌గాంధీ ఆశయాలను ముందుకు తీసుకెళ్లడమే ఆయనకు నిజమైన నివాళి అని వక్తలు పేర్కొన్నారు.
డాక్టర్‌ సి. మల్లికార్జునకు సత్కారం
సమాజానికి విశిష్ట సేవలందిస్తున్నందుకు హైదరాబాద్‌లోని ఏషియన్‌ ఇన్‌స్టిట్యూట్‌ ఆఫ్‌ నెఫ్రాలజీ అండ్‌ యూరాలజీ వ్యవస్థాపకుడు, మేనేజింగ్‌ డైరెక్టర్‌, చీఫ్‌ కన్సల్టెంట్‌ యూరాలజిస్ట్‌ డాక్టర్‌ సి. మల్లికార్జునను సత్కరించారు. 1990 నుంచి రాజీవ్‌గాంధీ సద్భావన యాత్ర స్మారక కార్యక్రమాన్ని నిర్వహిస్తున్న మాజీ పీసీసీ అధ్యక్షుడు వి. హనుమంతరావు, రాజీవ్‌ సద్భావన పురస్కార కమిటీని ఉత్తమ్‌ అభినందించారు. ఈ కార్యక్రమంలో టీపీసీసీ అధ్యక్షుడు మహేశ్‌కుమార్‌గౌడ్‌, ఏఐసీసీ కార్యదర్శి సచిన్‌ ఎం. సావంత్‌, మాజీ పీసీసీ అధ్యక్షుడు వి. హనుమంతరావు, మాజీ మంత్రి గీతారెడ్డి, ఎంపీ అనిల్‌కుమార్‌యాదవ్‌, సీనియర్‌ నాయకులు అంజన్‌కుమార్‌యాదవ్‌, ఫిరోజ్‌ఖాన్‌, కాంగ్రెస్‌ నాయకులు, రాజీవ్‌ సద్భావన పురస్కార కమిటీ సభ్యులు పాల్గొన్నారు.
