గురుకులాల్లో కనీస వసతులు కరువు
విద్యార్థినులకు భద్రత ఉండటం లేదు
14 మంది బాలికలను ఎలుకలు కరిచినా పట్టని అధికారుల తీరు
మాజీ మంత్రి ఎర్రబెల్లి దయాకర్రావు
పాలకుర్తి బాలికల గురుకుల ఘటనపై మాజీమంత్రి ఎర్రబెల్లి ఆగ్రహం
విద్యార్థినులను పరామర్శించేందుకు వెళ్లగా అడ్డుకున్న పోలీసులు
కాకతీయ, వరంగల్ బ్యూరో : గురుకుల పాఠశాలలో 14 మంది బాలికలను ఎలుకలు కరిచే వరకు అధికారులు, సిబ్బంది ఏం చేస్తున్నారని మాజీ మంత్రి ఎర్రబెల్లి దయాకర్రావు ప్రశ్నించారు. విద్యార్థినుల పరిస్థితిని తెలుసుకుని ధైర్యం చెప్పేందుకు పాలకుర్తి సాంఘిక సంక్షేమ బాలికల గురుకుల పాఠశాలకు వెళ్లిన తనను పోలీసులు గేటు వద్దే అడ్డుకోవడం దుర్మార్గపు పాలనకు నిదర్శనమని విమర్శించారు. జనగామ జిల్లా పాలకుర్తి మండల కేంద్రంలోని గురుకుల పాఠశాలలో 14 మంది విద్యార్థినులను ఎలుకలు కరిచినట్లు ఎర్రబెల్లి దయాకర్రావు తెలిపారు. విద్యార్థినులను పరామర్శించేందుకు వెళ్లగా పోలీసులు లోపలికి అనుమతించకపోవడంతో బీఆర్ఎస్ మండల నాయకులు, కార్యకర్తలతో కలిసి గేటు ఎదుట నిరసన చేపట్టారు. సాంఘిక సంక్షేమ శాఖ రాష్ట్ర కార్యదర్శితో ఫోన్లో మాట్లాడి విద్యార్థినుల పరిస్థితిని వివరించారు.
తల్లిదండ్రులకు సమాచారం ఇవ్వలేదా?
విద్యార్థినులను ఎలుకలు కరిచిన ఘటనపై వారి తల్లిదండ్రులకు కూడా సమాచారం ఇవ్వలేదని ఎర్రబెల్లి దయాకర్రావు ఆరోపించారు. విద్యార్థినుల ఆరోగ్యం, భద్రత విషయంలో ప్రభుత్వం నిర్లక్ష్యం చేయకూడదన్నారు. గతంలో ఇదే పాఠశాల వాచ్మెన్ను పాము కరిచిన ఘటన కూడా జరిగిందని గుర్తుచేశారు. ఎమ్మెల్యే క్యాంపు కార్యాలయానికి పక్కనే గురుకులం ఉన్నప్పటికీ సమస్యలు పరిష్కారం కాకపోవడం బాధాకరమన్నారు.
బీఆర్ఎస్ ప్రభుత్వ హయాంలో తాను ఏడాదికి రెండుసార్లు గురుకులాన్ని సందర్శించి విద్యార్థుల సమస్యలను తెలుసుకుని కనీస వసతులు కల్పించేవాడినని ఎర్రబెల్లి దయాకర్రావు అన్నారు. అధికారులు వెంటనే విద్యార్థినుల ఆరోగ్య పరిస్థితిని పరిశీలించి అవసరమైన వైద్యం అందించాలని, గురుకులంలో పారిశుద్ధ్య చర్యలు చేపట్టి ఎలుకల బెడదను పూర్తిగా నివారించాలని డిమాండ్ చేశారు. విద్యార్థినుల భద్రతకు అవసరమైన అన్ని చర్యలు తీసుకోవాలని కోరారు. నిరసనకు బీఆర్ఎస్ మండల శ్రేణులు మద్దతు తెలిపారు.
